Zôo 11 - Bible

Zofa è lòno Zôo pɔ́

¹ Zôo kɛ́ɛ a m̀ɛi sáai, Naama naloŋ Zofa è nâa pɛ̀lɛ lónoɔɔ ma:

² Zôo, núu nyii a lôno tí a ŋánaai, fɛ̂ɛ nɔ́ é ŋ̀óli tɔ́ɔ núu da ma. Í kpɔ́ɔi lonoi ŋí fa pɔ̂ri ǹɛ̂i a gɛɛ ífe niî mɛni nyɔ́mɔɔ kɛ́ ní.

³ Ǹóno-ŋai ya gɛ̀i, fa pɔ̂ri gɛ̂i ǹúui gbéli-ŋai dí dímɛi sáa. Ya ɣɛ́lɛ-maa kùla núu da kponôi, dífa í téniŋ tɔɔ? Tɔ̃yâ ma da pâi gɛ̂i tí.

⁴ Ya môi a gɛɛ m̀ɛnii ya môi nɔ́ ƃa dɔ̃yâi. Íkɛ mò yɛ̂ɛ ífe niî mɛni nyɔ́mɔɔ da kɛ́ ní Ɣâla ŋɛ́i-tuɛ.

⁵ Eêi kɛ̀ pere kɛ́ ƃò naa a gɛɛ Ɣâla nya kpîŋ é lóno ípɔ,

⁶ a gɛɛ é ŋɔkɛ́-perei maa loo mɛni-ŋai lɛ́ yâ, iî pâi gɔ̂lɔnii a gɛɛ Ɣâla ŋɔtárei fé nɔ́ m̀éla tɔnɔ ma. Maa nɛ̃ɛ̂i a gɛɛ í mɔ̃lɛ kpɔ́ a ŋánaa, kɛ́lɛ Ɣâla a ímaa nɛ̃ɛ a mɛni kpɔ̂lu loŋ nɔ́ láa yâ.

⁷ Ya pɔ̂ri târei Ɣâla kɛ́-mɛni maa pɔlɔ-pɔlɔɔ-ŋai su? Ya pɔ̂ri kpîŋ târei Ɣâla maa tɔ̃yâ da ŋɔtárei su?

⁸ Ɣâla ŋɔtárei kɛ̂tɛi é tɛ́ɛ ŋ̀elei su ŋɔkɛ́tɛi ma, ɣelêi-pere da saa-taa nyii gáa ǹɔii mu-perei. Ǹyaŋ ífe mɛni da kɔ́lɔŋ é pîlaŋ ma.

⁹ Ɣâla ŋɔtârei kɛ̂tɛi é tɛ́ɛ ǹɔii ŋɔkɛ́tɛi ma. Gɛ̂tɛi máŋ é tɛ́ɛ yúo ŋɔŋa kɛ̂tɛi ma.

¹⁰ À kɛ̀ Ɣâla a pà é núu da sòŋ é lí la m̀ɛni-sâa ƃó-nuui pɔ́, maa ǹúui kpîŋ fa pɔ̂ri mɛni da kɛ̂i a gɛɛ é Ɣâla kpera.

¹¹ Ɣâla è ǹûai kɔ́lɔŋ da núu pɛlɛi. Ɣâla a núu kâa sɔnyɔ̂ŋ kɛ̂i, va nîa maa-nuui tí ŋɔsɔnyɔ̂ŋ ma.

¹² Ƃoo-nuu tarêi kpanaŋɔ̂ɔi é tɛ́ɛ la lɔɔ-fɛnɛ-sɛŋ ŋáa kɔŋɔɔ ma.

¹³ Kɛ́lɛ Zôo, à kɛ̀ ya ípôlu tɔ̀ɔ ísɔnyɔ̂ŋ ma, í íyee tɛ́ ɣelêi í Ɣâla fɛli,

¹⁴ à kɛ̀ ya íyee kùla ísɔnyɔ̂ŋ su, í ǹɛɛ naa teniŋ-ƃo làa é kɛ́ ípɛrɛi mu,

¹⁵ tɔ̃yâ ma gɛ̀ ní ŋumɛ fé pâi kɛ̂i yâ íkɛ ɣéniɛi su. Ya pâi kɛ̂i a ítɔɔ̂i kpanaŋɔɔ. Sɛŋ-da fé pâi ímaa yaôi.

¹⁶ Ya pâi nîai í mɛni kpɔ̂lui ma yɛ̂ɛ berei yá a fɛ̀ɛ, à yèŋ, nûa da nîa la m̀ɛni mai.

¹⁷ Vólo-leŋ a pâi pîlanii íkɛ̀-ɣeniɛi ma yɛ̂ɛ fólo tɛ́ɛ ŋuŋ ma fòlo. Ǹyaŋ m̀ɛni-kpɔ̂luɔɔi nyii gáa íkɛ̀ ɣéniɛi sui, maa a pâi fâlenii yɛ̂ɛ kpíni a pène a ɣele-ƃɔɔ.

¹⁸ Yao da kélee fé pâi kɛ̂i ŋɔ́nɔ íkɛ̀-ɣeniɛi su, kili-kɛ-zu a pâi kɛ̂i íyêei. Ɣâla a pâi ímaa kɔ̃ɔ̂i ífe pâi yaôi. Ya pâi ífii tɔɔ̂i.

¹⁹ Sɛŋ-da fé pâi ímaa yaôi. Núu támaa a pâi é ǹyée sée íŋɛi.

²⁰ Ŋ̀wana-lɔ̂ɔ-ƃelai dífe pâi tarêi m̀ɛnii su gáa kɛ̂i a diai. Dífa berei kâa a gɛɛ dí pú. Ǹyaŋ kili-kɛ-zu da kpɛ́ni fé ǹúu sîi-ŋai ŋí yêei é tée saa pôlu.