Zɛnɛse 3 - Bible

Sɔnyɔ̂ŋ kɔ́ɔ pîlanii

¹ Galii è kɛ̀ a dáreɛɛ, ŋ̀óyaa é tɛ́ɛ lɔɔ fɛnɛ-sãa kélee dîa Yâwɛɛ Ɣâla è gbɛ̀tɛi. Nya ƃe è mò nɛnîi ma ǹyɛɛi, “Ɣâla è mò a tɔ̃yâ a gɛɛ káfe ŋ̀úru-ŋai ŋí zûai sui m̀á da mii?”

² Nɛnîi ǹyɛɛ galii mai, “Kwa pɔ̂ri ŋ̀úru-ŋai ŋí zûai sui m̀á da miî,

³ Kɛ́lɛ Ɣâla è mò ǹyɛɛ, ‘ŋ̀úrii nyii gáa tɔɔni zûai sámai káfe m̀á da mìi, kpaa máŋ ká lɛ́ɣɛ ma, kà gɛ̀ tí, ka pâi saâi.’ ”

⁴ Kɛ́lɛ galii è mò ǹɛnîi ma ǹyɛɛi, “Káfe pâi saâi.

⁵ Kpɛ́ni fêi, Ɣâla è gɔ́lɔŋ a gɛɛ tãi kà ŋ̀úrii ŋí m̀á da mii lai, káŋɛi lá a pâi ƃôi kákɛ yɛ̂ɛ ǹyaa Ɣâla, ǹyaŋ gɛ̀ ní ka pâi mɛni lɛ́lɛɛ kɔ́lɔnîi da mɛni nyɔ́mɔɔ.”

⁶ Nɛnîi è ŋ̀úrii kàa a gɛɛ m̀á lɛ̂lɛɛi mii mɛni ma, ǹɛ́lɛɛ núu ŋɛ́i, gɛ́ tela núu tàre. È m̀á da kùla é mii. É da tɛ́ɛ ŋɔsurɔ̂ŋ pɔ́ ǹyaa máŋ é mii.

⁷ Nya ƃe dífeerɛ díŋɛi lá è ƃò. Dí nâa gɔ́lɔŋ a gɛɛ díkaa a díkaŋ. Nya ƃe dí fîi wuru laa sɔ̂lɔ dí ŋiri dîa.

⁸ È nâa kɛ̀ tí, dí Yâwɛɛ Ɣâla wóo mɛni gɛ́ sîa zûai su a ɣele-wulii. Nya ƃe nalôŋ da ŋɔnɛnîi dí dílòo Yâwɛɛ Ɣâla ma ŋ̀úru-ŋai sáma zûai su.

⁹ Kɛ́lɛ Yâwɛɛ Ɣâla è nalôŋ tòli ǹyɛɛ mai, “Íkaa mí?”

¹⁰ Nalôŋ ǹyɛɛ mai, “Ŋá íwoo mɛni zûai su, ǹyaŋ ŋá kɛ̀ yaôi, mɛni ƃé ŋá nòo la, kpɛ́ni fêi, ŋá kɛ̀ a ŋ́gaŋ.”

¹¹ Nyɛɛ mai, “Gbɛ̂ɛ ƃé mò yâ a gɛɛ íkaa a íkaŋ? Ŋ̀úrii ŋá mò yâ a gɛɛ ífe m̀á da mii, ƃa da mii?”

¹² Nalôŋ ǹyɛɛ ma, “Nɛnîi í dɛ̀ɛ ḿbɔi è ŋ̀úrii m̀á da tɛ̀ɛ ḿbɔ ŋá mii.”

¹³ Nya ƃe Yâwɛɛ Ɣâla è mò nɛnîi ma ǹyɛɛi, “Lé ƃé ŋí ƃa gɛ́i?” Nɛnîi ǹyɛɛ mai, “Galii ƃé ńdûmo ŋá mii.”

