Zasua 7 - Bible

Eekãŋ è sɔnyɔ̂ŋ kɛ̀

¹ Kɛ́lɛ Eezuɛ-ŋai dífe díwoli tɔ̀ɔ ní m̀ɛnii ma Yâwɛɛ è mò dîai. Dí zãai da sìɣe nyíi kɛ̀ a Yâwɛɛ pɔ́ɔi. Eekãŋ ƃé m̀ɛnii ŋí kɛ̀. Eekãŋ ǹâŋ láa ƃé kɛ̀ a Kamii. Kamii ǹyaŋ ǹâŋ láa ƃé kɛ̀ a Zadí, Zadí ǹáŋ láa kɛ́ ƃò a Zera. Ǹûai ŋí díkɛ̀ a Zuda ŋɔsuui su-ƃelai da. Yâwɛɛ è ǹíi ŋwàna Eezuɛ-ŋai dîa, kpɛ́ni fêi, Eekãŋ è zãai da sìɣe nyíi kɛ̀ a Ɣâwɛɛ pɔ́ɔi.

² Zasua è kpakolo-ŋa kùla Zɛleko é dí tɛ́ɛ Eea. Eea káa Bɛtivɛ̃ŋ taa-leei su kɔlɛ Bɛtɛ vóloi kulâi-pere perei È m̀o dîa ǹyɛɛ, “Ka lí ǹyéei ma ká ǹɔii ma kpɛ́ɛ.” Nya ƃe ǹûai dí lì, dí gɛ́ tí.

³ Dí pà la pôlu Zasua pɔ́ naa, dîyɛɛ m̀ai, “Gɔ́ kɔ́-ƃelai kélee dífe lì, kɛ́lɛ núu wála feerɛ kpaa máŋ wála saaƃa tɛ́ɛ nɔ́ a gɛ́ɛ dí lí gɔ́i ma Eea. Ífe ǹûai kélee tɛ̀ɛ, kpɛ́ni fêi, Eea-ƃelai dífe táma ní.”

⁴ Nya ƃe Zasua è núu wála saaƃa tɛ̀ɛ gɔ́i ma Eea. Eea-ƃelai yée è tɛ̀ɛ Eezuɛ-ŋai dîa, Eezuɛ-ŋai dí pú.

⁵ Eea-ƃelai dí pɛ̀lɛ Eezuɛ-ŋai kpɛ́ɛ ma é síɣe dísiɣãŋ lá dí yéŋ ǹyéei kwára botoi su. Dí núu buu-saaƃa káo lɔ́ɔlu mɛi da pàa. Ǹyaŋ Eezuɛ-ŋai líi è tòo pôlu a ŋ̀ánaa.

⁶ Nya ƃe Zasua da ǹúu ŋuŋ túɛ-ƃelai Eezuɛ dí díseɣe-ŋai fàla dí luu pú díŋûa dí tóo ǹɔii ma Yâwɛɛ ŋɔkono-tee gãlai ŋɛ́i túɛ é lɛ́ɛ la zu ɣele wulii é kɛ́.

⁷ Zasua è kɛ̀ Ɣâla fɛlîi ǹyɛɛi, “Óo Kúnuu-namui Yâwɛɛ, lé ƃé gɛ̀ ikɛ gɛ̀ kúkɛ Zɔsiŋ Ya-leei tiyeŋ a gɛ́ɛ íku tɛ́ɛ Amɔra-ŋai pɔ́ dí kúpaai? Eê pɔri kɛ̂i a ǹɛ́lɛɛ a gɛ́ɛ kúlɛɛ Zɔdiŋ Ya-leei pôlu pere!

⁸ Óo Ǹuu-namui, lé ƃé ŋa pɔ̂ri môi à kɛ̀ Eezuɛ-ŋai da pù ŋɔkpɔara-ƃelai yêei!

