Zôo 39 - Bible

¹ “Í góraŋ m̀ɛ́ tãi kɔ́lɔŋ ǹyéei su ƃoli-ŋai da dí kàa lai? Ya tá sôlo-sua káa gɛ́ gàa?

² Í ŋ̀áloŋ kɔ́lɔŋ vɛ̃nɛ-sãai ŋí koo a gɛ̀ dîai da tãi da díkàa lai?

³ Í tãi kɔ́lɔŋ da dímaa pɛ̂lɛ la díkɛ díkàa a gɛɛ dílônii dífa lâa too lâa ǹɔii ma a díkaa tãi?

⁴ Dílônii da ƃɔ̂lɔ ǹɔii su da kɛ̀tɛ dí dílee-ni lɛɛ naa díli díkpɔɔi yee ma dífa ŋɔ́nɔ lène pôlu dílee-ni pɔ́ naa.

⁵ “Ŋ̀wɛlɛ-sôo-ŋai nyii-ŋai dínuu-namu fé mai, gbɛ̂ɛ ƃé díŋuŋ ma ƃò, é dífùlɔŋ é dílɛɛ naa díkɛ sìa díkpɔɔi yee mai?

⁶ Ŋa dítɛ̀ɛ nɔ̀ii m̀ɛ́i núu da fa sêe naa, kpaa máŋ dí kpâlaŋ-ŋa tii kɛ́ naa. Ŋa dítɛ̀ɛ ǹɔii m̀ɛ́i ma kala fa lɛ̂lɛ naa a dɔnɔ kpîŋ.

⁷ Da díwoli kùla kpɔ́ daai su woo-ŋai su. Dífa nûa wóo mɛni díkɛ làɣi dîa a gɛɛ dí tíi kɛ́.

⁸ Da kɛ̂ ǹyéei su gwaa kélee ma kɔ̂rii díkɔnɔŋ mɛni ma, ǹyaŋ da duma-lâa ŋunu-pɛlɛɛi kélee kpôloŋ ma dí kɛ́ mìi.

⁹ “Ya pɔ̂ri gɛ̂ tou-sirɛ é tíi kɛ́ yɛ̂ɛ? A pɔ̂ri pâi a gɛɛ é nyíi ƃɛ́i ya ítaa-tulɛ-ŋai kɔ́nɔŋ kùla naai?

¹⁰ Ya pɔ̂ri ɣɛli toôi ma í gɛ́ é kpîri wiyɛɛ siɣêi yɛ̂ɛ, kpaa máŋ í lɔii siŋ-kɔli kpulɔŋ ma a gɛɛ é lɔii síŋ yɛ̂ɛ sí-sɛŋ sí mɛni ma?

¹¹ Ya pɔ̂ri íkili tɔɔ̂i ŋɔwála-wala-laa kɛ́tɛi ma í ítii tɛ́ɛ ƃɔ́ gɛ́ mɛni ma? Kpaa máŋ í íkili láa ma ítii kpanaŋ-ŋai kɛ́ mɛni ma?

¹² Ya pɔ̂ri lâai la a gɛɛ é pá pôlu a ímii-sɛŋ, m̀ii-sɛŋ táŋ kwaai ma?

¹³ “Dua-too ŋɔ̂ni a kɛ̂ goôŋ kpɛlînii. Nyíti fa nɛ̀ a gɛɛ a pɔ̂ri koônii.

¹⁴ Dua-too ŋɔni a ŋ̀áloŋ tòo nɔ́ ǹɔii ma é ǹɛɛ naa é lí ǹîa kwaa ma. Ǹyaŋ a ŋ̀áloŋ lɛ̀ɛ naa a gɛɛ ŋ̀ayai é vãa.

¹⁵ Va kɛ̂ a gbáaŋɔɔ a gɛɛ sɛŋ da a pɔ̂ri dí wôloi, kpaaŋ máŋ fɛ̃nɛ-sɛŋ da é ƃɔ́rɔŋ dîa é dí wólo.

¹⁶ Vé kpaaŋ-ni ǹônii mɛni ma. A tûa nɔ́ a dia yɛ̂ɛ sɛŋ ƃé dífe a ǹônii. Ǹyaŋ vé kpaaŋ-ni m̀ɛni-solii è gàa dí maa mɛni mai ma.

¹⁷ Ńyãa ƃé gɛ̀ vé táre ní. Ńyãa ƃé ŋɔmɛni ŋá káa kpèra.

¹⁸ Kɛ́lɛ tãi a mù sìɣe lai, a pɛ̂lɛ kîrɛ siɣeɛ́ɛ ma. À kɛ̂ ɣɛ́lɛ-maa kulâi zooi da zia-nuu kponôi.

¹⁹ “Yá ƃé ya zoo-ŋai díwala-wala-laai tɛ̂ɛ dí pɔ́i? Yá ƃé gɛ̀ díkoŋ ma-leɣa é kúla a gôyaa, ǹɛ́lɛɛi?

²⁰ Yá ƃé gɛ̀ díkɛ pìli yɛ̂ɛ gotó-ŋa, díkɛ núu maa yâo a dí lɛ̂woi?

²¹ Da kɛ̂ ǹɔii sinîi a dísôlo a gɛɛ dí díwala-wala-laai lɛ́. Da tɛ̂ gɔ́-kɔ ŋenei ŋá, berei máŋ dí kpɔra-ƃelai díkɔ-kɔ-sãai a kɛ̂ la díyêei.

²² Yao maa kili-ŋa sia fa kɛ̂ dîa a dɔnɔ kpîŋ. Ƃɛ́i gɔ́i a kɛ̂ a gbɔ́lɔɔ naai, naa ƃé da lî naa.

²³ Zoo-sia-ƃelai dítɔ̃a-ŋai tíŋ a kɛ̂ tɛ̂i daâi da kɛ̀ liî vóloi kɛ́ lèŋ díkpala kpaya-kpayai da bɛlɛ-pɛlɛɛi dîa.

²⁴ Dífa tɔ̂ɔ tɔ̀ŋ tãi da dúrui wóo mɛ̀ni la a gɛɛ dí lí kɔ́ mai. Da kɛ̂ kpɛ̃lînii a kili kûla pere díkɛ kîrɛ sìɣe a díwala-walai kélee.

²⁵ Da gɔ́i kúŋ mɛ̀ni vãai su tãi da kɛ̂ la kwaa kôyaa mai. Da gɔkuluƃa-ŋai mɛi-nuui wóo mɛ̀ni gɛ́ gɔkuluƃa-ŋai tɛ̀ɛ dítii-ŋai dîa. Ǹyaŋ tãi da gɔkɔ́-turii wóo mɛ̀ni lai, da dílɛ̂wo tòo.

²⁶ “Í mɛni-ŋa kâai ƃé a gɛ̀ kpã́aŋ kɛ́ kòoŋ ŋ̀elei su póŋ-poŋ? Kpaa máŋ gɛ́ goôŋ fùloŋ gɛ́ kôoŋ gɛ́ lì sîɣai-perei?

²⁷ Ya ƃé ya mò guɛi ma a gɛɛ é daa tɔ́ɔ kpɔ́ ŋ̀elei su póŋ-poŋ?

²⁸ A daa tɔ̂ɔ ǹyéei tôŋ su gɔni-ŋai sáma.

²⁹ A lɛ̂ɛ naa gɛ́ kwaa kôyaa ma kàa gɔ́nɔŋ kɔ̀ri mɛni ma.

³⁰ Ǹônii da díŋa tɛ̀ mà ƃɛ́i zua poma-ŋai da kɛ̂ naai díkɛ díŋãa kpêle.”