Zôo 16 - Bible

Zôo è Ɛlifa wóo su tòo

¹ Nya ƃe Zôo è ŋ̀oo su tòo,

² “Káfe ŋá mɛni kpɔ̂lui su saa-ni. Ka gɛ́ ńii é tóo pôlu a ŋánaa káfe kpɔnîi ḿâ. Ka gɛ̂i nɔ́ ŋ́gɛ mɔ̃lɛ a ŋánaa.

³ Ka pâi kɛ̂i nɔ́ lônoi kpɛ́ni-kpɛni káfa káfii tɔ̂ɔ? Lé ƃé lɛ̀ɣɛ yâ a gɛɛ í ŋ́oo su tooi?

⁴ Eêi kɛ̀ íkɛ ƃò tɔ̂ɔi ńdɔɔi, ńyãa máŋ ŋâi pɔ̂ri ŋ̀óo sîi tɔnɔi ŋí ƃôi yâ. Ŋ́gɛ ŋuŋ kpɛ̂mɛŋ a ɣɛlɛ-maa pere a yá.

⁵ Ŋ́âi pɔ̂ri ká lia-woo ƃôi a ńɛŋ-ŋa woo a gɛɛ ŋá kákponôi kpanaŋ. Ǹyaŋ ŋ̀óo-ŋai ŋâi kɛ̀ môi diî ká ŋá nɛnɛ dí kákula ká mɔ̃lɛ-laai su.

⁶ “É máŋ kɛ́ tí ńono-woo fa pɔ̂ri ŋá mɔ̃lɛ-laai su saâi. Ŋá máŋ kpîŋ ḿɛi sáa, ŋá mɔ̃lɛ-laai su fé pâi saâi.

⁷ Tɔ̃yâ ma, Ɣâla a ŋáwala-wala-laai kúla ńyêei. Ɣâla a ŋ́zuu kélee su kara.

⁸ Ɣâla a ńzoŋ kpɔ́ a ŋánaa. A ŋ́gbono milîŋ pú ma nyii-ŋai dísêre-wooi tɔɔ̂i mai. A ŋ́gɛ ŋa lɛɛ a ŋ́gao nyii ŋɔsêre wooi tɔɔ̂i ḿâi.

⁹ “A ḿvala-fala yɛ̂ɛ fɛnɛ-sɛŋ líi ŋwánaa gɛ́ ǹyíŋ pìlaŋ gîe ma yɛ̂ɛ sɛŋ ƃé a kɛ̀ a ŋ́gbɔara-nuu, gɛ́ ŋ́gàa a lii-ŋwana-pere.

¹⁰ Da díla tàɣa ḿâ yɛ̂ɛ lɔɔ-fɛnɛ sãa díkɛ ḿaa yâo. Dí ńokwa ŋ́goma ma díkɛ ɣɛ́lɛ-maa kùla ŋ́gbonôi. Dí díŋa tɛ̀ gîe ma a gɛɛ dípɛlɛ ḿâ.

¹¹ Ɣâla a ńdɛɛ ŋwana-lɔ̂ɔ-ƃela pɔ́, a ńdoo díyee ŋá.

¹² Tãi ńii è kɛ̀ a ǹáa lai, Ɣâla è pà é ńzoŋ kpɔ́ a ŋánaa é ŋ́gula naa. È ńzôŋ a ŋ́gɔna é ńdoo é ŋ́gao ɣále-ɣale. A gɛ́ díkɛ ŋ́gɔ̀ a kpoloŋ.

¹³ Gboloŋ kɔ́-ƃelai da tínaŋ ḿâ díkɛ ḿòŋ a dítɔ̃a-ŋai m̀ela kélee ma. È ḿòŋ a dɔ̃a-ŋai ŋ́goi kɔni-kao ma. Vé kpîŋ ŋ́ɛi malôŋ káa-ni, ŋ́goi-sãa kɛ́ pù ǹɔii ma.

¹⁴ È pìli ḿâ yɛ̂ɛ kɔ-kuluƃa, gɛ́ ŋwàna gîe mɛi.

¹⁵ Ŋá maloŋ-too maa-seɣe tòo ḿâ. Ɣâla a ńdoo muluŋ su.

¹⁶ “Ŋa lɛɛ wɔ̂lɔi ŋ́ɛi a fɛ́ɛ-fɛ̂ɛ. Ŋ́ɛi-gao a kpɔlu ḿva ŋɔ́nɔ kwaa kâa.

¹⁷ É máŋ kɛ́ tí, ḿve niî mɛni nyɔ́mɔɔ kélee da kɛ́ ní, ńyee maa waâi. Ŋa ƃaa kɛ́-maa tɛ̂ɛ Ɣâla pɔ́ ŋá Ɣâla fɛliɛɛi su.

¹⁸ “Ŋ́gaa yɛ̂ɛ núu nyii dí baai. M̀ɛni ma, núu da fé ḿbaa mɛnii lôo. Núu da fé ŋ́gbèra wɔ̂lɔi ŋá mɛnii su too mɛni ma a teniŋ ƃô-pere.

¹⁹ Ŋáserei káa Ɣâla-taa nyii pâi tɔɔ̂i ḿɛni ma. Tɔ̃yâ ma núu da káa naa nyii pâi ḿaa sêre-faa kɛ̂i a gɛɛ ŋá mɛnii é lɛ́lɛ.

²⁰ Ḿbarâi nyii-ŋai lônoi ḿaa mɛni mai da ɣɛ́lɛ-maa kulâi ŋ́gbonôi. Ŋa wɔ̂lɔi a gɛɛ Ɣâla é kpɔ́ŋ ḿâ.

²¹ Ŋa ŋ̀wɛ̂lii a gɛɛ ŋásêrei é lóno Ɣâla pɔ́ ḿaa mɛ̂ni ma. Ŋa ŋ̀wɛ̂lii núu da é lóno kúloai kwa Ɣâla yɛ̂ɛ à kɛ̀ lônoi ḿbarâŋ-nuu mɛni ma.

²² Ŋá kɛ̀-ɣeniɛi su fé ŋɔ́nɔ kôyaa ni. Ǹyaŋ ŋá máŋ lí, ḿve ŋɔ́nɔ pâi siâi ƃɛ́-pere.”