1 Johannes 2 - Etestemente Epe ✠ 1951

ONTOPORUA 2. Eceni uurunde.

¹ Janaandje, doka andi di mu tshangere ne kamu jone. Ndere nge ku na ngoka a jona, nena otu nomupopiri pu Tate, okutja oJesus Kristus h’omujuki.

² Ohe onkashu heendjo detu, ha heendjo detu ike, aaue, noheendjo duujuni aushe.

³ Mokudiginina iipango je, ss’atu dimburura nokutja otu mu tshi.

⁴ Ngu ta ti nokutja oku mu tshi, he ita diginine iipango je, ohe omuniirombo, mu he kamu notshiri.

⁵ Ngu ha guanica eehapu de, mu he omu nohore ha Karunga, ha guana. Otsho atu dimburura nokutja otu ri mu he.

⁶ Ngu ta ti kutja ota kara mu he he oku nokuenda ngashi he kua ha ende.

⁷ Jahorike, itandi mu tshangere otshipango otshipe, aaue, otshipango otshikuru, mua kara na tsho okuza koshimbi. Otshipango shika otshikuru otsho ohapu ndji mua peua.

⁸ Ndere otandi mu tshangere uo otshipango otshipe. Tsho otshi ri pu he no pu ne, oshoka eemrema oda shura po, nuujerere uotshiri oua oroka.

⁹ Ngu ta ti nokutja oku ri muujerere, he ha tondo omumuahina, nguno oku ri meemrema sigo onena.

¹⁰ Ngu e hore mumuahina, ohe ta kara muujerere, mu he kamu na sho atshi pundukica.

¹¹ Ndere ngoka ha tondo mumuahina, oku ri meemrema, he t’ende meemrema. He ke tshi hoka ta hi, oshoka eemrema oda tsikica omesho ge.

¹² Otandi mu tshangere ne janona, oshoka eendjo deni otamu di diminua po moru’edina rje.

¹³ Otandi mu tshangere ne ooshe, oshoka ne omu tshi ngoka e ri po okuza koshimbi. Otandi mu tshangere ne janjasha, oshoka ne mua sinda omuhineji.

¹⁴ Otandi mu tshangere ne janona, oshoka omu tshi Tate. Otandi mu tshangere ne janjasha, oshoka ne omu neenkondo, nohapu ha Karunga ha kara mu ne, nde ne mua sinda omuhineji.

¹⁵ Inamu kara mu ore uujuni na shoka tshi ri muujuni. Nge ku na ngoka e hore uujuni, mu he ohore ha She kahi mo.

¹⁶ Atshishe tshomuujuni otsho okaaru konjama, okaaru komesho, okaaru kokuitanga. Iinima mbika itaji zi mu She, aaue, omuujuni.

¹⁷ Uujuni otau shuru po nokaaru kauo. Ndere ngoka ha guanica eharo rja Karunga, he ota kara arusherushe.

¹⁸ Janaandje, erara rja shugunina orja cikana. No ngashi mua uva nare, omunandumbo na Kristus ote ke ja. Nanena opu na nokuri aanandumbo na Kristus. Otsho atu vuru okudimburura nokutja otu ri merara rja shugunina.

¹⁹ Jo oja zire mu sse, ndere kaja ri jakuetu. Ngeno okua ja ri jakuetu, ando ja kara uo puamue na sse. Ndere mu jo omua oroka nokutja ha ajeshe oojakuetu.

²⁰ Ndere one mua guajekua k’Ombepo Ondjapuki, no mu tshi atshishe.

²¹ Inandi mu tshangera oshoka kamu tshi otshiri anuua, aaue, omu tshi tshi no mu tshi nokutja iirombo itaji zi motshiri.

²² Omuniirombo ano ore? Ke shi ngoka ta patana kutja Jesus ohe Kristus? Ohe ngoka omunandumbo na Kristus ngu ta tindi kuiteera She n’Omona.

²³ Keshe ngoka t’idimbike Omona, ke na She. Ndere ngoka t’epurura Omona, oku na uo She.

²⁴ Shoka mue tshi uva poshimbi natshi kare uo mu ne. Nge atshi kara mu ne shoka mua uva peshimbiko, ne amu kara uo m’Omona no mu She.

²⁵ Shoka e tu rombuerera osho shika: omuenjo guarushe.

²⁶ Iinima mbika onde ji mu tshangera moru’aapukici jeni.

²⁷ Ndere pu ne pu kare eguajeko ndi mua peua ku he. Nena inamu pumbua mu rongue ku gurue. Ngashi eguajeko rje ari mu rongo atshishe, otsho otsh’otshiri niirombo kaji po. Ngashi okue mu rongo, otsho kareni mu he.

²⁸ Eno janona, kareni mu he, opo tu kare nehinekero, nge ta k’oroka, katu gugicue ku he pejo rje.

²⁹ Nge omu tshi nokutja he omujuki, nena omu tshi uo nokutja keshe ngu ta diginine uujuki, okua varua mu he.