1 Johannes 4 - Etestemente Epe ✠ 1951

ONTOPORUA 4. Angareni aaniirombo. Kareni mohore.

¹ Jahorike, inamu itura ombepo keshe, aaue konakoneni eembepo nge oda zi mu Karunga, oshoka opu naaprofeti ojendji aaniirombo, jo je ja muujuni.

² Ombepo ha Karunga otahi dimbururua ngii: ombepo keshe ndji ahi epurura Jesus Kristus e ja monjama, ho ohomu Karunga.

³ Ombepo keshe ndji itahi epurura Jesus, kahi shi homu Karunga. Oho omunandumbo na Kristus, ngu mua uva kutja te ja. Nde oku ri po nokuri muujuni.

⁴ Ne omua zi mu Karunga, janona, omue mu sinda. Ohe tuu ngoka e ri mu ne, e vure ngoka e ri muujuni meenkondo.

⁵ Mboka jomuujuni, otsho haa popire pajuni, uujuni hau j’uvu.

⁶ Sse otua zi mu Karunga. Keshe ngu e tshi Karunga, ote tu uvu. Ngu ke shi guomu Karunga, ite tu uvu. Otsho atu dimburura ombepo hotshiri nombepo hiirombo.

⁷ Jahorike, tu oracaneni, oshoka ohore oha zi mu Karunga. Keshe ngu e nohore, he okua a varua mu Karunga noku tshi Karunga.

⁸ Ngu ke nohore, ke tshi Karunga, oshoka Karunga ohe ohore.

⁹ Tsho otsh’oroka ohore ha Karunga hoku tu ora, Karunga sho a tuma Epona rje muujuni, opo tu kare nomuenjo mu he.

¹⁰ Ohore hotshiri oho ndjika: ha shoka sse tua ri tu hore Karunga, aaue, oshoka he a za e tu ore tango, nokue tu tumina Omona konkashu heendjo detu.

¹¹ Jahorike, Karunga sho e tu ore otshingi, na sse uo otu nokuoracana.

¹² Kaku na ngu a muene Karunga. Ndere nge otu nohore hokuoracana, Karunga ota kara mu sse, nohore he oha guanenena mu sse.

¹³ Otu nedidiriko rjokukara kuetu mu he, na he mu sse, sho e tu pa k’Ombepo he.

¹⁴ Sse otue tshi mona nde tatu tshi okorora, Karunga okua tuma Omona ng’omukuriri gu’uujuni.

¹⁵ Ngu t’epurura Jesus nokutja Omumua Karunga, omu he Karunga ta kara, na he mu Karunga.

¹⁶ Nde sse otua dimburura ohore ndjika ha Karunga hoku tu ora, nde otue hi iteera. Karunga ohe ohore. Ngu ta kara mohore, he oha kara mu Karunga, na Karunga mu he.

¹⁷ Otsho ohore ha Karunga tahi ningi ha guanenena mokati ketu, tu kare nehinekero mesiku rjepanguro, oshoka ngashi ohe, na sse uo tu ri po muujuni mbuka.

¹⁸ Etiro kari mo mohore. Ohore ha guanenena otahi tida etiro, oshoka metiro omu negeero. Keshe ngu a tira ke nohore ha guanenena.

¹⁹ Ano tu oreni Karunga, oshoka he a ri e tu ore tango.

²⁰ Nge ku na ngoka ta ti: “Ondi ore Karunga” he oha tondo mumuahina, ohe omuniirombo. Oshoka ngoka ke ore mumuahina ngu e uete, ota vuru ngiini kuora Karunga ngu ke uete?

²¹ Otshipango shika otue tshi peua uo ku Karunga, kutja ngu e hore Karunga oku nokuora uo mumuahina.