Zôo 36 - Bible

¹ Ɛliu è lì a ŋ̀óo tuɛ-pere.

² Ílii kpéle í maa kpɛ̂ŋ kɛ́ a da-loŋ. Mɛni káa ńa a gɛɛ ŋá mó yâ Ɣâla láai su.

³ Ŋa pâi nɛ̂i yâ a gɛɛ ŋá mɛni ŋá káai su kɛ̂tɛi. Ǹyaŋ ŋa pâi nɛ̂i yâ a gɛɛ Ŋ́gbɛtɛ-nuui Ɣâla a tûa a teniŋ ƃô-pere.

⁴ Ŋa môi yâ a gɛɛ m̀ɛnii kélee ŋa môi vé a lɛ́ɛ. Ǹúui nyii dáreɛ̂ɛi é tɛ́ɛ yâi, gáa tɔɔ̂ni íkɔlɛ ƃɛ́.

⁵ Ɣâla wála-walai. Va bôlu tɔ̀ɔ núu da ma. Mɛni da fé naa nyii vá ŋá kàa.

⁶ Ɣâla fa nɛ̀ɛ naa ŋ̀wana-lɔ̂ɔ-ƃelai díkɛ ɣeniɛi su é kôyaa. Kɛ́lɛ gáa naa gɛ́ gôlo-ƃelai mɛi kâa a teniŋ ƃô-pere.

⁷ Diai da Ɣâla wóo mɛ̀ni díkɛ ŋ̀aa see kɛ̀i, a dímaa kɔ̃̂ɔ. A ƃaa kɛ́-maa tɛ̀ɛ dípɔ é dí sée kâloŋ see-sɛŋ-ŋa ŋá wɔ́lɔ-wɔlɔ da wɔlɔ-wɔlɔ.

⁸ Ǹyaŋ à kɛ̀ da dípìli kpini-pɛrɛ mu, díkɛ mɔ̃lɛ dísɔnyɔ̂ŋ mɛni ma,

⁹ gɛ̀ ní Ɣâla a ǹɛ̂i dîa a gɛɛ da sɔnyɔ̂ŋ kɛ́, da kɛ́tɛ díkpîŋ ŋɛ́i.

¹⁰ Ɣâla a gɛ̀ dí díwoli tɔ́ɔ kpɔ́ mà a ǹɛ́lɛɛ, é mó dîa a gɛɛ dí dípôlu tɔɔ dítûa-pere nyɔ̂ŋ-ŋai dîa.

¹¹ À kɛ̀ da díwoli tɔ̀ɔ mà díkɛ̀ ƃò bôlu, a pâi gɛ̂i dí díkɛ ɣeniɛi kɛ́ a lii-nɛ̃ɛ da lii-see.

¹² Kɛ́lɛ à kɛ̀ da wàla díwoli tɔ́ɔ, da pâi saâi díƃooi su.

¹³ Diai dífe láa-ni a Ɣâlai, dílii ŋwânai nɔ́ a tãi kélee. Ǹyaŋ é máŋ díkula maa kɛ́, dífa kpîŋ tìnaŋ dí m̀arê kɛ́ a gɛɛ é kpɔ́ŋ dîa.

¹⁴ Da lɛ̂ɛ a díwunu dísaa. Díkɛ̀ ɣéniɛi kpéli a kpɛ̂ɛ a ƃaa kûla-maa.

¹⁵ Diai díkaa mɔ̃lɛi Ɣâla a mɔ̃lɛ-laai sìɣe a gɛɛ é díŋuŋ ma ƃó la. A nɛ̀ɛ naa dímɔ̃lɛ a gɛɛ dí díwoli tɔ́ɔ mà.

¹⁶ Ɣâla a í kùla mɛni kpɔ̂lu su, é zãâi nyii ya ŋ̀wɛ̂lii tɛ́ɛ ípɔ. Ǹyaŋ a mii-sãa lɛ́lɛɛ-lɛlɛɛ-ŋa sèe íŋɛi-tuɛ.

