Zɛnɛse 23 - Bible

Seera è sàa Eberaɣɛ̃ɛ é zaa loo lɔii-kpua yá

¹ Seera è kɛ̀ ɣele ma a kóraŋ ŋuŋ tɔnɔ pôlu buu feerɛ káo lɔ́ɔlu mɛi feerɛ (127).

² Seera è sàa Kiria Aba (nyíi da dòli máŋ a Iburɔŋ), Keena lɔii su. Nya ƃe Eberaɣɛ̃ɛ è lì a gɛɛ é Seera maa wɔ̂lɔ kɛ́.

³ Nya ƃe Eberaɣɛ̃ɛ è mu sìɣe zaai kɔlɛ é tɔ́ɔ ǹyɛɛ Ita-ŋai diai,

⁴ “Ŋgáa a ŋɔ̃ya da sia-nuu kásama. Ka kálɔii gbua da kɔlɛ ḿâ a gɛɛ naa é kɛ́ a ŋásaa loôi, a gɛɛ ŋá ŋánɛnîi saa lóo naa.”

⁵ Nya ƃe Ita-ŋai dí Eberaɣɛ̃ɛ wóo su tôo díyɛɛ ma,

⁶ “Kúnuu-namui, kúwoo mɛni. Íkaa a kâloŋ kɛ́tɛ kúsama. Ƃɛ́i ƃa ŋ̀wɛ̂lii í ísaai lóo naai, nòo naa. Núu da fé kúsama nyii va pɔ̂ri fâai é lɔii kpua tɛ̀ɛ ípɔ saa loo mɛni ma, kpaa máŋ é íkpera ísaai loôi.”

⁷ Eberaɣɛ̃ɛ è mu sìɣe é maa pɛ́lɛ Ita-ŋai ŋɛ́i-tuɛ nyii-ŋai kɛ̀ a ǹɔii nâmelai.

⁸ È mò dîa ǹyɛɛi, “A kɛ̀ ka ŋ̀wɛ̂lii ŋá ŋá-saai lóo, ka ŋ̀óoi ŋí mɛni, ká lóno mî Zoa ǹóŋ Ɛfɔŋ pɔ́,

⁹ a gɛɛ é Mapela kɔni-woloi kɔ́lɛ ḿâ nyii gáa a bɔ́ɔi. Gáa ŋɔlɔii kpɛɛ ŋá. Tɔɔ é zɔ̃ɔ lɛ́ ḿâ káŋɛi ŋá ǹyá a gɛɛ é kɛ́ a ŋásaa-loôi.”

¹⁰ Ǹyaŋ Ɛfɔŋ è kɛ̀ seeni Ita-ŋai sáma. Nya ƃe è Eberaɣɛ̃ɛ wóo su tôo Ita-ŋai kélee ŋɛ́i kɛ̀ naai ǹyɛɛi,

¹¹ “Ŋánuu-namui, ŋ́oo mɛ́ni. Ŋa ǹɔii tɛ́ɛ ípɔ, ŋa gɔni-woloi tɛ́ɛ ípɔ gáa mai. Ŋa dítɛɛ ípɔ ŋánûai kélee ŋɛ́i. Ísaai lóo naa.”

¹² Nya ƃe Eberaɣɛ̃ɛ è ŋuŋ pîlaŋ ǹɔii nâmelai ŋɛ́i-tuɛ.

¹³ È mò Ɛfɔŋ ma ǹɔii nâmelai ŋɛ́i ǹyɛɛi, “Ŋ́oo mɛ́ni. Ŋa pâi ǹɔii sɔ̃ɔ tɛɛ̂i ípɔ. Zóŋ a gɛɛ ŋá ŋá-sãai lóo naa.”

¹⁴ Nya ƃe Ɛfɔŋ è Eberaɣɛ̃ɛ wóo su tòo ǹyɛɛ mai,

¹⁵ “Ŋánuu-namui, íwoli tɔ́ ḿâ. Ǹɔii kpuai nyii zɔ̃ɔ káa a káne kpua-kpua ŋuŋ náaŋ (400), m̀ɛni káa a lé kwa yá kúloai? Ísaai lóo naa.”

¹⁶ Eberaɣɛ̃ɛ è fàa Ɛfɔŋ wóo ma. Ganei è ǹáa ƃò ǹɔii kpuai mɛni mai è gɔ̀ɔŋ Ita-ŋai ŋɛ́i bɔni tɔɔ-ƃelai dísɛŋ-kao kɔ̂ɔŋ-sɛŋ su, é dɛ́ɛ Ɛfɔŋ pɔ́.

¹⁷ Ǹyaŋ Ɛfɔŋ ŋɔlɔii kpuai kɛ̀ Mapela, Mamera ŋɛ́-tuɛi, nyii gɔni-woloi da ŋ̀úru-ŋai dí kɛ̀ ma gwaa kéleei,

¹⁸ è nâa kɛ̀ a Eberaɣɛ̃ɛ pɔ́. È kɛ̀ a Ita-ŋai kélee kɔ́lɔŋ-mɛni nyii-ŋai kɛ̀ naai a gɛɛ ǹɔii kpuai káa nâa a Eberaɣɛ̃ɛ pɔ́ɔ.

¹⁹ Nya ƃe Eberaɣɛ̃ɛ è ŋɔnɛnîi Seera saa lôo gɔni-woloi ŋí su Keena lɔii su.

²⁰ Ǹɔii kpuai da gɔni-woloi nyii kɛ̀ a Ita-ŋai pɔ́ɔi, è nâa kɛ̀ a Eberaɣɛ̃ɛ kɔ̃liŋ ŋɔsaa loo mɛni ma.