Zĩi 5 - Bible

Dí dɔɔ-ƃelai lia-woo ƃò

¹ Kâloŋ-ŋa, ka tɔ̀ɔ. Ka wɔ́lɔ a káwoo sú kɛ́tɛ mɛni-kpɔlu-ŋai mɛni ma nyíi-ŋai pâi laai kâai.

² Kátɔɔ-laai a lûla. Ŋíliŋ a káyopko-ŋai mii.

³ Kpɛ̃ɛ a pâi pɛlɛ̂i kágôo-ŋai dîa da kákane-ŋai. Ǹyaŋ maa-kpɛ̃ɛi a pâi kɛ̂i a kámaa-sere-ŋa é kákpono mii yɛ̂ɛ ŋɔŋ. Ka laai-kɛ-sɛŋ lâai kɛ́ a ŋelei-kpɛɛ-ŋa-ŋai.

⁴ Ka gáa, diai da tíi kɛ̀ kákpâlaŋ ŋái, dífela-féi nyíi ka ǹɛɛ pôlu wôya-pere sui, da wɔ́lɔ̂i a díwoo sú kɛ́tɛ. Ǹyaŋ dii-kɛ-ƃelai wɔ́lɔ-woo a lɔ́ Ŋ̀wála-wâla kelee-Namui wólii.

⁵ Ka kákɛ-ɣeniɛ kɛ̀ ǹɔii ma ƃɛ a tɔɔ-sãa da nia-kɛ. Ka kákpîŋ ŋákɔ̂ŋ a zãai ka bàa a ŋ̀ele-ŋai ŋí.

⁶ Ka dɔ̃yâ-nuui ŋɔmɛnii ŋá tèe ká bàa. Ǹyaŋ vé kɔ́ ní kápɔ.

Lii-kpêle da Ɣâla fɛliɛ

⁷ Mɛni ma, ŋánûa, ka kálii kpéle é lɛ́ɛ la zu Kúnuu-namui pa-tãi é seri. Ka gáa, gbâlaŋ ŋá tii-kɛ-nuui a dunai maa-ŋuŋ da gbɛɛ ŋái maa kpɛ̂ŋ lii-kpele-pere su a gɛɛ é ŋɔsí-sãai m̀á lɛlɛɛ sɔlɔ ƃo.

⁸ Káa máŋ ka kálii kpéle. Ka kálii maa sóŋ, kpɛ́ni fêi, Kúnuu-namui pá-tãi a lɛ̂ɣɛ.

⁹ Ŋánûa, mɛni nyɔ́mɔɔ fé kɛ̀ kákoi é pîlaŋ kákîe-ni dîa, a gɛɛ núu da fé kámɛni ŋá tèe. Ka gáa, mɛni-ŋa-tee-nuui káa tɔɔ̂ ni gbôŋ-ŋai lá.

¹⁰ Ŋánûa, ka Ɣâla ŋɔlóno-kɛ-ƃelai siɣe nyíi-ŋai lòno Kúnuu-namui láai sui a mɛni-soli-kaa da lii-kpele díkɔɔŋ-maa.

¹¹ Ka gáa, diai tɔ̀ɔ a gbanaŋɔɔ̂i, kwa dítòli a lii-nɛ̃ɛ-ƃela. Ka mɛni berei Zôo è tɔ̀ɔ la a gbanaŋɔɔ̂i, ǹyaŋ ka Kúnuu-namui ŋɔsapoi káa, berei wɛli-kɛ-maa da maloŋ-kaa káa la Kúnuu-namui yêei.

¹² Kɛ́lɛ, nyíŋi kélee mɛi, ŋánûa, káfe káfòo a Ɣâla-taa, kpaa máŋ a ǹɔii ma, kpaa máŋ a kperɔ-sii kélee da. Kɛ́lɛ, ká-oêi é kɛ́ nɔ́ a ooei, kákpaoi é kɛ́ nɔ́ a kpao, a gɛɛ káfe lɔ̀ tɔŋ-pu-maa mu.

¹³ Mɛni-soli káa-nuu káa kásama? Tɔɔ é Ɣâla fɛ̀li. Lii-nɛ̃ɛ kula-nuu káa kásama? Tɔɔ é laa-maa-tɛ-wule too.

¹⁴ Kɔlɔ-fela-nuu káa kásama? Tɔɔ é Kôrai-toli-kpɔŋ su-nuu-pɔlɔ-ŋai tóli dí Ɣâla fɛli m̀ɛi dí wúlɔ pu ŋ̀ûa Kúnuu-namui láai su.

¹⁵ Laa-la-Ɣala-fɛliɛ a pâi gɔlɔ-fela-nuui ƃálôi, Kúnuu-namui é m̀u siɣe. Ǹyaŋ à kɛ̀ sɔnyɔ̂ŋ káa ma, ŋɔsɔnyɔ̂ŋ su-mɛni a pâi lɛɛ̂i.

¹⁶ Mɛni ma ka kásɔnyɔ̂ŋ ƃó kákîe-ni dîa ká Ɣâla fɛ̀li kákîe-ni mɛni ma a gɛɛ ká ƃálo. Wála-wala káa tɔ̃yâ-nuu Ŋɔɣâla-fɛliɛɛi ŋɔtíi su.

¹⁷ Ilaza è kɛ̀ nɔ́ a núu-kpune yɛ̂ɛ kúa, ǹyaŋ è Ɣâla fɛ̀li kpɔ́ a gbanaŋɔɔ a gɛɛ tuna fé pu. È kɛ̀ a kóraŋ saaƃa ɣáloŋ lɔ́ɔlu mɛi da tuna fé pu ni ǹɔii ma.

¹⁸ È ŋɔ́nɔ Ɣâla fɛ̀li, tuna é pú ǹɔii ma, ǹɔii é ŋɔsí-sãai kpɛtɛ.

¹⁹ Ŋánûa, à kɛ̀ núu da káa kásama a kûla dɔ̃yâi mâ, ǹúui à pà la pôlui,

²⁰ tɔɔ maa-nuui é gɔlɔŋ a gɛɛ ǹúui a sɔnyɔ̂ŋ nuu kûla ŋɔpɔara-maa-perei su é pá la pôlui, maa-nuui a zɔnyɔ̂ŋ-nuui tí ŋɔmɔ̂leŋ ƃâlo é kúla saa yêei, ǹyaŋ a pâi sɔnyɔ̂ŋ támaa mɛi pɛlɛ̂i.