Zôo 3 - Bible

Zôo è wɔ̀lɔ Ɣâla ma

¹ Naa kɛ́ɛ tíi, Zôo è nâa pɛ̀lɛ lónoɔɔ ma, gɛ́ m̀aa sɔlɔ-ƃo foloi náɣaŋ-laa.

² È mò ǹyɛɛi,

³ “Óo Ɣâla, ye gbínii díwɔlɔ maa kôo sìɣe lai náɣaŋ láa. Ívoloi náɣaŋ láa nyii díwɔlɔ maa sɔlɔ-ƃo lai.

⁴ Óo Ɣâla, vóloi tí díwɔlɔ maa sɔlɔ ƃô lai é pene a kpíni. Ífe ŋɔ́nɔ kpàaŋ m̀ɛni ma a dɔnɔ kpîŋ. Ífe ŋɔ́nɔ nɛ̀ɛ naa kwaa pɔnɔɔɔ é pîlaŋ mà.

⁵ Tɔɔ kpíni maa-pɔlɔɔ-pɔlɔɔ é tóo màa ɣêlei tí ma. M̀ɛi pɛ́lɛ a ŋ̀ele-kɔlɔŋ-kɔlei, vólo-kaoi kúla ŋ̀elei kpîŋ mà.

⁶ Ye gbínii ŋí láa kúla góraŋ su núu da fé ŋɔ́nɔ lòno é pîlaŋ ma.

⁷ Ífe ŋɔ́nɔ nɛ̀ɛ naa nɛnî da é koo síɣe a gbínii tí díwɔlɔ ḿaa kôo sìɣe lai. Núu da fé ŋɔ́nɔ lii-nɛ̃ɛ kùla a gbínii kpîŋ.

⁸ Tɔɔ dia-ŋai da fólo náɣaŋ làai dí vóloi kpîŋ náɣaŋ láa. Tɔɔ diai da lôno yúo-zele-kali pɔ́i dílono bɔ́ é vóloi kpîŋ kpele.

⁹ Tɔɔ ɣele-ƃɔi pɛmɛlɛŋ-kao fé fòlo a gbínii dí ḿaa kôo sìɣe lai ŋɔɣele ƃɔ̂i tãi. Tɔɔ gbínii é kɛ́ nɔ́ a dóɔɔ ɣele fé ŋɔ́nɔ ƃɔ̀.

¹⁰ É kɛ́ tí kpɛ́ni fêi gbínii tí ƃé dí maa kôo sìɣe la, é nɛ̀ɛ naa ŋ́gɛ mɛni kpɔ̂lu kɛ́ɛ ŋí kàa.

¹¹ “Eêi kɛ̀ a ǹɛ́lɛɛ mɛni nyɔ́mɔɔ é ńee kɛ́, kpaa máŋ ŋá ńɛ̂wo gbɛɛ-ŋai tóo a tãi ńee maa è fùloŋ lai.

¹² Lé ƃé kɛ̀ ńee kɛ́ ŋ́gbèɣaŋ gɔ́ɔ mɛi? Lé mɛni ƃé è ŋíni tòo la ńai?

¹³ Eêi kɛ̀ ŋ́âi sàa, gɛ̀ ní ŋ́gaa laâ-ni mî fii tɔ̂ɔ su saa táa,

¹⁴ kwa gâloŋ-ŋai da dítii kɛ́-ƃelai kɛ̀ ǹɔii mai, nyii-ŋai wɔ́lɔ dítaa pîleŋ-ŋai tɔ̂ɔ díkpîŋ mɛni mai,

¹⁵ kpaa máŋ kwa gâloŋ pɛlɛ-pɛlɛ-ŋai, nyii-ŋai dípɛrɛ-ŋai láa fɛ̂ɛi a tɔɔ-sãai.

¹⁶ Èei pɔ̂ri kɛ̂i a ǹɛ́lɛɛ èei kɛ̀ dí ńoo yɛ̂ɛ lôloŋ nyii sàa dí lɛ́ɛ pâi dɛ̂i taai, yɛ̂ɛ lôloŋ nyii vé wɔ́lɔ kwaa ponoɔɔ káa nii.

¹⁷ Ƃolôŋ su ƃe ŋwana-lɔ̂ɔ-ƃela da kpera naa díŋwana-lɔɔi ma, nàa ƃé diai tíi-kɛɛ a dífii kpɛ̀ɛi da dífii tɔ̀ɔ naa,

¹⁸ ƃɛ́i diai dí dísòŋ kɔ́ sui díkɛ dí mɔ̃lɛi da pâi lii-see sɔlɔ ƃôi naa, dímɛi-ƃelai dífa ŋɔ́nɔ lâɣi dîa.

¹⁹ Ǹûa kpaya-kpayai da ǹîa-pɛlɛ-ŋai díkelee dí pɔ̂riɛɛi, ǹuɛ-ŋai da ŋuŋ-maa ƃô sɔlɔ ƃó. Dífe ŋɔ́nɔ dí mɛi-ƃelai yée mu.

²⁰ “Lé mɛni ƃé Ɣâla a nɛ̀ɛ la naa nûa díkɛ mɔ̃lɛ, gɛ́ kwaa ponoɔɔ tɛ̀ɛ diai pɔ́ díkaa nɔ́ ɣele ma díkɛ mɔ̃lɛi?

²¹ Díkaa a ǹûai nyii ŋ̀wɛ̂lii dí sáa kɛ́lɛ saa fa pâ dípɔ̀. M̀ɛni ƃé díkaa saa kɔ̂ri là yɛ̂ɛ núu ƃé tɔɔ-sãa kɔ̂rii.

²² Dífa lii-nɛ̃ɛ kùla é lɛ́ɛ la zu dí sáa dí díloo.

²³ Lé mɛni ƃé Ɣâla a ŋ́gɛ la ŋ̀éniɛi su ḿaa tínaŋɔɔ a siɣãŋ fa berei kâai?

²⁴ Ŋa ńaa miî maloŋ-too maa su, ŋ́gɛ nyiɣɛ nɔ́ gɔ́yɛŋ fé ma.

²⁵ M̀ɛni-ŋai ŋa yao dîai, dia nɔ́ ƃé da ŋ́gɛ̂, ŋuŋ kpɔ́-kpɔɔi ƃa nyii-ŋai ŋa yào dîa a ŋa-ŋanaai.

²⁶ Lii-see kélee kpaa máŋ fii-tɔɔ tɔnɔ kpîŋ fé ḿâ, kɛ́lɛ ŋá mɛni-kpɔlui su káa nɔ́ kɛ̂tɛi.”