Zôo 6 - Bible

Zôo è Ɛlifa wóo su tòo

¹ Zôo è Ɛlifa wóo su tòo ǹyɛɛi,

² “Eêi kɛ̀ núu da kɛ́ ƃò a gɔ́lɔŋɔɔ berei ńii ŋwânai lai, gɛ́ ƃò a m̀ɛni kpɔ̂lui kɔ́lɔŋɔɔ ŋ́gaa zui,

³ eêi gɔ̀lɔŋ a gɛɛ ŋá mɛni kpɔ̂lui tɛɛ̂i ǹyá-ŋai kélee su ŋãyai púɔɔ gîe ma mà. Zɛŋ ƃé gɛ̀ ŋ́gɛ lòno yɛ̂ɛ ƃoo-nuu.

⁴ Ŋ̀wála-wâla kélee Ɣalai a gɛ́ ŋ́gɛ mɔ̃lɛ yɛ̂ɛ, da núu ƃòŋ a sɔ̀ala-ŋa nyii ŋɔsóli a siâi kpɔ́ gbono gwaa kélee ma. Ɣâla a gbîŋ kpɛtɛ a gɛɛ é pɛ́lɛ ḿâ a namu, ǹyaŋ m̀ɛnii ŋí a ńyaôi kpɔ́ a ŋanaa.

⁵ “Lɔɔ fɛnɛ-sɛŋ kɔ́nɔŋ à kɛ̀ ma, va wɔ̂lɔ. Kpaa máŋ, taa-tulɛ fa wɔ̂lɔ à kɛ̀ ǹâmu a gɔ́nɔŋ kùla.

⁶ Mii-sɛŋ nyii mìi-kpolo fé mai, zu láɣi-laɣiɛɛi. Tɛ́ɛ-ɣaloŋ gòlei tí zui, ǹáɣiɛɛi a ŋá ŋánaa.

⁷ Mii-sɛŋ sii kɛ́ɛ tí ƃɛlɛ fé ŋ́goi. A gɛ̀ ŋ́gɛ pà ŋ́gɔŋ pilîi.

⁸ “Ŋa Ɣâla fɛlîi a gɛɛ é m̀ɛnii kɛ́ mî nyii ŋa marê kɛ̂i m̀ɛni mai, a gɛɛ é m̀ɛnii kɛ́ ḿîi nyii ŋa ŋ̀wɛ̂lii.

⁹ Eêi pɔ̂ri kɛ̂i a ǹɛ́lɛɛ Ɣâla é ŋá fúlu-laai maa tée, é ǹyée fúloŋ ŋáfulu-laai ma yɛ̂ɛ da seɣe fâla.

¹⁰ Ŋ́âi kɛ̀ a gɔ́lɔŋɔɔ, gɛ̀ ní ŋa pâi pilîi ɣelêi a lii-nɛ̃ɛ, ḿva ŋ́gili ŋá sìa é pîlaŋ zɛŋ sôli-maa kɛ́tɛi ŋí mɛni ma. M̀ɛnii kélee Ŋ̀âla Maa-Waai a wɔ́lɔ mò ḿâi ŋa wɔ́lɔ ńyee sèe mu.

¹¹ Wála-wala-laa fé ŋɔ́nɔ ńyêei a gɛɛ ŋá kɛ́ ɣele ma. Mɛni ma, lé mɛni ƃé ŋa pâi ńii maa sonîi la tãi kili-kɛ-zu fé ŋɔ́nɔ ńyêei tínaa tuɛ-pere mɛni mai.

¹² Ŋ́wala-walaai yɛ̂ɛ kɔni? Kpaa máŋ dí ŋ́gbɛ̀tɛ a ƃára? Kpao! Ve tí a dɔnɔ kpîŋ.

¹³ Ŋá gɔ́lɔŋ a gɛɛ fa pɔ̂ri kpɔnîi ŋ́gbîŋ mà. Núu da kélee fé naa é ŋuŋ ma ƃó.

