Zôo 12 - Bible

Zôo è Zofa wóo su tòo

¹ Nya ƃe Zôo è Zofa wóo su tòo ǹyɛɛi,

² “Tɔ̃yâ kpîŋ ma, káa ƃa ǹûai lá gbɔ̀. Óoei, káa nɔ́ ƃa dáre-ƃelai ɣénia. Kà sàa, táre nuu da fé pâi kɛ̂i ɣele ma

³ Kɛ́lɛ berei ka mɛni ŋá kàa lai, vé tɛɛ ní ḿâ. Kátarei fé tɛɛ ní ŋ́ɔ̂i ma. Mɛni-ŋai ŋí ka môi vé a núu da tɛ̂i mɛni.

⁴ Ǹúui nyii kélee a Ɣâla fɛ̀li gíli tɔ̂ɔ ma a gɛɛ é ŋ̀óo su tooi, m̀arâai da gɛ̀ nɔ́ a díɣɛlɛ maa sɛŋ, berei máŋ deniŋ ƃôɔɔi la, a Ɣâla fɛli gɛ́ ŋ̀óo mɛnii.

⁵ Diai mɛni da fé dípôlui da wɔ́lɔ kɛ́ nɔ́ ɣɛ́lɛ maa kulâi diai mɛni kpɔ̂lu sui díkponôi. Mɛni kpɔ̂lu a wɔ́lɔ láa nɔ́ diai mɔ̃lɛi dîa.

⁶ Ŋúma-ƃela da diai yao maa fé díyêei Ɣâla mɛni mai, díkaa lii-see su. Dí kíli tɔɔ̂i díkpîŋ wala-wala-laai ma a díɣâla.

⁷ “Ye daa-tulɛ-ŋai marê kɛ́ a gɛɛ dí íteniŋ tɔɔ. Ye ŋɔni-ŋai marê kɛ́ dí ítare Ɣâla maa mɛni su.

⁸ À wàla kɛ́ tí, dɔara-sãai maa kpɛ́ɛ í dítûa-perei káa é pɛ́lɛ ǹyɛ̃ɛ-ŋai nyii-ŋai díkaa ǹyá-ŋai sui dîa.

⁹ Núu da káa nîi naa nyii vé gɔ́lɔŋ a gɛɛ Yâwɛɛ yée pɔ̂ɔ káa m̀ɛnii ŋí su? Vé tí a dɔnɔ kpîŋ.

¹⁰ Sɛŋ nyii kélee gáa ɣele mai ŋɔfúlu-laai káa Ɣâla yêei, vúlu-laai nyii a gɛ̀ núu kɛ́ ƃò ɣele mai.

¹¹ À kɛ̀ núu a mɛni mɛ̂ni, va maa kpɛ̂ɛ é gáa à kɛ̀ gáa a tɔ̃yâ? Tɔ̃yâ ma bere ƃé a gɛ̀ la. Bere-sii tɔnɔi ŋí nɔ́ ƃé a mii-sɛŋ kɔɔŋ la é gáa à kɛ̀ ǹɛ́lɛɛi kpaa máŋ ǹyɔ̂mɔi.

¹² “Ǹúu-pɔlɔ-ŋai dí tɔ̃yâ da lɛ́ɛ loai kɔ́lɔŋ. Tãi da pɔ̂lɔ-lai, da târe m̀ɛni-ŋai su.

¹³ Táre da wála-wala-laa káa Ɣâla yêei. Mɛni kpɛtɛɛ da mɛni ŋákaa káa ǹyêei.

¹⁴ À kɛ̀ Ɣâla a sɛŋ da kàra, núu da fa ŋɔ́nɔ gbɛ̀tɛ naa pôlu ma. À kɛ̀ Ɣâla a núu sòŋ a luɛ, gbɛ̂ɛ ƃa pɔ̂ri maa-nuui tí maa têei? Maa nûu fé ma.

¹⁵ À kɛ̀ Ɣâla a wàla ǹɛɛ naa tuna é pú, ǹɔii a kpâla. À kɛ̀ a ǹɛɛ naa ǹyái é fɛ́ɛ, a zãai kélee su kàra.

¹⁶ “Pɔ̂ri káa Ɣâla mì a gɛɛ é ŋɔkpɔara-ƃelai su kara. Wála-wala-laa káa Ɣâla yêei diai mɛi dílaŋɔɔi da diai da gɛ̀ núu é láŋ.

¹⁷ A dáre-ƃelai su kɛ́ ǹyɔ̃ɔ, é gâloŋ-ŋai kíli-ŋa pú.

¹⁸ A gâloŋ-ŋai díkâloŋ seɣei kûla dîa, é dímaa ɣíri a luɛ-mâ sêɣe.

¹⁹ A zâla láa-soŋ-ƃelai díwala-wala-laai kùla díyêei, é núu mɛi-ƃelai díwala-wala-laai kpera.

²⁰ A gɛ́ diai ǹûai da díwoli tɔ̀ɔ dîai dí dímɛi sáa. É ǹúu-pɔlɔ-ŋai dí mɛni ŋá káa tarei kúla díyêei.

²¹ A Ɣɛ́lɛ maa kûla ǹúu mɛi-ƃelai kponôi, é ŋ̀wála-wala-ƃelai díwala-walai kúla díyêei.

²² A gɛ̀ gbínii é kúla saa-taa, é kwaa ponoɔɔ pîlaŋ gbíni maa-pɔlɔ-pɔlɔɔi su.

²³ Ɣâla a gɛ̀ núu-suu-ŋa tɔɔ̂i é kpanaŋ, é ŋɔ́nɔ gɛ́ dí kɛ́ a fii kpɛ̂ɛ-ƃela. À gɛ̀ díƃûu ƃó, é ŋɔ́nɔ gɛ́ díkôlo.

²⁴ Ɣâla a ǹúu láa-tuɛ-ƃelai kíli kúla díyêei, é gɛ́ díkɛ tɛ̀ nɔ́ díkɛ yèŋ dífe ƃɛ́i kɔ́lɔŋ da liî naai.

²⁵ À gɛ́ ǹúu láa-tuɛ-ƃelai díkɛ sìa tàka-taka, díkɛ díyee pɛ̀lɛ-pɛlɛ gbínii su yɛ̂ɛ lɔɔ-kpele-ƃela.”