Zôo 34 - Bible

¹ Ɛliu è ŋɔ́nɔ mò ǹyɛɛi,

² “Káai ká táreɛɛi é tɛ́ɛ núu kélee mai, ka káwoli tɔ́ɔ ḿâ. Káai dîɛ ká sɛŋ kélee kɔ́lɔŋ, ka ká wóli tɔ́ɔ ḿâ.

³ Berei wóli a mɛni mɛ̂ni la é gɔ́lɔŋ a kɛ̀ gáa a tɔ̃yâi, bere nɔ́ ƃé lá a mii-sɛŋ kɔ̀ɔŋ lá é gɔ́lɔŋ à kɛ̀ ǹɛ̃ɛ̂i.

⁴ Kwâa m̀ɛnii maa kpɛ́ɛ nyii ya môi é pîlaŋ Ɣâla mai. Tɔɔ kú gáa a kúkpɔɔi kili-ŋa-sia à kɛ̀ ǹɛ̂lɛɛi.

⁵ Zôo, í mò yɛ̂ɛi, ‘Ḿve niî mɛni nyɔ́mɔɔ da kɛ́ ní. Ǹyaŋ Ɣâla a ŋátɔ̃yâi kúla ńyêei.

⁶ Mɛnii Ɣâla è mò é pîlaŋ ŋá mɛnii mâi vé kɛ́ ní a zãa. Berei máŋ ḿve niî mɛni nyɔ́mɔɔ da kɛ́ ní lai, Ɣâla a mɛni ŋánaa láa ḿâ. Mɛni ma ŋ́gaa naa saâi.’

⁷ “Ka tá wɔ́lɔ núu da káa m̀óloŋɔɔ Zôo ŋí ma nyii va ŋumɛ mâ tɛ̀ɛ Ɣâla pɔi?

⁸ A núu nyɔ́mɔɔ-ŋa kɛ́ a ǹáwoi-ni gɛ́ sìa nɔ́ yɛ̂ɛ dia.

⁹ È mò ǹyɛɛi, ‘Lé ƃé núu a pɔ̂ri zɔlɔ ƃôi a kɛ̀ da Ɣâla da kɛ̀ a dínɛ̃ɛ.’

¹⁰ “M̀ɛni ma káai a dáre-ƃelai, ka káwoli tɔ́ɔ ḿâ. Ŋ̀wála-wâla kélee Ɣalai a pɔ̂ri mɛni nyɔ́mɔɔ kɛ̂i? Vé tí a dɔnɔ kpîŋ!

¹¹ Ɣâla a núu féla fè gɛ́ tîi mɛni ma. A véla fè dûa-pere ma.

¹² Gáa a tɔ̃yâ a gɛɛ Ŋ̀wála-wâla kélee Ɣalai fa mɛni nyɔ́mɔɔ kɛ̀. A pâi m̀ɛni-ŋai ŋá têei a teniŋ ƃô-pere.

¹³ Ɣâla fa núu da kélee marê kɛ̀ a gɛɛ é wála-wala-laa tɛɛ bɔ́ naa a gɛɛ é tíi kɛ́ la ŋ̀éniɛi su.

¹⁴ À kɛ̀ Ɣâla a ŋɔmɔ̂leŋ kùla núu-kpune yêei, é ŋɔfúlu-laa lɛwoi sóŋ ǹyêei,

¹⁵ gɛ̀ ní fúlu-sɛŋ kélee a pâi saâi a ɣele tɔ̂nɔ, núu-kpune máŋ é sáa é kɛ́ pôlu a pɔ̂rɔ.

¹⁶ “À kɛ̀ m̀ɛnii ŋa môi ya ŋá kâai ma, gɛ̀ ní íwoli tɔ́ɔ ḿâ.

¹⁷ À kɛ̀ Ɣâla fa mɛni-sâa ŋá tèe a tɔ̃yâ-pere, gɛ̀ ní a pɔ̂ri ǹɔii mɛi kâai leŋ? Ŋ̀âlai nyii gɛ̂tɛi, deniŋ ƃôɔɔi, ya pɔ̂ri ŋɔmɛnii ŋá têei?

¹⁸ Núu fa pɔ̂ri kɛ̂i kâloŋ ma, ‘Íŋa kpɛɛ̂i yâ!’ Kpaa máŋ ǹyɛɛ ǹúu-pɔlɔ-ŋai dîa, ‘Kákaa a ŋwana-lɔ̂ɔ-ƃela!’

¹⁹ Ɣâla fa tɔ̂ɔ ǹúu láa-tuɛ-ƃelai pôlu. Da dɔɔ-ƃelai da gôlo-ƃelai dímɛnii ŋá tèe a bɔriɛɛ, kpɛ́ni fêi ǹya ƃé díkelee díkpɛ̀tɛ.

