Zɛnɛse 48 - Bible

Zeeka è lûwa làa Ifiraŋ ma da Manasɛ

¹ Nyíŋi pôlu ma dí mò Zosɛ ma díyɛɛ mai, “Ínâŋ a kɔ̂lɛi.” Nya ƃe è ǹônii-sinaa feerɛi, Manasɛ da Ifiraŋ sìɣe da dîa-ni dí lí.

² Dí mò Zeeka ma dîyɛɛi, “Íloŋ Zosɛ a pá ípɔ naa.” Nya ƃe Zeeka è kɔ̀ ma é mu sìɣe é sée gbìŋ ŋá.

³ Zeeka è mò Zosɛ ma ǹyɛɛi, “Ŋ̀wála-wâla kélee Ɣalai è pà ḿbɔ Luzi, Keena lɔii su é lûwa láa ḿâ.

⁴ È mò mâ ǹyɛɛi, ‘Gáa, ŋa pâi íkɛ̂i í ƃûu ƃó. Ŋa pâi ísuui kɛ̂i a núu-kpulu su kɛ́tɛ. Ǹyaŋ ŋa pâi ǹɔii ŋí tɛɛ̂i ísuui pɔ́ é kɛ́ a dípɔɔ wɔlɔ-wɔlɔ da wɔlɔ-wɔlɔ.’ ”

⁵ “Ílônii-sinaa feerɛi í dímaa sɔlɔ ƃô Ize lɔii su ŋá lɛ́ɛ pâi ípɔ Ize lɔii sui, díkaa a ḿbɔɔ. Ifiraŋ da Manasɛ da pâi kɛ̂i a ḿbɔɔ yɛ̂ɛ berei Lubiŋ da Simiɔŋ díkaa lai.

⁶ Ínîa-pɛlɛɛi nyii-ŋai í dí maa sɔlɔ ƃô nàa pôlu mai, díkaa a ípɔɔ. Da pâi pɔɔ-sɛŋ sɔlɔ ƃôi Manasɛ da Ifiraŋ dísârai.

⁷ Kpɛ́ni fêi, tãi ŋá kùla la Mɛsopotamiai, Leesɛ è sàa ńyêei berei su a lii-soli pere Keena lɔii su tãi kúfe niî kɛ̀ seri ní la Ɛfatai. Ŋá nòo naa berei ma ƃà kɛ̀ pâi Ɛfatai (zu-kulai ƃa Bɛpeleɣɛ̃ɛ).”

⁸ Tãi Zeeka è Zosɛ ǹônii-sinaa feerɛi kàa lai, è mò ǹyɛɛi, “Gbɛ̂ɛ-ni ƃe ŋí?”

⁹ Zosɛ ǹyɛɛ mai, “Ńônii ká tí nyii-ŋai Ɣâla è dítɛ̀ɛ ḿbɔi.” Zeeka ǹyɛɛ mai, “Kpera yɛ̂ pá a dia ḿbɔ a gɛɛ ŋá lûwa láa dîa.”

¹⁰ Zeeka ŋɛ́i fé ŋɔ́nɔ kɛ́ ní kwaa kâai a ǹɛ́lɛɛ, kpɛ́ni fêi, è nâa kɛ̀ pɔlɔ̂i. Mɛni ma Zosɛ è lɛ̀ɣɛ a ǹônii-sinaai ǹâŋ kɔlɛ. Nya ƃe ǹâŋ è ǹá-gbɔ sèe dîa é kpulɔ̂ŋ dîa.

¹¹ Nya ƃe Zeeka è mò Zosɛ ma ǹyɛɛi, “Gíli fé kɛ́ ní ŋá a gɛɛ ŋa pâi íŋɛi kâai. Ǹyaŋ Ɣâla a ǹɛɛ naa ŋa ínîa-pɛlɛɛi káa máŋ.”

¹² Nya ƃe Zosɛ è díkùla ǹâŋ kɔ́ mɛi é pɛ́lɛ ŋ̀úme ŋá é ŋ̀uŋ pîlaŋ ǹɔii ma.

