Zôo 7 - Bible

¹ “Ŋ̀éniɛi ŋí su, núu-kpune ŋɔkɛ ɣéniɛi káa nɔ́ yɛ̂ɛ núu ƃé kɔ-kuluƃa tii kɛ̂i. Díkɛ̀ ɣéniɛi su, dímɔ̃lɛ-laai káa nɔ́ yɛ̂ɛ diai da tíi kɛ̀ dí dífela fé a ɣele-wulii.

² Núu-kpune ŋɔkɛ ɣéniɛi káa nɔ́ yɛ̂ɛ luɛ ƃé ninîŋ maa kpɛnîi a gɛɛ é víi tɔɔ, yɛ̂ɛ tíi kɛ́-nuu ƃé ŋɔfela fêi maa kpɛnîi.

³ Ŋá kɛ̀ ɣéniɛi káa nɔ́ kpɛ́ni-kpɛni, ɣele láa ƃoɔɔ da kpíni pɛlɛɛ yée mu a berei ŋa ḿɔ̃lɛ̂i lai.

⁴ Tãi ŋà kɛ̀ lâai lai, ŋa kɛ̂ ŋ́gili-ŋa siâi, ŋ́gɛ mò ńyɛɛ, ‘Lé tãi ƃé ɣele a pâi ƃɔ̂i lai?’ Gbínii su kôyaai, láa fé ḿâ, ŋa lɛ̂ɛ kpɔ́ penêi ńaa gbìŋ ŋá é lɛ́ɛ la zu ɣele é ƃɔ́.

⁵ Kpêle da pala-kareŋ da ŋ́gbono gwaa kélee ma siɣe. Pala a tée ŋ́gbono gwaa kélee ma vɔ̃́iŋ kɛ́ pù.

⁶ Ŋá kɛ̀ ɣéniɛi a tɛɛ̂i a maa félaa yɛ̂ɛ berei seɣe pala-nuu a ŋɔkenai tɛ̀ɛ la a maa félaai. Ŋá ɣele kûui káa tɛɛ̂i a maa félaa. Kɛ ɣéniɛ maa kili kɛ-zu fé ŋɔ́nɔ ńyêei.

⁷ “Óo Ɣâla, é lɛ́ɛ íkili-ŋa a gɛɛ ŋáfulu-laai káa nɔ́ yɛ̂ɛ fãa. Ḿve ŋɔ́nɔ pâi koi-nɛ̃ɛ kulâi a dɔnɔ kpîŋ.

⁸ Íkaa nɔ́ ŋ́gâai lonii ma. Kɛ́lɛ nàa-loŋ a kɛ̀ tí, ífe pâi ŋɔ́nɔ ŋ́gâai kpɛ́ni fêi, ŋa pâi saâi ŋá kúla íŋɛi.

^9-10 Núu é máŋ sáa, va ŋɔ́nɔ pà pôlu ɣele ma. A kɛ̂ nɔ́ yɛ̂ɛ berei tí lúu a pɛ̂lɛ la gɛ́ taai. M̀aa mɛ̂ni kíli a kpɛ̂ɛ ǹûai da dîa-ni díkɛ̀ naai díkili-ŋa.

¹¹ Mɛni ma, ḿve pâi mɛi-saai. Ŋa pâi lônoi ŋá lii-too pôlui su. Ńii ŋwânai kpɔ́ a ŋanaa.

¹² “Ḿve a yúo kpaa máŋ yúoi-zele kali a gɛɛ ípa ńdoo kpɔnɔ-ŋa.

¹³ Ŋá máŋ lí lâai a gɛɛ ŋá ńyii,

¹⁴ ya ŋ́gɛ̀ ŋá see nyɔ́mɔɔ ƃó ŋ́gɛ yào.

¹⁵ Eêi pɔ̂ri kɛ̂i a ǹɛ́lɛɛ à kɛ̀ núu da a ŋ́zòŋ a ŋ́gwana. A pɔ̂ri kɛ̂i a ǹɛ́lɛɛ a gɛɛ ŋá sáa é tɛ́ɛ la ŋá lɛ́ɛ a ŋ́gao ma.

¹⁶ Ŋá kɛ̀ ɣéniɛi ƃɛlɛ a kpɛɛ ŋ́goi. Ḿve ŋɔ́nɔ ŋ̀wɛ̂lii ŋá kɛ́ ɣele ma. Ye tée ḿâ kpɛ́ni fêi ŋá kɛ̀ ɣéniɛi su fé ŋɔ́nɔ kôyaa-ni.

¹⁷ “Núu-kpune káa a lé ǹyaa m̀aa mɛ̂ni kpanaŋɔ̂ɔi yâ a gɛɛ tii? Eêi pɔ̂ri kɛ̂i a ǹɛ́lɛɛ eê kɛ̀ ífe núu-kpune maa mɛ̂ni siɣe ní a gbanaŋɔɔ.

¹⁸ Ya nàa kàa a ɣele wâla kélee, íkɛ m̀aa kpɛɛ a ŋ̀ánaai.

¹⁹ Ífa íŋɛi sìɣe ḿâ a da-loŋ, í nɛ̀ɛ naa ŋá ǹá-ya kpîŋ kpele?

²⁰ À kɛ̀ ŋa sɔnyɔ̂ŋ kɛ̀, lé ƃé a pâi gɛ̂i a yá? Yái ya núu maa kpɛ̂ɛ a ŋánaai, lé mɛni ƃé ya monîi nɔ́ la gîe mɛi a tãi kéleei? Lé mɛni ƃé ŋaâ kɛ́ la yɛ̂ɛ kpîri wiyɛɛ à kɛ̀ íŋûai?

²¹ Lé ƃé ífa íyee sèe ŋá pɔara mɛni mai mu, í nia ŋá mɛni nyɔ́mɔɔi mai? Ŋuŋ-la a pá pilîi tãi kpua yée mu. Ya pâi ŋ́gɔ̂rii a ŋánaa kɛ́lɛ fé pâi ŋɔ́nɔ kɛ̂i naa.”