Zôo 20 - Bible

Zofa è lòno a tãi veerɛ ɣelei

¹ Nya ƃe Naama-nuui Zofa è Zôo wóo su tòo ǹyɛɛi,

² “M̀ɛnii ya môi, aâ ńii tóo pôlu. M̀ɛni ma tɔɔ ŋá íwoo su too.

³ Tãi íkɛ̀ lônoi lai, ínàraŋ. Mɛni ma ŋa pâi íwoo su toôi.

⁴ “Ífe nîi gɔ́lɔni é síɣe tãi ma Ɣâla è núu-kpune kpɛ̀tɛ la é bú ǹɔii ma ƃɛ́i,

⁵ zɔnyɔ̂ŋ-ƃelai dílii-nɛ̃ɛi káa nɔ́ a tãi kpua? Tɔ̃yâ ma, diai Ɣâla kíli fa lɛ̂ɛ dí ŋái dílii-nɛ̃ɛi káa nɔ́ tãi kpua yée mu.

⁶ É máŋ kɛ́ a mù siɣɛ́ɛ dôŋ kɛ́ sèri Ɣâla-taa, kpaa máŋ dɔɔ-mɛi kɛ́ ƃò yɛ̂ɛ ŋ̀ele-kɔlɔŋ,

⁷ vãai a pâi tɛɛ̂i la yɛ̂ɛ muluŋ. Diai kɛ̀ a gɔlɔŋɔɔi da pâi kɛ̂i díkili ŋá siâi mí ƃé a lí naai.

⁸ Ŋ̀wana-lɔ̂ɔ-nuui a pâi tɛɛ̂i nɔ́ yɛ̂ɛ núu a sèe ƃô nyii gíli fé lɛɛ ní ŋái. A pâi tɛɛ̂i nɔ̂ yɛ̂ɛ zĩ̂a a tɛ̀ɛ a núu.

⁹ Diai kɛ̀ a gɔ́lɔŋɔɔi da dîa-ni díkɛ ƃò kwaa tɔnɔ mai, dí fé pâi ŋɔ́nɔ wɔ́lɔ gâai.

¹⁰ Ŋ̀wana-lɔ̂ɔ-nuui ǹônii da pâi zãai kélee dínâŋ è gùla gôlo-ƃelai yêei bɔɔ-ŋa tôo tɛɛ̂i dípɔ.

¹¹ Berei máŋ gáa la a nyáŋkpa gbonôi kpanaŋɔɔi, a pâi sâai dí nòo.

¹² “Ŋwana-lɔ̂ɔ nɛ̃ɛ̂i ŋ̀wana-lɔ̂ɔ-nuui lá. M̀ɛni ma a ŋwana-lɔ̂ɔ líyeŋ lɔ́ ǹɛ́ŋ mu,

¹³ gɛ́ ƃò naa a tãi su kôyaa ŋ̀aa-nɛɛ kula mɛni ma.

¹⁴ Ǹyaŋ é máŋ ŋ̀wana-lɔ̂ɔ líyeŋ kpéle é yéŋ goi, a kɛ̂ yɛ̂ɛ núu a kali ŋwâna kpèle.

¹⁵ Gáa a wôya-nuu, a ǹûai kɔ̃liŋ kùla díyêei, kɛ́lɛ va pɔ̂ri m̀ɛi kâai. Ɣâla a ǹûai kɔ̃liŋ kùla ǹyêei.

¹⁶ Zɛŋ nyii è kɛ̀ gbelêi gáa a ŋ̀ale-maa. Ǹyaŋ a pâi baâi yɛ̂ɛ kali ŋwâna.

¹⁷ Ŋwana-lɔ̂ɔ-nuu fé pâi lɛɛ̂i ɣele ma a gɛɛ é kɔ̃́iŋ-wulɔ da niŋa ŋini-ya káa gɛ́ ɣìliŋ yɛ̂ ya-lee a gɛɛ é ŋ̀aa-nɛ̃ɛ kula.

¹⁸ Fɛ̂ɛ é zãai kélee è zɔlɔ ƃôi pɔɔ-ŋa tôo tɛɛ. A pâi zɔlɔ-ƃo sãai kélee è gɔ̀rii tɛɛ̂i pôlu. Vé pâi ŋɔsãai kélee da ŋaa-nɛ̃ɛ kulâi.

¹⁹ Zu kulâi ƃa vé niî mɛni da kɛ́ ní a gɛɛ é kpɔŋ mâ tɛɛ gôlo-ƃelai pɔ. A ǹûai dípɛrɛ-ŋai kùla díyêei.

²⁰ M̀ii-sɛŋ wɛliɛɛi, ǹíi fa lâa.

²¹ A ǹáa mìi, da fa lɛ̂ɛ. M̀ɛni ma, ŋɔtɔɔ-laai su fé pâi kôyai.

²² A nɛ̃ɛ ma é dɔɔ-sãai kélee sɔlɔ ƃó, lii-see fé pâi kɛ̂i ǹyêei. Ŋɔmɔ̃lɛ-laai su a pâi nɔ́ kɛ̂tɛi.

²³ Tɔɔ é ǹáa míi é píla! Ɣâla a pâi ǹíi ŋwânai kpɔ́ mà a ŋánaa é mɔ̃lɛ. Ɣâla ŋɔlii-ŋwanai a pâi kɛ̂i a ŋɔmii-sɛŋ.

²⁴ É máŋ pú a gɛɛ kɔkuluƃa fé bàa a kpála nyii dí gbɛ̀tɛ a kɔlii, da pâi baâi a ƃara sɔ̂la.

²⁵ Da pâi m̀óŋ-nii a sɔla é tɛ́ɛ ńii su é kúla bôlu-pere. Mɛni kpɔ̂lu a pâi lâai mà.

²⁶ Da pâi gɔ̃liŋ kélee kulâi ǹyêei dí dísu kara. Ŋɔŋ nyii núu-kpune fé doo nii, a pâi gérenîi, gɔ̃liŋ dɔnɔ kpîŋ fé pâi lɛɛ̂i ǹyêei.

²⁷ Ŋ̀ele-kɔlɔŋ a pâi ŋɔmɛni nyɔ́mɔɔi maa-sere-faa kɛ̂i. Ǹyaŋ ǹɔii a pâi ŋɔmɛnii ŋá têei yɛ̂ɛ mɛni-saa ƃó-nuu.

²⁸ Ya-fɛɛ a pâi tɛɛ̂i a ŋɔpɛ́rɛi a tãi Ɣâla a pâi zɔnyɔ̂ŋ-ƃelai dímɛnii ŋá têei la a lii-ŋwânai.

²⁹ Bere sîi ŋí ƃé Ɣâla a pâi zɔnyɔ̂ŋ-ƃelai dímɛnii ŋá têei la. M̀ɛni ŋá téɛɛ sii ŋí ƃé gáa Ɣâla yêei zɔnyɔ̂ŋ-nuui mɛni ma.”