²⁰ Saa a pá gbínii sâmai a m̀aa félaa. Ɣâla a núu-kpune lòkwa é dóo é zu kara. A ǹúu mɛi-ƃelai su kàra nɔ́ a naa fii kpɛ̂ɛ.

²¹ Kɛ́lɛ Ɣâla a núu-kpune sia-pere maa kpɛ̂ɛ, gɛ́ ƃɛ́i kélee kàa a kɛ̀ liî naai.

²² Kɛ́lɛ kpíni sîi da fé naa nyii a pɔ̂ri gɛ̂i Ɣâla fa pɔ̂ri núu kâai a kɛ̀ mɛni nyɔ́mɔɔ kɛ̂i.

²³ Vé Ɣâla ma a kpà a gɛɛ é núu kɔ́lɔŋ, a gɛɛ é lí la ŋɔmɛni-sâa ƃó-kerei mu é ŋɔmɛnii ŋá tée.

²⁴ Ɣâla a ǹúu láa-tuɛ-ƃela wála-walaa-ŋai díwala-wala-laai kûla díyêei, é núu da kpɛ́ni pú dípɔɔ ŋá.

²⁵ Kɛ́lɛ tãi Ɣâla è dítûa-perei kɔ̂lɔŋ lai, a díyee mɛi ɣâle gbínii su é díwala-wala-laai su kàra.

²⁶ A zɔnyɔ̂ŋ-ƃelai kùla maa kɛ̂ gbɔŋ ŋɛ́i-tuɛ dímɛni nyɔ́mɔ-ŋai dí gɛ̀i mɛni ma.

²⁷ A gɛ̀ tí kpɛ́ni fêi, dí dípôlu tɔ̀ɔ mà, dífa díwoli tɔ̀ɔ m̀ɛnii mâ è mò dîa a gɛɛ dí gɛ́i.

²⁸ Da tua nyɔ̂ŋ kɛ̀ a gôlo-ƃelai. Da díkɛ̀ díkɛ wɔ̀lɔ Ɣâla ma a gɛɛ é kpɔ́ŋ dîa. Ǹyaŋ a díwɔlɔ-woo mɛni é kpɔ́ŋ dîa.

²⁹ “À kɛ̀ Ɣâla káa víi tɔ̂ɔi, gbɛ̂ɛ ƃa pɔ̂ri gɛ̂i é ǹíi maa fáleŋ? Maa-nuu fé mà. À kɛ̀ a ŋ̀ɛ́i lòo, màa-nuu fé mà é gáa.

³⁰ Ɣâla fa ǹúu-pɛlɛ-ƃelai da sìɣe dísama é gɛ́ a núu láa-tuɛ-nuu dílɔii mɛi va lâa pɛlɛ la dímɛi.

³¹ “Núu da a tá wɔ́lɔ mó Ɣâla ma ǹyɛɛ, ‘Ńgaa a sɔnyɔ̂ŋ nuu kɛ́lɛ ŋa pâi kperâi sɔnyɔ̂ŋ kɛ̂i?

³² Berei lɛ́ ḿâ nyii ŋá sɔnyɔ̂ŋ kɛ̀ la ńdɛ̂i-perei. À kɛ̀ ŋá sɔnyɔ̂ŋ kɛ̀, ḿve ŋɔ́nɔ pâi da kɛ̂i.’

³³ Tãi ífe fáa ní la m̀ɛnii mâ nyii Ɣâla è gɛ̀i, ya ŋ̀wɛ̂lii Ɣâla é mɛnii kɛ́ ya ŋ̀wɛ̂lii? Yá ƃé ya pɔ̂ri m̀ɛnii ŋí su tôoi, ńyãa fêi. M̀ɛni ma ye mɛnii ƃó ḿâ nyii í gɔ́lɔŋ.

³⁴ “Ǹûai nyii-ŋai dítareɛ̂ɛi, nyii-ŋai da tûa a zãa díkɛ díwoli tɔ̀ɔ ḿâi, da mò dîyɛɛi,

³⁵ ‘Zôo fé táre lôno tɔnɔ kpîŋ kɛ̂i.’

³⁶ Fɛ̂ɛ dí pá a Zôo m̀ɛni-sâa ƃó-kerei mu dí ŋɔmɛnii su káa a ǹɛ́lɛɛ é lɛ́ɛ la zu é seri gɔ̃yɛŋ ma, kpɛ́ni fêi, a lônoi yɛ̂ɛ mɛni nyɔ́mɔɔ kɛ́-nuu.

³⁷ È sɔnyɔ̂ŋ kɛ̀, é tela bôlu tɔ̀ɔ Ɣâla mà, gɛ́ ɣɛ́lɛ-maa kùla Ɣâla kponôi.”