Zôo 22 - Bible

Dí zɛpɛ-wooi zaaƃai (22:1--27:23) Ɛlifa è lòno Zôo pɔ́ naa pôlu ŋɔ́nɔ

¹ Nàa kɛ́ɛ tíi, Tema naloŋ Ɛlifa è Zôo wóo su tòo ǹyɛɛi,

² “Zôo, ílâai la a gɛɛ táre-nuu ŋɔtárei káa Ɣâla ŋɛ́i a sɛŋ da?

³ À kɛ̀ íkaa a teniŋ ƃô-nuu, lé ƃé Ŋ̀wála-wâla kélee Ɣalai a pâi gulâi zui? À kɛ̀ ísɔŋ fé yâ, lé ƃé Ɣâla a pâi gulâi zu?

⁴ Ílaai la yɛ̂ɛ Ɣâla a ímɛnii ŋá têei gɛ́ í kula maa kɛ̂ kpɛ́ni fêi ƃa yâo ma íkɛ tíi kɛ̀ mì?

⁵ Kpao! Ɣâla a íkula maa kɛ̂i kpɛ́ni fêi, yaâ sɔnyɔ̂ŋ támaa kɛ́, ǹyaŋ ísɔnyɔ̂ŋ kɔ̃yaŋ fé ma.

⁶ Í mɛni nyɔ́mɔɔ kɛ̀ a sɛŋ-kao piliɛɛ ínûai dîa a kpa íkɛ dísãai kùla díyêei kpɛ́ni fêi dífa pɔ̂ri gbai têei. Íkɛ díseɣe-ŋai kùla dîa díkɛ lɛ̀ɛ a díkaŋ.

⁷ Ífe yá tɛɛ-ni ǹûai pɔ́ kpele wɛ̂li è kɛ̀ díkɛ̂i. Kpaa máŋ í mii-sɛŋ-loŋ tɛ̀ɛ diai pɔ́ puru è kɛ̀ díkɛ̂i a dɔnɔ kpîŋ.

⁸ Ya ǹûai dílɔii kúla díyêei a íwala-wala-laai.

⁹ Tãi bɔɔ-nɛyãai da ímarê kɛ̀ la sɛŋ da mɛni mai, ífa kpɔŋ mâa tɛ̀ɛ dípɔ. Yâ ípôlu tɔɔ dee-loŋ-ŋai dîa. Ífa kpɔŋ mâ da tɛ̀ɛ dípɔ.

¹⁰ Maa mɛni ma, mɛni-kpɔlu a tínaŋ yâ. Ǹyaŋ íkaa nâa yaôi a ŋánaa.

¹¹ Kpíni a too yâ ífa ŋɔ́nɔ kwaa kâa. Ǹyaŋ ya lɛɛ ǹyá fɛ̂ɛi su.

¹² “Ɣâla káa Ɣâla-taa ŋ̀elei su. Ye ŋ̀elei su káa í gáa berei bɛ́mɛlɛŋ-kao-ŋai díkaa la kwaa kôya mai.

¹³ M̀ɛni ma, ya môi yɛ̂ɛ, ‘Ɣâla fa pɔ̂ri m̀ɛnii kɔ́lɔnîi gáa kɛ̂i. A pɔ̂ri núu-kpune ŋɔmɛnii ŋá têei léŋ à kɛ̀ ŋ̀ele-kɔlɔŋ su kpíniɛi a ǹoo?’

¹⁴ Gáa íkili-ŋai a gɛɛ ŋ̀ele-kɔlɔŋ su kpiniɛi a ǹoo va pɔ̂ri sɛŋ da kélee kâai, gɛ́ sìa ŋ̀ele-kɔlɔŋ da ŋ̀ele-kɔlɔŋ kolei dí loai.

¹⁵ “Ya gbɛ̀tɛ íkili-ŋa a gɛɛ í íkɛ-ɣeniɛi kɛ́ yɛ̂ɛ berei ŋ̀wana-lɔ̂ɔ-ƃelai da gɛ̀ lai?

¹⁶ Ya fɛ̂ɛ kɛ́tɛ è tɛ̂ɛ a dia dí saa tãi é lɛ́ɛ pâi serîi.

¹⁷ Ǹûai tí dí mò Ɣâla ma dîyɛɛi, ‘Ye tée kûa kúkɛ kúkpîŋ yèe ma.’ Dílâai la Ŋ̀wála-wâla kélee Ɣalai fa pɔ̂ri mɛni ŋánaa kɛ̂i a dia.

¹⁸ É máŋ kɛ́ tí, Ɣâla a gɛ́ da sãâ támaa sɔlɔ ƃó. Kɛ́lɛ ḿva târe ŋ̀wana-lɔ̂ɔ-ƃelai tûa-pere su.

¹⁹ Tãi Ɣâla a ŋ̀wana-lɔ̂ɔ-ƃelai kula maa kɛ̂ lai, deniŋ ƃô-ƃelai da kɛ̂ ɣɛ́lɛ-maa kulâi díkponôi.

²⁰ Tɔ̃yâ ma Ɣâla a díkɔ̃liŋ kélee síɣe, ǹyaŋ díkɔ̃liŋ nyii a lɛɛ pôlui, ŋɔŋ a gélee kèreŋ.

²¹ “Ka Ɣâla ka káloai kpɛtɛ laoi laa é kɛ́ káloai. À kɛ̀ tí, Ɣâla a pâi gɛ̂i ílii é nɛ̃ɛ.

²² Íwoli tɔ́ɔ Ɣâla ŋɔsɛŋ-lɛɛi ma. Í ŋ̀óo lâai kɛ́ ílii su.

²³ À kɛ̀ ya pâi lâai a Ŋ̀wála-wâla kélee Ɣalai, a pâi ítɔ̂ɔi ítɔɔ̂i pɔlɔi ma. À kɛ̀ ya sɔnyɔ̂ŋ kɛ̂i, ípôlu tɔɔ ma í mɛni sãa kɛ́. Gɛ̀ ní mɛni sãa a pâi kɛ̂i ípɛrɛi mu.

²⁴ Ye ígôo-ŋai kélee píli, í ígôo lɛ́lɛɛ-ŋai píli gɔni-ŋai sáma ǹya kpâlai su.

²⁵ Tɔɔ Ŋ̀wála-wâla kélee Ɣalai é kɛ́ a ígôoi. Tɔɔ é kɛ́ yɛ̂ɛ káne ƃé da ŋaa tɛ́ gîe ma.

²⁶ À kɛ̀ tí, Ŋ̀wála-wâla kélee Ɣalai a pâi kɛ̂i a íkili tɔɔ-maai. A pâi ílii-nɛ̃ɛi su kɛ̂tɛi.

²⁷ Ya Ɣâla fɛ̀li, a pâi íwoo mɛnîi, ǹyaŋ ya pâi íkono têei ŋa-see kɛ̂i nyii í gɛ̀ mìi.

²⁸ M̀ɛnii nyii kélee ya pâi gbɛtɛ̂i a gɛɛ í gɛ́i ŋ̀á a pâi kulâi ma. Ƃɛ́i kélee kpɔ́ ya pâi siâi naai, nàa a pâi kɛ̂i a bonoɔɔ.

²⁹ Ɣâla a pâi zu-mɛni kɛ̂tɛ-ƃelai maa yenîi, é diai maa tɛ́ da dí maa yêŋ ŋ̀ɛi-tuɛi.

³⁰ A pâi íŋuŋ maa ƃôi à kɛ̀ ísɔŋ fé yâ íkɛ teniŋ ƃô mɛni kɛ̀.”