Zôo 10 - Bible

¹ Ɣâla, Tãi nɔ́ ŋá kɛ-ɣeniɛi fé lɛ́lɛ-nii, ŋa pâi ísɔŋ lâai núu kélee ŋɛ́i. Ŋa pâi ŋá mɛni sôlii kélee ƃôi yâ.

² Ŋa pâi môi yâ a gɛɛ ífe mɛni lɛ̂ɛ ḿâ. Ŋa í marê kɛ̂i a gɛɛ í m̀ɛnii nyɔ́mɔɔi lɛ́ ḿâ nyii ŋá gɛ̀ a yai.

³ À kɛ̀ ya mɛni kpɔ̂lu làa ḿâ, lé ƃé ya pâi gulâi zu? Lé mɛni ƃé ya í pôlu tɔɔ̂i la zɛŋ í gbɛ̀tɛ a íkpîŋ yeei mai? Ya íyee seêi ŋ̀wana-lɔ̂ɔ-ƃelai dímɛni kpɛtɛɛi mu lé mɛni ma?

⁴ Ya mɛni ŋá kàa yɛ̂ɛ berei núu-kpune a mɛni ŋá kàa lai?

⁵ Í kɛ̀ ɣeniɛi su kpuai yɛ̂ɛ núu-kpune ŋɔi?

⁶ Lé mɛni ƃé ya ḿaa kpɛɛ̂i la a gɛɛ í ńzɔŋ kɔ́ri ḿâ í ŋá mɛnii ŋá téei?

⁷ Í gɔ́lɔŋ kpɔ́ ḿve niî mɛni nyɔ́mɔɔ da kɛ́ ní, kɛ́lɛ núu da fé naa é ŋ́gula íyêei.

⁸ Í ŋ́gbɛ̀tɛ a íkpɔɔi yee, ǹyaŋ íkpɔɔ yeei a ŋɔnɔ kɛ́ ŋ́zu karâi.

⁹ Ɣâla, kɛ́ a gɔ́lɔŋɔɔ a gɛɛ í ŋ́gbɛ̀tɛ a pɔ̂rɔ. Ya pâi ŋɔ́nɔ ŋ́vũa-fũai yɛ̂ɛ pɔ̂rɔ?

¹⁰ Ífe gɛ́-ni ńee é ḿaa kôo siɣe, é ƃɔlɔ é lɛ́ɛ la zu ḿaa sɔlɔ ƃó tãi é seri?

¹¹ Í ŋ́gao pù gîe ma í gbulɔ̂ŋ a ńana. Í ŋ́gbono mɛi pɛ̂lɛ a ńuu da ŋ́gɔlɔ.

¹² Ya ŋ́wɛli a ŋánaa. Ya gɛ́ ŋa kɛ́ ɣele ma. Ya ḿɛi ká kpɔ́ a ǹɛ́lɛɛ.

¹³ Ífe ǹɛɛ ní naa núu da é m̀ɛni nyɔ́mɔɔi kɔ́lɔŋ íkɛ ŋ̀wɛ̂lii í gɛ́ a ńyãai. Ŋaâ nâa gɔ́lɔŋ a gɛɛ íkɛ m̀ɛni-ŋai ŋí kpɛ̀tɛi ḿɛni ma.

¹⁴ Íkɛ̀ kpɔ́ nɔ́ ḿaa kpɛɛ̂i íkɛ gàa yɛ̂ɛ sɛŋ ƃé ŋá pâi sɔnyɔ̂ŋ kɛ̂i, a gɛɛ í ŋ́zoŋ ŋá sɔnyɔ̂ŋ mɛni ma.

¹⁵ À kɛ̀ ŋa sɔnyɔ̂ŋ kɛ̀, mɛni kpɔ̂lu a pâi lâai ḿâ. Kɛ́lɛ à kɛ̀ ŋa teniŋ ƃô tua kɛ̀, fé pâi m̀aa laa maa tɛ̀ sɔlɔ ƃôi. Ƃaa kula-maa a ŋ́gɛ nɔ́ ŋɔ̃ɔ ŋ́gɛ mɔ̃lɛ mîi.

¹⁶ À kɛ̀ ŋa yoŋka tèe ŋ́gɛ mɛni da ma, ya kɛ́ yɛ̂ yala-sulu íkɛ ŋ́gbɛ̀ a gɛɛ í ŋ́zoŋ í ḿbaa. Ya mɛni maa pɔlɔ-pɔlɔɔ kɛ̀ a gɛɛ í mɛni ŋánaa kɛ́ a ńyãa.

¹⁷ Yaâ ŋɔ́nɔ sêre-ŋa sìɣe a gɛɛ dí tɔ́ɔ ḿâ. Ǹyaŋ ya í lii-ŋwana kpɔ́ ḿâ a ŋa ŋánaa. Ya mɛni kpɔ̂lu láa nɔ́ ḿâ yɛ̂ɛ berei kɔluluƃa a kula vii tɔɔ̂i a kɔ̂ la gbɔara-nuu pɔi.

¹⁸ Lé ƃé kɛ̀ íkɛ nɛ̀ɛ naa díkɛ maa sɔlɔ ƃôi? Eêi kɛ̀ a mɛni lɛ́lɛɛ èe kɛ̀ dífe ḿaa sɔlɔ ƃó ni.

¹⁹ Eêi kɛ̀ a mɛni lɛ́lɛɛ eêi kɛ̀ ŋá sáa dínoo kpɔ́ nɔ́ a maa félaa. Nyíŋi eêi kɛ̀ a mɛni lɛ́lɛɛ.

²⁰ Ŋá kɛ-ɣeniɛi su fé ŋɔ́nɔ kôyaa-ni. Tée ma a da-loŋ a gɛɛ ŋá fii-tɔɔ loŋ sɔlɔ ƃó,

²¹ ŋá lɛ́ɛ pâi liî ǹɔii su kpiniɛɛ maa pɔlɔ-pɔlɔɔi tí su ḿva ŋɔ́nɔ pà pôlu.

²² Ŋa pâi liî ƃɛ́i naa sãa kélee táa-taai, naa kɛ́ ƃò nɔ́ wúleei, ƃɛ́i naa kwaa ponoɔɔ káa nɔ́ a kpínii.