⁹ À kɛ̀ tí, Keena-ŋai da ǹûai kélee ǹɔii sui da pâi mɛnîi. Gɛ̀ ní da pâi tînanii kûa dí kúpaa. À kɛ̀ tí, gɛ̀ ní ílaa kɛ́tɛi ŋí fé pâi karâi?”

¹⁰ Nya ƃe Yâwɛɛ è mò Zasua ma ǹyɛɛ, “Ímu síɣe. Ya lâani ǹɔii ma lé mɛni ma?

¹¹ Eezuɛ-ŋai daâ sɔnyɔ̂ŋ kɛ́. Da ŋákono-têe wooi kara nyíi ŋá gɛ̀ díyêei. Da zãâi da sìɣe nyíi gáa a ḿbɔɔi. Da ŋúma kɛ́, da lɛ́ɛ kɛ́, da ŋ̀úma sãai pú díwɔ̂ sãai su.

¹² M̀ɛnii ŋí ƃé gɛ̀ Eezuɛ-ŋai dífe pɔri ní díkpɔara-ƃelai yée mɛi ɣâlei. Dí pù díyêei, kpɛ́ni fêi, dia ƃé ŋa pâi dísu karâi. Fé pâi ŋɔ́nɔ kɛ̂i kákɔlɛ, fɛ̂ɛ ká ŋ̀uma sãai kúla kásama.

¹³ Ímu síɣe í ǹûai maa wáa. M̀ó dîa yɛ̂ɛi, ‘Ka kákpîŋ kpɛtɛ goyɛ̂ŋ mɛni ma tínaa, kpɛ́ni fêi, Eezuɛ Ŋɔɣâlai Yâwɛɛ a nɛ̂i a gɛ́ɛ zãâi díkaa a ḿbɔɔi, da káa káyêei. M̀ɛni ma, káfa pɔ̂ri tɔɔ̂i kákpɔara-ƃelai ŋɛ́i fɛ̂ɛ ká zãâi ŋí kúla kákɔ̃liŋ su!’

¹⁴ Yâwɛɛ è mò Zasua ma a gɛ́ɛ é pá a Eezuɛ-ŋai kélee yɛ̂ɛ berei dísuui káa lai a ŋ̀ele-wâla pɛpɛi. È gɛ́ ǹûai dí pá dí tɔ́ɔ Yâwɛɛ ŋɛ́i túɛ díkpulu ma yɛ̂ɛ berei dísîi káa lai. Ǹúu sîi nyíi ŋa pâi ziɣêi zui, zu-ƃela da pâi pâi dí tɔ́ɔ díkpulu ma yɛ̂ɛ berei díkolii káa lai.

¹⁵ Gɛ̀ ní gólii nyíi ŋa pâi ziɣêi zui, zu-ƃela dí tɔ́ɔ díkpulu ma yɛ̂ɛ berei díkaa-laai káa lai. Gáa-laai nyíi ŋa pâi ziɣêi zui, zu-ƃela dí tɔ́ɔ tɛi-tɛi yɛ̂ɛ berei díkaa-laai káa lai. Ǹúui nyíi ŋa pâi gâai a gɛ́ɛ ǹyaa ƃé zãâi sîɣe nyíi gáa a ḿbɔɔi, da pâi m̀aa-nûui kéreniî a ŋɔŋ da zãai kélee gáa ǹyêei, kpɛ́ni fêi, maa ǹúui a ŋákono-têei kara, a pá a ŋumɛ Eezuɛ-ŋai pɔ́.”

¹⁶ Nya ƃe Zasua è mù sìɣe a ŋ̀ele-wala pɛpɛi é pá a Eezuɛ-ŋai kélee Yâwɛɛ ŋɛ́i dísîi ma tɛi-tɛi. È Zuda ŋɔsîi su-ƃelai sôŋ.

¹⁷ Nya ƃe è pà a Zuda ŋɔsîi su-ƃelai, Yâwɛɛ é Zera ŋɔsîi su-ƃelai sóŋ. Nya ƃe è pà a gbakolo-ŋai tɛi-tɛi, Yâwɛɛ é Zadí ǹônii sinaai sóŋ.

