1 Johannes 3 - Etestemente Epe ✠ 1951

ONTOPORUA 3. Horeni aakueni.

¹ Tareni uunene uohore ndji Tate e tu ningira sho tatu rukua nde tua ningi uo aana ja Karunga. Otsho uujuni inau tu tshiua, oshoka uo kau mu tshi.

² Jahorike, ngashingika osse aana ja Karunga. Ndere inatshi oroka manka shoka tatu ka ninga komesho. Ndere otu tshi nokutja otatu ke mu fa, nge ta k’oroka, oshoka otatu ke mu tara, ngashika e ri.

³ Na keshe ngu e netegerero ndika mu he, ot’ijapura ngashi he uo omujapuki.

⁴ Keshe ngo ta ningi uurunde, ota rongo uuhineji, uo uurunde ouo uuhineji.

⁵ Omu tshi nokutja he oku’oroka a kuce po uurunde uetu. Mu he kamu nuurunde.

⁶ Keshe ngu ta kara mu he, ita ningi uurunde. Na keshe ngoka ta ningi uurunde, he ine mu mona he otsho ke mu tshi.

⁷ Janona, inamu pukicua nand’okomuntu. Ngu ta diginine uujuki, ohe omujuki, ngashi he uo omujuki.

⁸ Ngoka ta ningi uurunde, okua zi komusatana, oshoka omusatana oh’omurunde hera a za. Omumua Karunga otsho a horokera opo a shanagure po iironga jomusatana.

⁹ Keshe ngoka a varua mu Karunga, ka ninga uurunde, oshoka ombuto he ahi kara mu he. Nde ita vuru kuninga uurunde oshoka okua varua mu Karunga.

¹⁰ Aana ja Karunga naana jomusatana otaa dimbururua mu mbjoka: ngu ita diginine uujuki, ina za mu Karunga, na ngoka ke ore mumuahina.

¹¹ Oshoka eraka omue ri uva keshimbiko, orjo ndika, mu oracane.

¹² Inamu fa Kain, ngu a zi muuhineji nokua dipaga mumuahina. Okue mu dipagere tshee? Oshoka iironga je oja ri iihineji, jo mbi jamumuahina iijuki.

¹³ Jamuameme, inamu rurirua uujuni nge tau mu tondo.

¹⁴ Sse otu tshi nokutja otua zi meso notua hi momuenjo, oshoka otu ri mpo tu ore aamuameme. Ngoka ke nohore, oha kara meso.

¹⁵ Shempa ngo ha tondo mumuahina, he omudipagi. Nde omu tshi tshi nokutja omudipagi ita kara nomuenjo guarushe mu he.

¹⁶ Otsho tua dimbururira ohore ha Karunga, sho e tu pa omuenjo gue. Na sse uo otu nokupa aamuameme eemuenjo detu.

¹⁷ Nge ku na ngoka e nuujamba u’uujuni mbuka, ta mon’omumuahina e neendjepo, he te mu kukutikire omuenjo gue, ohore ha Karunga otahi kara mu he ngiini?

¹⁸ Janona, inatu kareni tu ore nohapu no neraka, aaue oniironga no motshiri.

¹⁹ Mu ho atu dimburura nge tua zi motshiri, nde tatu tarareke eemuenjo detu kotshipara tshe.

²⁰ Oshoka omuenjo guetu nge tagu tu geere, Karunga oku vure omuenjo guetu, oshoka oku tshi atshishe.

²¹ Jahorike, omutima guetu nge itagu tu geere, sse otu nehinekero rjokuinekera Karunga.

²² Nde sse atu peua ku he shoka atu mu indire, oshoka otua diginina iipango je, atu rongo shoka atshi pandikua ku he.

²³ Notshipango tshe otsho shi: Sse tu iteere edina rj’Omona Jesus Kristus, sse tu oracane, ngashi e tshi tu rombuera.

²⁴ Keshe ngu ta guanica iipango je ota kara mu he, na he mu he. Nokukara kue mu sse atu ku dimburura m’Ombepo ndji e tu pa.