Zôo 33 - Bible

¹ “M̀ɛni ma Zôo, íwoli tɔ́ɔ ŋ́oo ma. Íwoli tɔ́ɔ m̀ɛnii ma ŋa môi yâi.

² Ŋâa nâa ŋ́gbîŋ kpɛtɛ a gɛɛ ŋá lóno íkpɔ é kúla ńii su.

³ Ŋa pâi ŋámɛnii ƃôi teniŋ ƃô-pere su é kúla ńii su.

⁴ Ŋ̀wála-wâla kélee Ɣalai è ŋ́gbɛ̀tɛ, é fúlu-laa pú ŋ́gbônoi.

⁵ “Zôo, íkpîŋ maa kɔ̃ɔ ŋaŋ à kɛ̀ ya pɔ̂ri. Ye tɔɔ ŋ́ɛi-tuɛ í ímɛni-ŋai kélee ƃó.

⁶ Ye gáa, kwaa yá kúkaa nɔ́ tɔnɔɔ. Ɣâla è kúfeerɛ kúkpɛ̀tɛ a pɔ̂rɔ.

⁷ M̀ɛni ma, ífe yào ḿâ, kpaa máŋ í gáa yɛ̂ɛ sɛŋ ƃé ŋa pâi ímɔ̃lɛi.

⁸ “Íwoo káa nîi ŋ́wôlii kpɛ́ni fêi, mɛ̀ni tɔnɔ nɔ́ ƃé í mò yɛ̂ɛi,

⁹ ‘Ḿaa wâai ḿve niî mɛni nyɔ́mɔɔ da kɛ́ ní. Ḿve niî mɛni nyɔ́mɔɔ sii kélee da kɛ́ ní ŋákɛ̀-ɣeniɛi su.

¹⁰ Ɣâla káa nɔ́ ḿaa mɛ̂ni kɔ̂rii a gɛɛ é ḿɔ̃lɛ. A ŋ́gâai nɔ́ yɛɛ gbɔara-nuu.

¹¹ A ŋ́gɔɔ tóo kpɔnɔ ŋá gɛ́ ŋ́gɛ mɛni kélee kpɔ́ maa kpɛ̂ɛ.’

¹² “Zôo, ŋa môi yâ a gɛɛ m̀ɛni-ŋai ya môi íwɔ̂i fé lɛ́lɛ ní. Ɣâla maa pɔlɔ-pɔlɔɔi a gɛɛ da núu-kpune dí mɛni su kula.

¹³ Lé mɛni ƃé ya Ɣâla sɔŋ siɣêi la íkɛ mò yɛ̂ɛ, ‘Ŋá Ɣâla sɔŋ sîɣe kpɛ́ni fêi vé maa kɔ̃ɔ̂i m̀ɛnii ŋí sui?’

¹⁴ Ɣâla a mɛni da ƃó, é ŋɔ́nɔ m̀ó pôlu, ǹyaŋ núu da fa zìɣe a mɛni kpanaŋɔɔ.

¹⁵ Tãi núu a kɛ̂ nyiî la a kpíni gɛ́ see ƃôi, Ɣâla a gɛ̀ é zĩ̂a káa.

¹⁶ A gɛ̀ ǹûai dí díwoli tɔ́ɔ mà. A dí maa yâo a ŋɔlia-wooi.

¹⁷ A nyíŋi kɛ̀ a gɛɛ díkpera dísɔnyɔ̂ŋ mâ, dífe kɛ̀ ŋɛi-tɛ kɛ̂i.

¹⁸ Da kɛ̀ pâi saâi, a díƃalo, va ǹɛɛ naa dí su é kara.

¹⁹ Ɣâla a kɔlɔ-fela tɛ̀ɛ a núu kula maa kɛ́ sɛŋ, é gbono láa fɛ́ɛ a sɛŋ sôli maa.

²⁰ Mii-sɛŋ fa ŋɔ́nɔ kɛ̀ a nɛ̃ɛ ǹá. M̀ii-sɛŋ nyii ǹɛ́lɛɛi a nîai, m̀ɛlɛ fa ŋɔ́nɔ kɛ̀ goi.

²¹ Ǹyaŋ a kpâla kpɔ́ é lɛ́ɛ a gáo. Gɔlɔ da gáo nɔ́ ƃé núu a kɛ̂ gâai.

²² Saa a nâa lɛ̀ɣɛ la, gɛ́ nâa lɛ̀ɣɛ a m̀olôŋ.

²³ “Kɛ́lɛ Ɣâla ŋɔkéla wála támaai dɔnɔ a pâ a gɛɛ é kpɔŋ mâ tɛɛ bɔ́ é déniŋ tɔ́ɔ.

²⁴ Gɔlɔ-fela nuui malôŋ è ŋ̀âla-taa kelai sôŋ. Nya ƃe è mò Ɣâla ma ǹyɛɛ, ‘Ífe nɛ̀ɛ naa é lí dɔ̃yâ kana-pere. Kpɛ́ni fêi ŋâa ŋuŋ ma ƃó-pere sɔlɔ ƃó.

²⁵ Tɔɔ gɔlɔ é ŋɔ́nɔ kɛ́ ma nɛ̃ɛ-nɛ̃ɛ yɛ̂ɛ surɔŋ-loo, yɛ̂ɛ berei è wɔ́lɔ kɛ̀ la a ǹaɣa tãi.’

²⁶ À kɛ̀ gɔlɔ-fela-nuui a Ɣâla fɛ̀li, Ɣâla a pâi ŋ̀wóli tɔɔ̂i ma. Gɛ̀ ní a pâi Ɣâla fɛlîi a liî-nɛ̃ɛ-pere. Kpɛ́ni fêi Ɣâla a gula saa yêei.

²⁷ Nyíŋi à kɛ̀, a pâi kɛ̂i môi gîe mɛi núu-kpune kélee ŋɛ́i-tuɛ ǹyɛɛi, ‘Ḿve mɛni lɛ́lɛɛ kɛ́ ní. Ŋá dɔ̃yâ-perei lɛ̂ɛ. Kɛ́lɛ Ɣâla fé ŋ́gula maa kɛ́ ní yɛ̂ɛ berei maa-nɛ̃ɛi é gɛ́ la a ńyãai.

²⁸ Vé fáa ní ma a gɛɛ ŋá lí dɔ̃yâ kanai. Ŋ́gaa nîi ɣele ma.’

²⁹ “Ɣâla a m̀ɛnii ŋí kɛ́ gîe mɛi a dámaa,

³⁰ a gɛɛ é gula saa yêei é pá la kwaa ponoɔɔ su, a gɛɛ é fúlu-laa tɛɛ bɔ́.

³¹ “Zôo, íwoli tɔ́ɔ ḿâ. Ímɛi sáa kpɛ́ni fêi ŋâa pá lônoi.

³² À kɛ̀ mɛni da káa íla, ye mó ŋaŋ ŋá mɛni. Ŋ́oli tɔɔ̂i a gɛɛ ŋá ímɛnii ŋá tée a ǹɛ́lɛɛ.

³³ À kɛ̀ mɛni da fé íla, gɛ̀ ní ímɛi sáa í íwoli tɔ́ɔ ḿâ ŋa pâi sɛŋ lɛ̂i yâ é ítare tɔɔ.”