Zôo 5 - Bible

¹ “Zôo, ye tóli ƃó í gáa à kɛ̀ núu da a pâi fâai íwoo mu. Ŋ̀âla-taa kelai da káa naa nyii ya pɔ̂ri marê kɛ̂i a gɛɛ é kpɔŋ mâ tɛɛ ípɔ?

² Líi ŋwâna da tólo a ƃoo-nuu su kàra.

³ Ŋá m̀oo-ƃela kâa dítɔɔ̂i kpanaŋɔ̂ɔi kpɔ́ a ŋánaa, kɛ́lɛ ŋa dípɛrɛ-ŋai náɣaŋ-laa kpɔ́ a màa félaa.

⁴ Dínîa-pɛlɛɛ-ŋai díkaa nɔ́ wɔ́lɔ mɛni kpɔ̂lu su. Mɛni a wɔ́lɔ lɛɛ dîa mɛni-saa ƃó-kere-ŋai mu. Núu da fé naa é tɔ́ɔ díƃela ma-pere.

⁵ Diai puru káa dîai da pâi m̀oo-ƃelai dímii-sãai kélee miî, é máŋ kɛ́ a nyii-ŋai ŋ̀alêŋ-kpɔlɔi sui. Mii-sɛŋ wɛli-ƃela da pâi tɔɔ̂i dîa dígɔ̃liŋ mɛni ma.

⁶ Mɛni nyɔ́mɔɔ fé a sɛŋ nyii a sôo ǹɔii ma yɛ̂ɛ sí-sɛŋ, kpaa máŋ mɛni kpɔ̂lu é sóo ǹɔii ma.

⁷ Kɛ́lɛ mɛni kpɔ̂lu a pâi wɔ̂lɔ kɛ̂i nɔ́ núu pôlu é síɣe maa sɔlɔ-ƃo tãi ma, yɛ̂ɛ berei ŋɔŋ-kpãle a tâa la ɣelêi.

⁸ “Eêi kɛ̀ ńyãa ƃa yá, gɛ̀ ní ŋ́aâ lí Ɣâla pɔ́naa ŋá ḿaa mɛni pú ŋ̀ɛi.

⁹ Kúfa târe gili-ŋa tɛ̂i mɛni kpaya-kpaya-ŋai su Ɣâla a gɛ̀i, ǹyaŋ ŋɔzugbɛrɛ-gbɛrɛ mɛni-ŋai kóyaŋ fé ma.

¹⁰ Ɣâla a gɛ̀ tuna é pú ǹɔii ma, gɛ̀ yá pù gbálaŋ-ŋai ŋá.

¹¹ Diai dífii kpɛɛ̂i, Ɣâla a dímu sìɣe é dítɔɔ. Diai malôŋ toɔ̂ɔi diai, Ɣâla a díŋa-nɛnɛ.

¹² Ɣâla a ŋ̀ôya-ƃelai dí mɛni kpɛtɛɛ-ŋai kélee su kàra. Dí mɛni kpɛtɛɛ-ŋai ŋá fa kûla ma a ǹɛ́lɛɛ.

¹³ A ŋ̀ôya-ƃelai sòŋ a díkpɔɔi woya-tarei. Ɣâla a núu-pɛlɛ-ƃela díwôya mɛni kpɛtɛɛ-ŋai su kàra a maa félaa.

¹⁴ Tãi kwaa a kɛ̂ la a bonoɔɔi, da kɛ̂ nɔ́ kpînii, díkɛ díkɔɔ tùa a vóloi-ŋa yɛ̂ɛ ŋ̀ɛ́i pû-nuu-ƃela ƃé siâi kpînii.

¹⁵ Kɛ́lɛ Ɣâla a gôlo-ƃelai kùla saa yêei. A ǹúu doo-mu-ŋai kùla dímɔ̃lɛ-laai su.

¹⁶ Ɣâla a kili-kɛ-zu kɛ́ gôlo-ƃelai yêei, a ŋ̀wana-lɔ̂ɔ-ƃelai kpéra díwana-lɔ̂ɔ tùa-ŋai dîa.

¹⁷ “Lûwa káa diai dîa Ɣâla a díteniŋ tɔɔi. M̀ɛni ma, ífe íyee kùla Ŋ̀wála-wâla kélee ɣalai ŋɔmɛni kula maa kɛ́ɛi mu.

¹⁸ Ɣâla a núu wàna, é maa palai tí sále. A mɛni ŋánaa kɛ̀ a núu é maa nuui tí ƃálo.

¹⁹ Tãi nyii kélee nɔ́ ya pîli la mɛni kpɔ̂lu sui, a pâi kpɔnîi yâ é ímaa kɔ̃ɔ.

²⁰ Tãi puru a tôo lai, Ɣâla a pâi íkɔnɔŋ kulâi, tãi máŋ kɔ́ a pâi toôi lai, vé pâi nɛɛ̂i naa dí ípaa.

²¹ Ɣâla a pâi íkulâi diai da mɛni nyɔ́mɔɔ ƃò é pîlaŋ yâi díyêei. Ífe pâi yaôi tãi mɛni kpɔ̂lu sii kélee da a pâ la ípɔi.

²² Ya pâi íŋɛi naɣîŋ-nii mɛni kpɔ̂lu da puru dímɛi. Ífe pâi yaôi lɔɔ fɛnɛ-sãa dîa.

²³ Kɔni fé pâi kɛ̂i íkpâlaŋ ŋa. Ǹɔɔ fɛnɛ-sãai dífe pâi pɛlɛ̂i yâ.

²⁴ Ípɛrɛi mu-sãai kélee kpɔ́ a pâi ƃûu ƃôi. Í máŋ íƃala konaŋ su káa, gélee a pâi kɛ̂i a ŋaa pɔ̂riɛɛ.

²⁵ Ínîa-pɛlɛɛi da pâi kɛ̂i kpɔ́ a dítamaa, yɛ̂ɛ berei tí kala káa la ǹɔii gwaa kélee mai.

²⁶ Ya pâi lɛɛ̂i ɣele ma ípɔlɔ, yɛ̂ɛ berei tí mɔlɔŋ a mɔ̂ŋ la dílɛɛ pâi dêei.

²⁷ Zôo, kwa mɛ̀ni-ŋai maa kpɛ́ɛ a ǹɛ́lɛɛ. Díkaa a tɔ̃yâ. M̀ɛni ma, íyee sée mù íkpîŋ mɛni ma.”