Zôo 13 - Bible

¹ M̀ɛni-ŋai nyii kélee ŋa môi, ŋa gélee káa a ŋ́gbîŋ ŋɛi-gao, ŋá mɛ̀ni a ŋ́gbîŋ woli, ǹyaŋ ŋá tàre zu.

² M̀ɛnii nyii kélee í gɔ́lɔŋ, ńyãa máŋ kpîŋ ŋá gɔ́lɔŋ. Berei ƃa mɛni ŋá kàa lai, vé tɛɛ-ni ḿâ.

³ Kɛ́lɛ ḿve lônoi ípɔ, ŋa ŋ̀wɛ̂lii ŋá mó Ŋ̀wála-wâla kélee Ɣalai mà a gɛɛ ńzɔŋ fé m̀ɛnii ŋí su a dɔnɔ kpîŋ.

⁴ M̀ɛnii nyii káfe gɔ́lɔŋ ka m̀ɛi pɛ̂lɛ a lɛ́ɛ, ká sále kɛ̀ nyii va núu da ƃàlo.

⁵ Eêi kɛ̀ kâi lɛ̀ɛ a ká mɛi sâa, eêi nɛ̀ a gɛɛ kátareɛ̂ɛi.

⁶ “Íwoli tɔ́ɔ ŋá mɛni su kula wooi ma. Ímɛi sáa í íwoli tɔ́ɔ ŋá mɛni-saa woo-ŋai dîa.

⁷ Káfe gàa yɛ̂ɛ sɛŋ ƃé ka kpɔnîi Ɣâla ma a lɛ́ɛ kɛ́ɛ da núu pɛlɛɛ.

⁸ Ka pâi mɛni lɛ́lɛɛ kɛ̂i Ɣâla mì a maa kɔ̃ɔ m̀ɛni sâa ƃó kerei mu?

⁹ Ɣâla a ká maa kpɛ̂ɛ, mɛni da fé pâi lɛ̂ɛi kâa? Kpaa ka pâi bɛlɛɛ̂i yɛ̂ɛ berei núu a nûa pɛ̀lɛ lai?

¹⁰ À kɛ̀ kákili-ŋa a gɛɛ ká mɛni lɛ́lɛɛ kɛ̂i Ɣâla mì loôi pere, a pâi kákula maa kɛ̂i.

¹¹ A pâi ká maa yaôi kpɛ́ni fêi maa-pɔlɔ-pɔlɔɔi ŋ̀wála-wala tela. Ka pâi yaôi kpɔ́ ká tíniŋ.

¹² Kásaŋ-woo-ŋai káa nɔ́ kpɛ́ni-kpɛni yɛ̂ɛ lúu. Ká maa-kɔ̃ɔ woo-ŋai káa nɔ́ yɛ̂ɛ ƃóo pɔrɔ.

¹³ “Í mɛi sáa í ǹɛɛ naa ŋá lóno. Ḿve nâa kpáaŋ-ni, lé ƃé pâi ŋ́gɛ̂ii.

¹⁴ Ŋ́âa ŋ́gbîŋ kpɛtɛ mɛni-sii kélee mɛni ma.

¹⁵ A nɛ̃ɛ ma Ɣâla é ḿbaa, lé ƃé gbáaŋ káa nâa ḿâi? É máŋ kpîŋ kɛ́ tí, ŋa pâi ŋá mɛnii ƃôi kpɔ́ mà ŋ̀ɛ́i téniŋ ma.

¹⁶ Ŋá máŋ tɔ́ɔ Ɣâla ŋɛ́i-tuɛ a pâi ǹɛ́i a gɛɛ ŋá mɛnii lɛ̂lɛɛi kpɛ́ni fêi, sɔnyɔ̂ŋ nuu fa pɔ̂ri tɔɔ̂i Ɣâla ŋɛ́i-tuɛ.

¹⁷ Íwoli tɔ́ɔ kpɔ́ a ǹɛ́lɛɛ í ŋámɛni su kula-wooi mɛ́ni a ǹɛ́lɛɛ.

¹⁸ Íwoli tɔ́ɔ kpɔ́ ḿâ a ǹɛ́lɛɛ kpɛ́ni fêi ŋâa nâa ŋámɛni-saai maa woo-su kula-wooi kpɛtɛ a gɛɛ ŋá mó yâ. Ŋá gɔ́lɔŋ Ɣâla a m̀ɛnii ŋá tèe vé pâi ńzɔŋ kâai zu.

¹⁹ “Ée Ɣâla, kwa yá ƃé pâi m̀ɛnii su kulâi? À kɛ̀ ŋámɛnii nyɔ̂mɔɔi, gɛ̀ ní ŋa pâi mɛi saâi ŋá sáa mî.

²⁰ Ɣâla, ŋa pâi pâi íŋɛi-tuɛ à kɛ̀ ya mɛni feerɛ kɛ̀ ḿîi.

²¹ Ye kpera mɛni kpɔ̂lu lâai ḿâ, íkpera maa yaôi.

²² Ɣâla, kɛ́ a maa-ŋuŋ ílono, gɛ̀ ní ŋa pâi íwoo su toôi. Kpaa máŋ nɛ̀ɛ naa ŋálono a maa-ŋuŋ a gɛɛ í ŋ́oo su too.

²³ Ye ǹɛ́ ḿâ tãi ɣɛɛlu ƃé ŋa mɛni nyɔ́mɔɔ kɛ̀ la a yai? Tãi ɣɛɛlu ƃé ŋá kùla la íperei mai? Ye bere-sii lɛ́ ḿâ ŋá íwoo pìli lai ŋ́gɛ mɛni nyɔ́mɔɔ kɛi.

²⁴ “Lé mɛni ƃé m̀ɛlɛ kpɛɛ̂i la íkoi a gɛɛ ŋii, íkɛ ńzìɣe a íkpɔara-nuui?

²⁵ Lé mɛni ƃé ya ḿaa yaôi la íkɛ ŋ́gɛ̀ yɛ̂ɛ láa-kpala ƃé a kùla wúru ma, íkɛ ŋ́gɛ̀ yɛ̂ɛ mɔlɔŋ kâla ƃé fãa a vɛɛi?

²⁶ M̀ɛni nyɔ́mɔɔ-ŋai ŋá gɛ̀i, ya maa mɛnii pɔ̃yɛ m̀ɛni-saa ƃó-ƃelai díkɔlɔi su. M̀ɛni ma ya gɛ́ ŋa mɔ̃lɛ ńôloŋ tãi sɔnyɔ̂ŋ-ŋai mɛni ma.

²⁷ Ya ŋ́gɔɔ lá ɣíri a gɛɛ ḿve ŋɔ́nɔ sìa. Íŋɛi káa nɔ́ ḿâ a ɣele kélee. Íkaa nɔ́ ḿɔrɔnîi maa kpɛɛ̂i muluŋ su.

²⁸ M̀ɛni ma, ŋá toôi a bɛlɛ-pɛlɛɛ yɛ̂ɛ wúru ƃé fili a mìi, yɛ̂ɛ seɣe ƃé ŋíliŋ a m̀ii.”