Zôo 18 - Bible

Beeda è lòno Zôo pɔ́ ŋɔ́nɔ

¹ Gɛ́ɛ tíi, Sûa lɔii su nuui Beeda è zôo wóo su tòo ǹyɛɛi,

² “Lé tãi ƃé ya pâi í mɛi saâi lai? Í mɛi sáa a daloŋ, gɛ̀ ní kwa pâi lônoi ípɔ.

³ Lé mɛni ƃe ya kú kâai la yɛ̂ɛ fɛnɛ-sãai? Lé mɛni ƃé ya kú kâai la yɛ̂ɛ ƃoo-ƃelai?

⁴ Zôo, íkpɔɔi lii-ŋwanai ká ŋí ípaai. Ya ǹɛ̂i a gɛɛ ǹûai kélee dí dípôlu tɔ̀ɔ ǹɔii kélee ma kpɛ́ni fêi íkaa a teniŋ ƃô nuu? Ya ǹɛ̂i a gɛɛ Ɣâla è ǹyée kpaya-kpayai kélee tàa-taa a gɛɛ é ílii láa?

⁵ “Vúlu-laai nyii gáa ŋ̀wana-lɔ̂ɔ-ƃelai yêei a pâi niîŋ-nii nɔ́ yɛ̂ɛ ŋɔŋ-leŋ. Ǹyaŋ a pâi kɛ̂i nɔ́ yɛ̂ɛ ŋɔŋ a lìiŋ.

⁶ Ŋɔŋ a líiŋ ŋɔpɛ́rɛi mu. Ŋɔlâŋpoi kɛ̀ lénîi ŋuŋ mɛi a líiŋ.

⁷ Va ŋɔ́nɔ sìa a wála-wâla a gɛɛ va lâa too la. Ǹyaŋ ǹia-wooi ƃoi a dɛ̀ɛ núu da kpɛ́ni-ŋa pɔ́i, a zòŋ ǹyaa kpîŋ.

⁸ Gbɔ́ɔ-kpɔɔ kɔɔi a bìli ƃáre ŋá. A pîli puŋ su a tóo.

⁹ A pili ƃáre ŋá a zoŋ a gɔ́ɔ.

¹⁰ Da ƃáre tɛ̀ zia-perei su.

¹¹ “Maa yâo-sãa da tînaŋ m̀a díkɛ gbɛ̀ a gɛɛ dí zoŋ.

¹² Puru a gɛ̀ víi é kpɛ́ɛ. A gɔ́ɔ tùa kwaa ma nyɔ́mɔɔ-ŋa ma.

¹³ Núu-paa kɔlɔ-fela a gbono sóŋ nyii a gɛ́ ǹyée da gɔ́ɔ díkɛ́ lùla mai.

¹⁴ Da ŋ̀ála da gula ŋɔpɛ́rɛi mu ƃɛ́i è kɛ̀ naa ŋuŋ ma ƃô sui. Dí ŋ̀ala dí lí la mɛni kpɔ̂lu ŋɔkâloŋ ŋɛ́i-tuɛ.

¹⁵ Núu da kélee a pɔ̂ri kɛ̂i ŋɔpɛ́rɛi mu nyii è ǹɛɛ bôlui. Dí sɛŋ da kpɛ̂mɛŋ ŋɔpɛ́rɛi mu a gɛɛ nàa-ƃela dífe kɔ̀lɛ.

¹⁶ Gáa yɛ̂ɛ wúru ƃé zame a lûlai ǹɔii mu gɛ́ tòo ŋ̀owôi ŋ̀elêi pere.

¹⁷ Ǹûai kélee kpɔ́ ŋ̀éniɛi su da nia maa mɛni ma. Maa mɛni kíli fé ŋɔ́nɔ núu da ŋá.

¹⁸ Ɣâla a pâi duânii é gula ǹúu fulu-ŋai dílɔii su é doo zaa-ƃelai dílɔii su kpíniɛɛi su pere.

¹⁹ Ǹônii dɔnɔ kpîŋ fé pâi kɛ̂i naa é lɛ́ɛ bɔ́ɔ-ŋa ŋɔpɛ́rɛi mu.

²⁰ Zaa pere a pâi kɛ̂i a laa kpala-maa mɛni vóloi kûlai-pere da vóloi liî pere ƃelai dîa.

²¹ Tɔ̃yâ kpîŋ ma, ƃáre ƃé pâi ŋ̀wana-lɔ̂ɔ-ƃelai su karâi da diai nyii-ŋai dífe láa-ni a Ɣâlai.”