Zɛnɛse 9 - Bible

Ɣâla è kpanaŋ-wooi gɛ̀ Nôa yêei

¹ Nya ƃe Ɣâla è lûwa làa Nôa ma da ǹônii ǹyɛɛ diai, “Ka ƃûu ƃó, ká ǹɔii láa fɛ́ɛ.

² Fɛnɛ-sãa kélee da pâi yaôi kâa da ŋɔni-ŋai, da dɔara-sãai é pɛ́lɛ ǹyɛ̃ɛ-ŋai dîa. Ŋa díkelee tɛ́ɛ kápɔ.

³ Fúlu sãa kélee díkaa a mii-sãa kámɛni ma. Yɛ̂ɛ berei ŋá tuma-laa tɛ̀ɛ la kápɔi, ŋa sɛŋ kélee tɛ́ɛ kápɔ.

⁴ Kɛ́lɛ káfe ŋ̀ãa lɛ́ɛ zu ká mìi.

⁵ Kɛ́lɛ ŋa pâi káfulu-laai kpɛɣɛŋ ƃôi kákîe-ni yêei. Ŋ̀a pâi fúlu sãa kélee dífulu-laai kpɛɣɛŋ ƃôi da núu-kpune. Ŋa pâi núu-kpune ŋɔfúlu-laai kpɛɣɛŋ ƃôi díkîe-ni yêei.

⁶ Ǹúui kélee a m̀arâŋ ŋãa pûi, da pâi ŋɔ̂i pûi. Kpɛ́ni fêi, ŋá núu-kpune kpɛ̀tɛ a ŋ́gbîŋ ƃóloŋ-maa.

⁷ “Mɛni ma, ka ƃûu ƃó, ká táma ǹɔii su ká ǹáa fɛ́ɛ.”

⁸ Nya ƃe Ɣâla è mò Nôa ma da ǹônii ǹyɛɛi,

⁹ “Ka gáa, ŋa ŋ́gono tée káyêei ka kálônii nyii-ŋai pâi lɛɛ̂i kápôlui,

¹⁰ da vúlu sãai kélee ka dîa-ni kákaa ǹɔii sui, ŋɔni, taa-tulɛ da fɛnɛ-sãai kélee, nyii-ŋai kùla géleŋ sui.

¹¹ Ŋa ŋ́gono tée káyêei a gɛɛ ya-fɛɛ fé ŋɔ́nɔ wɔ́lɔ pâi ǹɔii su-sãa su karâi, a gɛɛ ya-fɛɛ fé ŋɔ́nɔ pâi ǹɔii su karâi.”

¹² Ɣâla è mò ǹyɛɛi, “Gbanaŋ-wooi maa ŋɛi-kɛ-maai ká ŋí nyii ŋá gɛ̀ kwa káa-ni kúloai, da vúlu sãai kélee díkaa ǹɔii sui, kásuui kélee mɛni ma.

¹³ Ŋa ŋágbeimɛlɛi lâai ŋ̀elei su, ǹyaŋ a pâi kɛ̂i a ŋákpanaŋ-wooi maa ŋɛi-kɛ-maa kwa ǹɔii kúloai.

¹⁴ Tãi ŋa gbeimɛlɛi lâa la ŋ̀elei su ká gáai,

¹⁵ Ŋákpanaŋ-wooi maa mɛni a tôo ŋ́gili ŋá nyii gáa kúloai kwa káa-ni da fúlu sɛŋ kéleei. Ǹyaŋ gɛ̀ ní ya-fɛɛ fé ŋɔ́nɔ wɔ́lɔ pâi fúlu sãa kélee su karâi.

¹⁶ Gbeimɛlɛi à kɛ̀ ŋ̀elei su, ŋa pâi gâai, gɛ̀ ní ŋɔ́lɔ-wɔlɔ kpanaŋ-wooi a pâi toôi ŋ́gili ŋá nyii gáa kúloai kwa fúlu sãa kélee díkaa ǹɔii sui.”

¹⁷ Ɣâla è mò Nôa ma ǹyɛɛ, “Gbanaŋ-wooi maa ŋɛi-kɛ-maai ká ŋí nyii ŋá gɛ̀ kwa fúlu sãa kélee kúloai nyii-ŋai díkaa ǹɔii sui.”

Nôa da ǹônii-sinaai

¹⁸ Nôa ǹônii ká ŋí nyii-ŋai kùla géleŋ sui. Sɛ̂ŋ, Aaŋ da Zafɛ. (Aaŋ è kɛ̀ a Keena ǹâŋ.)

¹⁹ Ǹúu saaƃai ŋí ƃé kɛ̀ a Nôa ǹônii, ǹyaŋ dísuui su ƃé núu kélee è kùla naa.

²⁰ Nôa ƃé kɛ̀ a kpâlaŋ ŋá tii-kɛ-nuu maa-ŋuŋ nyii kpɔmɔ-kpalaŋ kɛ̂i.

²¹ Tãi tɔnɔ è lɔɔ kpêle, nɔ̀ɔi é gɛ́ é láa ŋɔsua kɔlɔ seɣe pɛrɛi mu a gaŋ.

²² Keena ǹâŋ, Aaŋ è ǹâŋ Nôa kaŋ kâa, é mò ǹêɣe-ni dîa ŋ̀énii ŋá.

²³ Sɛŋ da Zafɛ dí seɣe sîɣe dí bɛ́lɛ díkâraŋ ŋá dí sía a dípôlu-pere dí dínâŋ kaŋ mɛi pɛ́lɛ. Díŋɛi è kɛ̀ a dínaŋɔɔ, dífe dínâŋ kaŋ káa ní.

²⁴ Tãi Nôa è ŋ̀ɛ́i lá ƃô la ŋuŋ su é séɣeŋ, è mɛnii kɔ́lɔŋ ǹóŋ guro-tei è gɛ̀i,

²⁵ È mò ǹyɛɛi, “Náɣaŋ é kɛ́ Keena ma! Tɔɔ é kɛ́ a luɛ koi luɛ ŋɔnûai sáma.

²⁶ Lûwa é kɛ́ Yâwɛɛ Ɣâla ma nyii gáa a Sɛ̂ŋ ŋɔɣâlai! Tɔɔ Keena é kɛ́ a Sɛ̂ŋ ŋɔluɛ.

²⁷ Tɔɔ Ɣâla é Zafɛ ŋɔsuui ƃûu ƃó! Tɔɔ é kɛ́ Sɛ̂ŋ ŋɔsua kɔlɔ seɣe pɛrɛi mu! Keena é kɛ́ a ŋɔluɛ.”

²⁸ Ǹya-fɛɛi pôlu ma, Nôa è kɛ̀ ɣele ma a kóraŋ ŋuŋ saaƃa pôlu buu lɔ́ɔlu (350).

²⁹ Nôa è kɛ̀ a kóraŋ ŋuŋ lɔ́ɔlu mɛi náaŋ pôlu buu lɔ́ɔlu (950) é lɛ́ɛ saâi.