Zôo 27 - Bible

Zôo è gbîŋ maa sere-faa kɛ̀

¹ Nya ƃe Zôo è ŋɔ́nɔ pɛ̀lɛ lônoi ǹyɛɛi,

² “Ɣâla fé tûa-ni a ńyãa a ǹɛ́lɛɛ. Ŋ̀wála-wâla kélee Ɣalai a ǹíi ŋwána.

³ Tãi nɔ́ Ɣâla aâ ńɛ̂wo loŋ lɛɛ ńyêei, fúlu-laa loŋ kɛ́ ƃò niî ńyêei,

⁴ Ɣâla fé ḿvɛli-woo mɛni, ḿve pâi lɛ́ɛ kɛ̂i, kpaa máŋ ŋá núu da pɛlɛ.

⁵ È folôŋ kpɔ́ ḿâ, ḿve pâi fâai ma a gɛɛ ka tɔ̃yâ mɛni ƃô. Ḿve pâi wɔ́lɔ fâai ma a gɛɛ ŋá mɛni nyɔ́mɔ da kɛ̀.

⁶ Ŋá gɔ́lɔŋ a gɛɛ ŋa teniŋ ƃô tua kɛ̂i. Ḿve pâi teêi mà. Ńii fé nîi mó ní ḿâ a gɛɛ ŋâa mɛni nyɔ́mɔɔ kɛ́ ŋákɛ-ɣeniɛi su.

⁷ “Tɔɔ Ɣâla é ŋ́gbɔara-ƃelai kula maa kɛ́ yɛ̂ɛ berei a ŋ̀wana-lɔ̂ɔ-ƃelai kula maa kɛ̂ lai. Tɔɔ diai kélee dítɔɔ̂i ḿâi Ɣâla é díkula maa kɛ́ yɛ̂ɛ diai dífe a teniŋ-ƃo-ƃelai.

⁸ Kili-kɛ-zu kɛ́ɛ léŋ ƃé gáa ǹúui nyii ve Ɣâla mɛni kɔ́lɔŋ yêei à kɛ̀ Ɣâla a ŋɔfúlu-laai sîɣe?

⁹ À kɛ̀ mɛni kpɔ̂lu su gɛ̀ Ɣâla fɛ̀li kpɔŋ-maa mɛni ma, Ɣâla a pâi ŋ̀óo mɛnîi?

¹⁰ Dîi pɔ̀ri Ŋ̀wála-wâla kélee Ɣalai ŋɔlii sêei kɔ̂rii. Dîi pɔ̀ri kɛ̂i Ɣâla fɛlîi a ɣele kélee.

¹¹ “Ŋa pâi Ɣâla ŋɔwála-wala-laai lɛ̂i kâa. Ŋa pâi Ɣâla ŋɔmɛni kpɛtɛɛ-ŋai lɛ̂i kâa.

¹² Kákelee kpɔ́ ka m̀ɛni-ŋai ŋí ŋá káa a ǹɛ́lɛɛ. Lé mɛni ƃé ka lônoi la a ƃoo-perei?

¹³ “Beri sîi ŋí ƃé Ŋ̀wála-wâla kélee Ɣalai a pâi ŋ̀wana-lɔ̂ɔ-ƃelai da diai da núu mɔ̃lɛi díkula maa kɛ̂i la.

¹⁴ À kɛ̀ ǹônii da kɛ̀ a dí támaa, da pâi lɛɛ̂i kɔ́ su, kpaa má puru é dípaa.

¹⁵ Dínîa-pɛlɛɛ nyii-ŋai dífe pâi sâai kɔ́ sui, kɔlɔ-fela a pâi dípâai. Ǹyaŋ dípɔɔ-nɛyãai dífe pâi dísaa wɔ̂lɔ kɛ̂i.

¹⁶ A nɛ̃ɛ ma ŋ̀wana-lɔ̂ɔ-nuui é káne ŋáa tɛ́ gîe mà yɛ̂ɛ ŋãya, é seɣe ŋáa tɛ́ ma gîe mà yɛ̂ɛ sĩi,

¹⁷ vé pâi lɛɛ̂i ɣele ma a gɛɛ é zeɣei tóo gɔŋ ma, gánei é lɛ́ɛ ǹyêei kɛ́lɛ sɔŋ lɛ̂lɛ-nuu ƃé pâi gánei siɣêi é zeɣei tóo gɔŋ ma.

¹⁸ Ŋɔpɛ́rɛi nyii a dɔ̀ɔi a kɛ̂ nɔ́ yɛ̂ɛ ŋɔni-taa, va tûa. À kɛ̂ nɔ́ yɛ̂ɛ kpanâŋ sàa nyii ŋɔni-kpɛ nia-pɛlɛɛ-ŋa da kɛ̂ mù díkɛ vóloi maa kpɛ̂ŋ.

¹⁹ À kɛ̂ a tɔɔ-nuu gɛ́ lì lâai. Kɛ́lɛ tãi a ŋ̀ɛ́i láa ƃò lai, va ŋɔ́nɔ ŋɔtɔɔ-sãai da kàa.

²⁰ Yao a ǹyée mɛi ɣâle yɛ̂ɛ ya fɛ̂ɛ kɛ́tɛ, fãa kɛ́tɛ é tɛ́ɛ la.

²¹ Vãai nyii a kûla vóloi-ƃelai perei, a pâi gulâi ŋɔpɛ́rɛi mu é tɛ́ɛ la.

²² Vãai ŋí a pâi vɛ̂ɛi kpɔ́ a ŋa ŋánaa. A kɔ kpɔ́ a ŋánaa a gɛɛ é kúla vãai ŋɔwála-wala-laai perei.

²³ A pâi kîrɛ siɣêi vãai kɛ́ gbɛ̀ zu-kara mɛ̂ni ma.