Zôo 40 - Bible

¹ Yâwɛɛ è ŋɔ́nɔ mò Zôo ma ǹyɛɛi,

² “Zôo, ya pâi naa kperâi ŋ́oo-mu sɔɔ̂i, ńyãai a Ŋ́wála-wala kélee Ɣalai? À kɛ̀ ya pâi kɛ̂i nɔ́ ŋ́oo-mu sɔɔ̂i, gɛ̀ ní mare kɛ̂ɛ-ŋai ŋí su kula.”

³ Nya ƃe Zôo è Yâwɛɛ wóo su tòo ǹyɛɛi,

⁴ “Ɣâla, ŋa pɔ̂ri íwoo su too-pere kɛ̂i leŋ? Ŋa ńyee pɛ́lɛ ńa a gɛɛ ŋ́oo fa lâ tɛ́ la.

⁵ Ŋâa nâa lóno a dámaa m̀ɛni ma, ḿve nâa pâi lônoi ŋɔ́nɔ.”

⁶ Nàa kɛ́ɛ tíi, Yâwɛɛ è lòno Zôo pɔ́ vãa kɛ́tɛi su ǹyɛɛ mai,

⁷ Í mu-siɣe í ísama ɣíri yɛ̂ɛ kpakolo. Ŋa pâi ímarê kɛ̂i í zu-kula mî.

⁸ Tɔ̃yâ ma ya ŋ̀wɛ̂lii í ńɛ a lɛ́ɛ nûu. Ya pâi ŋámɛnii ŋá têei í ǹɛ́ a gɛɛ íwɔ̂i mɛnii lɛ̂lɛɛi?

⁹ Íwala-wala-laai seriɛ̂i ŋ́ɔ̂i pɔ́? Íwoo a pɔ̂ri tɛ̂i ɣelêi yɛ̂ɛ ŋ́ɔ̂i?

¹⁰ À kɛ̀ gáa tí, gɛ̀ ní íkɛtɛ-laai, ífolo-laai, da í maa-waa laai lɛ́ ḿâ.

¹¹ Ǹɛɛ ŋaŋ naa dí ílii ŋwânai kaa, í diai díŋɛi tɛ̂ɛi ŋá yéŋ.

¹² Ŋ̀ɛi-tɛ-ƃelai ŋá yéŋ ŋaŋ, í ŋ̀wana-lɔ̂ɔ-ƃelai kula maa kɛ́ lonii ma ƃɛ́i díkaa naai.

¹³ Dí lóo ŋaŋ ǹɔii mû pere, díŋɛi ɣíli ŋaŋ ƃɛ́i nàa káa a saa-taai.

¹⁴ Gɛ̀ ní ńyãa kpîŋ ƃé pâi kɛ̂i a m̀aa-ŋuŋ ŋá ílaa maa tɛ́, ŋá tela fáa mà a gɛɛ íkpîŋ wala-wala-laai ƃé gɛ̀ í kɛ́ íŋuŋ ma ƃò.

¹⁵ Íkili-ŋa sía é pîlaŋ ǹyɔ̃ɔmai ma nyii ŋá gbɛ̀tɛ yɛ̂ɛ yái, kɛ́lɛ gɛ́ kala mîi yɛ̂ɛ tíi kɛ́ niŋa-sirɛi.

¹⁶ Ye gáa, ŋɔwála-wala-laai káa dɔ̃ɔi ŋɔkponoi kpânaŋ kɛ́ ƃò ǹana su.

¹⁷ A ŋ̀óŋ tɔ̀ɔ kpɔ́ a gbanaŋɔɔ yɛ̂ɛ sîda wuru, ǹyaŋ ǹana-ŋai díkaa gɔ́ɔ sui díkpanaŋɔɔi kpɔ́ a ŋ̀á ŋánaa.

¹⁸ Gáo kpanaŋɔɔi yɛ̂ɛ ƃara, dɔɔ̂i kpanaŋɔɔ yɛ̂ɛ kɔli.

¹⁹ Gáa a fɛnɛ-sɛŋ nyii gɛtɛ̂i é tɛ́ɛ ŋ̀ele-ma-sãai kélee dîa. Ǹyaŋ ǹúui gbɛ̀tɛi nɔ́ ƃa pɔ̂ri baâi.

²⁰ Ǹáa mii kâla a kpɛ̂tɛ ǹyée-ŋai ma ƃɛ́i fɛnɛ-sãa da kpɛ́ni-ŋa da pêle kɛ̀ naai.

²¹ A lî é láa ŋ̀alêŋ-kpɔlɔi mu gala-ŋai sáma bâra-yai su.

²² Víi tɔɔ̂i ƃa ŋ̀úru-ŋai ninîŋ mu, ŋ̀alêŋ-kpɔlɔ-ŋai mu da ǹya-ɣɛli-ŋai kɔlɛ.

²³ A kɛ̀ ǹyái a fɛ̀ɛ va ǹíi kùla ma. Zɔdiŋ Ya-leei é máŋ kpîŋ seri zũa lá a kɛ̂ nɔ́ a mɛi-saa.

²⁴ Núu da fa pɔ̂ri zonîi kpaa máŋ é kpawɔ píli zũai é gula la.