Ɣâla ŋɔtɔŋ kpɛ́-maai

¹⁴ Yâwɛɛ Ɣâla ǹyɛɛ galii mai, “Náɣaŋ káa yâ, lɔɔ fɛnɛ-sãa kélee sáma, kpɛ́ni fêi, ƃía ƃé mɛnii ŋí kɛ̀. Ƃa pâi kɛ̂i siâi íkoo mɛi, í pɔ̂rɔ mii ífulu-laai su.

¹⁵ Ŋa pâi kpɔara lɔ̂i káloai ka nɛnîi, ísuui da nɛnîi ŋɔsuui. Da pâi ƃɔ̂rɔnii íŋuŋ ma, yáŋ ya pâi dínyînii díkɔɔ ma.”

¹⁶ È mò nɛnîi ma ǹyɛɛ, “Ŋa pâi ímɛni-solii su kɛ̀tɛi lóŋ káa-mɛni su. Ƃa pâi nîa-pɛlɛɛ maa sɔlɔ ƃôi mɛni-soli su. É máŋ kɛ́ tí, ímaa mɛni kélee a pâi kɛ̂i ísurɔ̂ŋ ma, ǹyaŋ a pâi kɛ̂i ímɛi.”

¹⁷ È mò nalôŋ ma ǹyɛɛ, “Náɣaŋ káa ǹɔii ma ílaai su, kpɛ́ni fêi, ƃa íwoli tɔ́ɔ ínɛnîi wóo ma ƃa ŋ̀úru-ƃai mii, nyii ŋa mò yâ a gɛɛ ífe mìi. Ƃa pâi íkɔnɔŋ sɔlɔ ƃôi ǹɔii su a mɛni-soli káa ífulu-laai su.

¹⁸ Ŋalêŋ da didi da pâi kulâi ǹɔii ma ímɛni ma. Ƃa pâi ǹɔii ma tuma-laai miî.

¹⁹ Ƃa pâi fɔ̃nɔ fâyai í lɛ́ɛ pâi íkɔnɔŋ sɔlɔ ƃôi, é lɛ́ɛ la zu í lí pôlu ǹɔii pɔ́. Kpɛ́ni fêi, naa ƃé í kùla naa. Íkaa a pɔ̂rɔ, ǹyaŋ ƃa pâi liî pôlu pɔ̂rɔ pɔ́.”

²⁰ Adaŋ è ŋɔnɛnîi láa sèe a Iî, kpɛ́ni fêi, è kɛ̀ a núu-kpune kélee nee.

²¹ Nya ƃe Yâwɛɛ Ɣâla è sua kɔlɔ kpɛ̀tɛ a seɣe Adaŋ mɛni ma da ŋɔnɛnîi dí ŋiri dîa.

Dí Adaŋ da Iî kpɛ̀ zuai su

²² È nâa kɛ̀ tí, Yâwɛɛ Ɣâla è mò ǹyɛɛ, “Nalôŋ a nâa kɛ́ yɛ̂ɛ kúta, nyii a nâa mɛni lɛ́lɛɛ da mɛni nyɔ́mɔɔ kɔ́lɔŋ. Ǹyaŋ maa fé nɛ̃ɛ ní a gɛɛ é vúlu-laa wurii m̀á da kula é mii a gɛɛ é kɛ́ ɣele ma wɔlɔ-wɔlɔ da wɔlɔ-wɔlɔ.”

²³ Mɛni ma Yâwɛɛ Ɣâla è gbɛ̀ Idɛŋ suai su a gɛɛ é tíi kɛ́ ǹɔii ma nyii è kùla zui.

²⁴ È nalôŋ kpɛ̀ zûai su, é ŋâla-taa kooŋ-sãai pú Idɛŋ suai vóloi ƃelai-pere da ƃóa-sɔ̂kpɔ fóloɔɔ a gɛɛ dí vúlu-laa wurii maa-perei mɛi káa.