Zôo 42 - Bible

¹ Nya ƃe Zôo è Yâwɛɛ wóo su tòo ǹyɛɛ mai,

² “Ŋá gɔ́lɔŋ a gɛɛ ya pɔ̂ri mɛni sîi kélee kpɔ́ kɛ̂i. M̀ɛnii nyii kélee kpɔ́ gbɛtɛ̂i íkili-ŋai, ya pɔ̂ri gɛ̂i núu da fa pɔ̂ri íkperâi mà.

³ Í marê kɛ̀ yɛ̂ɛ wála-wala-laa lé kɛ́ɛ ƃé ńyêei a gɛɛ ŋá ítɔ̃yâ tua-pere-ŋai maa marê kɛ̀ɛ kɛi. Ŋá lòno é pîlaŋ m̀ɛnii ma ḿve kɛ́ ní a gɔ́lɔŋɔɔi. Ŋá lòno é pîlaŋ mɛni maa pɔlɔ-pɔlɔɔ-ŋa dîa nyii ḿva târe zui.

⁴ Í mò ḿâ yɛ̂ɛ, ‘Íwoli tɔ́ɔ ŋá lóno ípɔ, ŋa pâi ímarê kɛ́i a gɛɛ í ńdare tɔ́ɔ.’

⁵ Ŋá kɛ̀ nɔ́ a íkɔlɔŋɔɔ kpɛ́ni fêi ŋá ímaa mɛ̂ni mɛ̀ni nûa lá. Kɛ́lɛ ŋâa nâa íkaa kpɔ́ a ŋ́gbîŋ ŋɛi-gao.

⁶ Maa mɛ̂ni ma, ŋâa nâa ŋ́oo síɣe pôlu. Ŋa ḿbôlu tɔɔ ńdûa-pere ma ŋa muluŋ da luu pú ŋûa a malôŋ-pere.”

M̀ɛnii gbɛɛ-ŋai

⁷ Nyíŋi pôlu ma, Yâwɛɛ kɛ́ɛ a kpɛɛ a lónoɔɔ Zôo pɔi, Yâwɛɛ è mò Tema-nuui Ɛlifa ma ǹyɛɛi, “Ńii ŋwânai yâ é pɛ́lɛ Beeda da Zofa dîa, kpɛ́ni fêi, káfe tɔ̃yâ ƃó ní é pîlaŋ ḿâ. Ńyee mu-nuui Zôo nɔ́ ƃé tɔ̃yâ ƃò é pîlaŋ ḿâ.

⁸ M̀ɛni ma, ka niŋa-sirɛ lɔ́ɔlu mɛi-feerɛ da ƃála-sirɛ lɔ́ɔlu mɛi-feerɛ síɣe ká lí a dia ńyee mu-nuui Zôo pɔ́naa ká kéreŋ sala kula ká mɛni ma. À kɛ̀ tí, ńyee mu-nuui Zôo a pâi Ɣâla fɛlîi ká mɛni ma. Gɛ̀ ní ŋa pâi ńyee seêi ŋɔɣâla fɛli-wooi mu, ḿve pà ƃâa kulâi kâa yɛ̂ɛ berei ká tûa-pere káa lai. Káfe lóno ní a tɔ̃yâ-pere é pîlaŋ ḿâ yɛ̂ɛ berei Zôo è gɛ̀ lai.”

⁹ Nya ƃe Ɛlifa, Beeda da Zofa nyii-ŋai kɛ̀ a Tema, Sûa, da Naama-ƃelai dí m̀ɛnii kɛ̂ nyii Yâwɛɛ è mò dîa a gɛɛ dí gɛ́i. Ǹyaŋ Yâwɛɛ è ǹyée sèe Zôo ŋɔɣâla fɛli-wooi mu tãi è Ɣâla fɛ̀li lai.

¹⁰ Zôo kɛ́ɛ a kpɛɛ a Ɣâla fɛliɛɛ m̀arâai mɛ̂ni mai, Yâwɛɛ è nâa gɛ̀ a tɔɔ-nuu é ŋɔsãai kélee pɔɔ-ŋa tôo tɛɛ bɔ́ feerɛ-feerɛ.

¹¹ M̀ɛni-ŋai ŋí kélee pôlu ma, Zôo ŋɔkáyɔɔ-ŋai kélee da diai kélee kɛ̀ a gɔ́lɔŋɔɔi, dí pà bɔ́naa a gɛɛ dí dílaa tí mà mɛni-ŋai Yâwɛɛ è gɛ̀ lai mɛni ma. Dí kúu kɛ̀ mà, díkelee dí sɛŋ-kao tɛ̀ɛ bɔ́ da gôo gbono-ŋa.

¹² Nya ƃe Yâwɛɛ è lûwa làa Zôo ŋɔɣéniɛi gbɛɛ-ŋai ma é tɛ́ɛ duɛ-tuɛi ma. Zôo ŋɔtaa-tulɛ-ŋai dí nâa kɛ̀ a ƃála wála puu kao náaŋ (14,000), soo-fáleŋ wála lɔ́ɔlu mɛi da (6,000), da tíi kɛ́-niŋa siɣɛ wála feerɛ (2,000), é pɛ́lɛ wɛlɛ-sôo wála tɔnɔ (1,000) ma.

¹³ Ǹônii-sinaai díkɛ̀ lɔ́ɔlu mɛi feerɛ da nɛ̃yâa saaƃa.

¹⁴ Zôo è ǹônii-nɛyaa saaƃai ŋí láa sèe a Sinimɔŋ, Kɛzia da Kɛrɛ-apu.

¹⁵ Nɛnî da fé kɛ́ ní ŋ̀éniɛi gwaa da ma ŋɔlɛ́lɛ é seri Zôo ǹônii-nɛyaa saaƃai ŋí pɔ́. Zôo è pɔɔ-sɛŋ tɛ̀ɛ dí dípɔ tɛi-tɛi yɛ̂ɛ berei è dɛ̀ɛ la ǹônii-sinaai pɔi.

¹⁶ Mɛni-ŋai ŋí kɛ́ɛ da kpɛɛi, Zôo è ŋɔ́nɔ kɛ̀ ɣele ma a kóraŋ ŋuŋ tɔnɔ pôlu buu náaŋ (140). M̀ɛni ma, è namu kpɔ́ ɣele ma é lɛ́ɛ la zu é ǹônii díwɔ̂ lonii díwɔ̂ lonii ŋɔlonii-ŋai káa.

¹⁷ Nyíŋi kélee pôlu ma, Zôo è pɔ̀lɔ kpɔ́ a ŋ̀á ŋánaa é lɛ́ɛ pâi saâi.