¹⁴ “Ǹúui nyii-ŋai dífe díƃarâai wɛ́li-nii, dífa yâo Ŋ̀wála-wâla kélee Ɣalai ma.

¹⁵ Káai ŋí a ńawoi-ni, ka ḿbɛlɛ̂i yɛ̂ɛ fólo-ɣele ya-ɣɛli-ŋa, nyii a kpâla tuna a wàla kɛ́ pûi.

¹⁶ Ka fɛ̂ɛ a sama-ɣele.

¹⁷ Tãi fólo láa a ƃô lai, ka kpâla.

¹⁸ Zoo-faleŋ-ŋai da dísia-ƃela da kula berei ma, díkɛ ǹyá-ɣɛli-pɛlɛ-ŋai ŋí kɔ̀ri a gɛɛ dí díkpele. Da lɛɛ sia-siai é lɛ́ɛ la zu dílaŋ dísaa.

¹⁹ Zoo-faleŋ-ŋai da dísia-ƃelai da-ni, díkùla Tema díkɛ vɛ̃ɛ-kpâlaŋ su kɔ̀ri yá mɛni ma. Kili kɛ-zu kɛ́ ƃò nyii-ŋai kùla Siƃai yêei a gɛɛ da pâi yá kâai.

²⁰ Zoo-faleŋ-ŋai da dísia-ƃelai díkili è kɛ̀ zu a gɛɛ da pâi yá kâai. Kɛ́lɛ tãi dísèri la naai, díkɛ̀ wúlee dílii é tóo pôlu.

²¹ Ká tûa-pere káa nɔ́ yɛ̂ɛ ǹyá-ɣɛli-pɛlɛ-ŋai nyii núu fa gíli tɔ̀ɔ mai. Ka ŋá mɔ̃lɛ-laai káa ká kɛ́ yào m̀a.

²² Ḿve ká marê kɛ́ ní a gɛɛ ká sɛŋ da tɛ́ɛ ḿbɔ, kpaa máŋ ká yee pɛlɛ ǹá sɛŋ tɛɛ ḿaa mɛ̂ni ma.

²³ Ḿve ká marê kɛ́ ní a gɛɛ ká sɛŋ-kao tɛɛ diai mɔ̃lɛi dí pɔ́ a gɛɛ ká káŋuŋ maa ƃó díyêei.

²⁴ “Ŋa pâi mɛi saâi ŋá ŋ̀wóli tɔ́ɔ yâ í sɛŋ lɛ́ ḿâ. Í m̀ɛni nyɔ́mɔɔi lɛ́ ḿâ nyii ŋá gɛ̀i.

²⁵ Núu fa pɔ̂ri ǹyée kulâi teniŋ-ƃo sia mu, gɛ̀ ní lé mɛni ƃé ya ƃoo sîa toôi lai?

²⁶ Ílaâi la a gɛɛ ya pɔ̂ri ńdeniŋ tɔɔ̂i à kɛ̀ ya ŋ́gàa a ǹúui nyii kili kɛ-zu fé ǹyêei, gɛ́ lòno nɔ́ a ƃoo-perei?

²⁷ Ya pɔ̂ri kpɛyɛŋ toôi a gɛɛ í tee-lonii kɛ́ a luɛ-ŋa. Ǹyaŋ ya pɔ̂ri íƃarâŋ nuu kɔlɛ̂i a sɛŋ sɔlɔ ƃóɔɔ?

²⁸ “Ka ŋ́ɛi lèɣe-lèɣe ma kaa. Ḿve pâi lɛɛ kɛ̂i kâa.

²⁹ Kpera ínîa lono kɛ̂i mɛi. Kpera dûa sii ŋí ma, kɛ́ a gɔ́lɔŋɔɔ a gɛɛ fé mɛni nyɔ́mɔɔ da kɛ́ ní.

³⁰ Ŋ́gaa a tɛi kɔ́mɔ-nuu? Vé tí a dɔnɔ kpîŋ! Ya gâai yɛ̂ɛ sɛŋ ƃé fé mɛni kpɔ̂lu kɔ́lɔŋ?”