Zĩi 3 - Bible

Núu nɛ́ŋ

¹ Ŋánûa, kátama-ɣele fé kɛ̀ a sɛŋ-lɛ-ƃela, kpɛ́ni fêi, ká gɔ́lɔŋ kúai kwa sɛŋ lɛ̂i, berei da pâi kúmɛni ŋá têei lai, a pâi kɛ̂i a gɛ́tɛ.

² Kúkelee kwa pɔara-maa támaa kɛ̀, ǹyaŋ ǹúui va pɔara-maa kɛ̀ ǹóno-woo sui, maa-nuui maa waâi. Pɔ̂ri káa mì a gɛɛ é gbonoi kélee mɛi káa máŋ.

³ Kwà soo lá-kɔli tòo a gɛɛ é kúwoo mɛni, gɛ̀ ní kwa gbono téniŋ tɔɔ̂.

⁴ Ka ǹyá-ŋa-keleŋ-ŋai káa máŋ. Berei máŋ díkpaya-kpayai la, fãa kɛ́ sìa a diai, díteniŋ-tɔɔ-sɛŋ káa nɔ́ a keleŋ-tee-sɛŋ kuro-te nyíi a géleŋ-ŋai téniŋ tɔ̀ɔ ƃɛi-pere geleŋ-kɛ-ƃelai da nàa wɛ̂lii.

⁵ Bere nɔ́ ƃe núu nɛ́ŋ káa la a zua kuro-te, kɛ́lɛ, gɛ́ mɛni kɛ́tɛ maa-yoŋka tèe. Ŋɔŋ-loŋ kuro-te a wolâ kɛ́tɛ kèreŋ!

⁶ Ǹyaŋ núu nɛ́ŋ káa nɔ́ yɛ̂ɛ ŋɔŋ. Núu nɛ́ŋ káa a ŋwana-lɔ̂ɔ-ɣeniɛ kúkponôi woŋo-ŋai sama, gɛ kúkpono kélee kara, gɛ ŋɔŋ too ŋele-ma-saai kélee ma. Ǹyaŋ Dɛ̂ƃele-taa a ŋɔŋ tôo mà.

⁷ Kpɛ́ni fêi, núu-kpune a pɔ̂ri sua-sii kélee tɔɔ̂i da ŋɔni kélee é pɛ́lɛ tɔara-sãa kélee dîa da yâi-sãa kélee, kɛ́lɛ núu-kpune a dítɔ̂ɔ.

⁸ Kɛ́lɛ, núu da fa pɔ̂ri núu nɛ́ŋ tɔɔ̂i-nyíi vii fa kpɛ̂ɛ a ŋwana-lɔ̂ɔ-kɛɛ. Ǹáa fɛ̂ɛi a ŋ̀ale-maa.

⁹ Kúnɛŋ nɔ́ ƃe kwa lûwa làa la Kúnuu-namui ma da Kúnâŋ Ɣâla, ǹyaa nɔ́ ƃe kwa núu-kpune naɣâŋ làa la, nyíi-ŋai díkpɛtɛɛ̂i a Ɣâla-pɔɔkɔ̂ŋ.

¹⁰ Ǹyaŋ kúla tɔnɔi tí nɔ́ ƃe lûwa a kûla naa da naɣâŋ-laa. Ŋánûa, vé lɛ́lɛ ní a gɛɛ nyíŋi é kɛ́.

¹¹ Ǹyái nyíi a kûla ǹɔii mui, a kûla a ya-nina da ya-ŋíye a tãi tɔnɔ?

¹² Ŋánûa, wulɔ-wuru a ƃa fii-wuru ŋá, kpaa máŋ fii-wuru a ƃa kpɔmɔ ŋá? Núu fa pɔ̂ri yá kɔɔ̂i kpolo-ya su nyíi kpolo fa kɛ̂ mai.

Dárei nyíi a kûla ŋ̀elei sui

¹³ Gbɛ̂ɛ ƃe dáreɛ̂i gɛ́ mɛni ŋá kàa kásamâi? Tɔɔ é ŋɔtíi lɛ́ ŋɔfúlu-laa lɛ́lɛɛi su maa-yeŋ-pere su, nyíi a kûla táre sui.

¹⁴ Kɛ́lɛ, à kɛ̀ tólo ŋánaa da ŋɛi-kpala káa kálii su, káfe yoŋka tèe kákɛ a dɔ̃yâi maa-woya-ƃela.

¹⁵ Dárei ŋí káa a tárei nyii vé kula ní ŋ̀elei sui. Kɛ́lɛ, gáa a ǹɔii ḿâ ƃɛ-tare. Vé kùla ní Mɔ̂leŋ yêei, gáa a Dɛ̂ƃele ŋɔtárei.

¹⁶ Kpɛ́ni fêi, ƃɛi tólo da ŋɛi-kpala káa naai, nàa ƃe wòo-taa-taa káa naa da mɛni nyɔ́mɔɔ-sii kélee maa kɔ́riɛɛ.

¹⁷ Kɛ́lɛ, dárei nyíi a kûla ŋ̀elei sui, mɛnii gáa ma a maa-ŋuŋ, ǹyaa ƃa maa-waa-laa, lii-sêe kɛ́ ƃo zu, sɔŋ-lɛlɛ kɛ́ ƃo zu, woo-mɛni kɛ́ ƃo zu, ǹáa fɛ́ɛ a maloŋ kâa da tii-lɛlɛ, woo-kɛ-ńâ-feerɛ fé zu, kiri-mɛni fé zu.

¹⁸ Diai da pâ a lii-sêei, da pâi lii-sêe sîi nyíi m̀á a pâi kɛ̂i a tɔ̃yâ-laai.