¹⁸ Ǹyaŋ è pà a Zadí ǹônii sinaai é dí tɔ́ɔ Yâwɛɛ ŋɛ́i. Yâwɛɛ è Eekãŋ sôŋ. Eekãŋ è kɛ̀ a Kamii ǹóŋ. Kamii è kɛ̀ a Zadí ǹóŋ, Zadí kɛ́ ƃò a Zera ǹóŋ. Dí kɛ̀ a Zera è kùla Zuda ŋɔsîi su-ƃelai da.

¹⁹ Nya ƃe Zasua è mò Eekãŋ ma ǹyɛɛi, “Ńoŋ, ƃaa kɛ́-maa tɛ́ɛ Eezuɛ Ŋɔɣâlai Yâwɛɛ pɔ́ í dɔ̃yâi ƃó ŋ̀ɛ́i. M̀ó ma mɛnii ƃâa gɛ́i. Ífe ǹoo ma.”

²⁰ Nya ƃe Eekãŋ è Zasua wóo su tòo ǹyɛɛi, “Tɔ̃yâ ma ŋâa sɔnyɔ̂ŋ kɛ́ a Eezuɛ Ŋɔɣâlai Yâwɛɛ, ǹyaŋ m̀ɛnii ká ŋí ŋá gɛ̀i.

²¹ Tãi ŋá zãâi su kàa lai, ŋá Babeloŋ yokpo lɛ́lɛɛ tɔnɔ kàa zu, káne pãŋ lɔ́ɔlu da gôo pãŋ tɔnɔ. Ǹyaŋ díkɛ̀ a dílɛlɛɛ a ńîa ŋá dísiɣe. Ŋá dílòo ǹɔii mu ŋáƃûui mu. Gánei káa mù-pere.”

²² Nya ƃe Zasua è kuluƃa-ŋai tɛ̀ɛ Eekãŋ ŋɔƃûui mu a maa félaa. Dí liɛɛi, dí zãai kàa ǹóɔɔ ǹɔii mu gánei kɛ́ ƃò dímu.

²³ Dí zãai kùla ǹɔii mu dí pá la Zasua pɔ́ da Eezuɛ-ŋai kélee. Zasua-ni dí lì a zãai kélee dí bú Yâwɛɛ ŋɛ́i túɛ.

²⁴ Nya ƃe Zasua da Eezuɛ-ŋai kélee dí Zera ǹóŋ Eekãŋ sòŋ, dí gánei síɣe, ǹyokpoi, gôoi, ǹônii sinaai da nɛyâai, ŋɔniŋa-ŋai ŋɔwɛlɛ soo-ŋai, ŋɔƃála-ŋai, ŋɔƃûui da ǹyêei sãa kélee dí lí a dia-ni Eekɔɔ potoi su.

²⁵ Dí serɛɛ naai, Zasua è mò ma ǹyɛɛi, “Yaâ kúpili mɛni kpɔ̂lu su kɛ́tɛ su. M̀ɛni ma, Yâwɛɛ a pâi sâa mɛni kpɔ̂lu su kɛ́tɛ lâai yâ.” Nya ƃe Eezuɛ-ŋai kélee dí Eekãŋ sɔ̀ɔ a kɔni da ŋɔnûai, dí dípoma kéreŋ a ŋɔŋ.

²⁶ Dí kɔni támaa pù Eekãŋ-ni luu mɛi. M̀aa kɔni-ŋai káa naa é tóo sâa ma. Eekãŋ paá pôlu ma, Yâwɛɛ è ǹíi ŋáa yèŋ Eezuɛ-ŋai dîa. M̀ɛni ma dí gwaai ŋí ma láa sèe a Eekɔɔ Potoi ǹyaŋ ǹaa láa káa tí é tóo sâai ŋí ma.