¹⁷ Ɣâla a íkula maa kɛ̂ a mɔ̃lɛ-laa nyii maa nɛ̃ɛ̂ í zɔlɔ ƃoi.

¹⁸ Ímɛi káa. Ífe nɛ̀ɛ naa sɛŋ-kao é í ƃòo. Ífe nɛ̀ɛ naa ǹûai dí gɛ́ íkɛ a wôya-nuu sɛŋ-kao mɛni ma.

¹⁹ Íwɔ̂lɔ-wooi fa pɔ̂ri mɛni lɛ́lɛɛ sii kélee da kɛ̂i yɛ̂. Íwala-wala-laai fa pɔ̂ri íkulâi lii-too pôlu su.

²⁰ Ífe kpíni maa fɛ̂li a gɛɛ é pá. M̀aa tãi ƃé ǹɔii-ŋûŋ-ŋai kélee su a pâi karâi la a maa félaa.

²¹ Ípôlu tɔɔ mɛni nyɔ́mɔɔ kɛ́ɛ ma. Mɔ̃lɛ-laa è pà ípɔ a gɛɛ é gɛ́ í ípôlu tɔɔ mɛni nyɔ́mɔɔ kɛ́ɛ ma.

²² Ye gáa berei Ɣâla ŋɔwála-wala-laai kɛ̂tɛi lai. Nya ƃe gáa a zɛŋ-lɛ nuu kɛ́tɛi.

²³ Núu da fa pɔ̂ri m̀ɛnii lɛ̂i Ɣâla ma maa nɛ̃ɛ̂i é gɛi. Núu da fa pɔ̂ri môi Ɣâla ma a gɛɛ a mɛni nyɔ́mɔɔ kɛ́.

²⁴ Ǹûai da laa maa-tɛ tɛ̀ɛ Ɣâla pɔ́ a tãi kélee. Ya máŋ ye ǹáa maa tɛ́ m̀ɛni-ŋai a gɛ̀ yɛ̂ɛi m̀ɛni ma.

²⁵ Núu kélee a Ɣâla kɛ́-mɛni káa, kɛ́lɛ a gàa nɔ́ kwaa kôyaa ma.

²⁶ Ɣâla kɛ̂tɛi kpɔ́ a maa pɔlɔ-pɔlɔɔ. Kúfa pɔ̂ri târei m̀aa mɛ̂ni su. Kúfa pɔ̂ri Ɣâla ŋɔpɔlɔ-pɔlɔ-laa lɛ̂i.

²⁷ Ɣâla è ǹyá-ŋai sîɣe é dítɛ ɣelêi, é díkɛ a tuna.

²⁸ Ǹyaŋ a gɛ̀ dunai ŋí é kúla ŋ̀ele-kɔlɔŋ su gɛ́ pù ǹûai dîa kwaa kélee ma.

²⁹ Núu da fé berei kɔ́lɔŋ Ɣâla a gɛ̀ la ŋ̀ele-kɔlɔŋ kolei kɛ́ sìa ŋ̀ele-kɔlɔŋ mai. Kpaa máŋ berei ŋ̀ele-gbana a kɛ̂ lâɣii la ŋ̀elei su Ɣâla-taai.

³⁰ A gɛ̀ ŋ̀ele-gbana ŋɔkwaa ponoɔɔi kɛ́ tɛ̀ɛ ŋ̀elei su. A yúo mɛi pɛ̂lɛ mù-pere é kpíni.

³¹ Berei sîi ŋí ƃé Ɣâla a núu-kpune ŋáa kɔ̀ŋ naa gɛ́ mii-sãa támaa tɛ̀ɛ dípɔ mìi mɛ̂ni ma.

³² A ŋ̀ele-gbanai sòŋ a ǹyée, é dóo ƃɛ́i a dɛ̀ɛ naai.

³³ Ŋ̀elei su a kɛ̀ duâi, gɛ̀ ní fãa kɛ́tɛ a kɛ́ pâi. Daa tûlɛ-ŋai máŋ da gɔ̀lɔŋ a gɛɛ fãa káa pâi.