¹³ Nya ƃe Zosɛ è dífeerɛ díyee sòŋ. È Ifiraŋ sòŋ a ǹáa mii yêe nyii kɛ̀ a Zeeka kɔɔ yee mɛi-perei, é Manasɛ soŋ a gɔɔ yêe nyii kɛ̀ a Zeeka láa mii yêe mɛi-pere, é lí a dia bɔ́.

¹⁴ Nya ƃe Zeeka è ǹáa mii yee sãa é bɛlɛ Ifiraŋ ŋûa, nyii kɛ̀ a ǹeɣe-ɣelei, é gɔɔ yêe sã́a é bɛlɛ Manasɛ ŋûa, nyii kɛ̀ a Zosɛ ǹóŋ maa-ŋuŋ.

¹⁵ È lûwa làa Zosɛ ma ǹyɛɛi, “Ŋ̀âlai nyii ńâŋ Eberaɣɛ̃ɛ da Aise dí sìa dúɛi, Ŋ̀âlai nyii a ŋáfulu-laai téniŋ tɔ́ɔ a lɛɛ la zu tãi ŋí a serii,

¹⁶ Ŋ̀âla-taa-kelai nyii a ŋ́gula sɔnyɔ̂ŋ kélee sui, é lûwa láa ǹîa-pɛlɛɛi dîa! Tɔɔ kwa ńâŋ-ni Eberaɣɛ̃ɛ da Aise kúlaa é lɛ́ɛ ɣele ma dísârai. Tɔɔ dí ƃûu ƃó dí táma ǹɔii mâ!”

¹⁷ Tãi Zosɛ è gàa la a gɛɛ ǹâŋ è ǹáa mii yee pɛ̀lɛ Ifiraŋ ŋûai, ǹíi è kɔ̀-kɔ. È ǹâŋ yée sìɣe Ifiraŋ ŋûa a gɛɛ é bɛlɛ Manasɛ ŋûa.

¹⁸ È mò ǹâŋ ma ǹyɛɛi, “Ńâŋ, vé tí. Kpɛ́ni fêi, Manasɛ ƃa ńoŋ maa-ŋuŋ. Iláa mii-yee pɛlɛ ŋ̀ûa.”

¹⁹ Kɛ́lɛ ǹâŋ fé gɛ́ ní. È mò ma ǹyɛɛi, “Ńoŋ, ŋá gɔ́lɔŋ kpɔ́ a ǹɛ́lɛɛ. Ǹyaa máŋ a pâi ƃûu ƃôi é kɛ́ a núu-suu su kɛtɛ. É máŋ kɛ́ tí, ǹêɣe a pâi kɛ̂i a núu kɛ́tɛ é tɛ́ɛ ma. Ŋɔsuui a pâi tâmai é kɛ́ a núu-kpulu kɛ́tɛ.”

²⁰ Nya ƃe è lûwa làa dîa a ŋ̀elei tí ǹyɛɛ, “Tãi da pâi kɛ̂i lûwa lâai la núu ma Eezuɛ lɔii sui, da pâi m̀ôi dîyɛɛ, ‘Ɣâla é lûwa láa yâ yɛ̂ɛ Ifiraŋ da Manasɛ.’ ” È Ifiraŋ tɔ̀ɔ Manasɛ ŋɛ́i-túɛ.

²¹ Nya ƃe Zeeka è mò Zosɛ ma ǹyɛɛi, “Gáa, ŋa pá nâa saâi, kɛ́lɛ Ɣâla a pâi kɛ̂i kákɔlɛ. A pâi pâi ŋɔ́nɔ a káa pôlu kánâŋ-ni dílɔii su.

²² Ŋá Sɛkɛŋ lɔii kpuai tɛɛ ípɔ, nyii ŋá gûla Amɔra-ŋai yêei a ŋáƃoa-sɔkpɔi da ŋákerâŋ. Fé dɛɛ ní ílêɣe da ílîa-ni pɔ́.”