Zakari 4 - Bible

Laŋpo-see-teƃelei maa zĩ̂ai

¹ Ŋ̀âla-taa-kelai nyii kɛ̀ lônoi ḿbɔi, è pà ŋɔ́nɔ é ŋ́ɛi lá ƃó yɛ̂ɛ ǹyaa ƃé ŋá kɛ̀ nyîi.

² È ḿarê kɛ̀ ǹyɛɛi, “Lé ƃé ƃa gâai?” Ŋá ŋ̀óo su too ńyɛɛi, “Laŋpo-see têƃelei nyii gbɛtɛ̂ɛi a gôoi. Kawúlu káa seêni dôŋ-su-pere ƃɛ́i da ŋ̀úlɔi pù naai: Laŋpo lɔ́ɔlu mɛi-feerɛ káa seêni laŋpo-see têƃelei ŋá. Ǹyaŋ ŋɔŋ-pûi lɔ́ɔlu mɛi-feerɛ kɛ́ ƃò m̀éla tɛi-tɛi ma.

³ Wúlɔ-wuru feerɛ káa tɔɔ̂ni laŋpo see têƃelei m̀éla veerɛ ma.”

⁴ Nya ƃe ŋá Ŋ̀âla-taa-kelai marê kɛ̀ ńyɛ̂ɛi, “Ŋánuu-namui, zãâi ŋí díkaa lé mɛni ma?”

⁵ È ḿarê kɛ̀ ǹyɛɛi, “Ífe gɔ́lɔŋ?” Ŋá ŋ̀óo su tòo ńyɛ̂ɛi, “Fé díkɔlɔŋ, Ŋánuu-namui.”

⁶ Ŋ̀óoi Yâwɛɛ è mò Zɛrubabɛɛ mai ǹyaa ká ŋí: “Kɔ́kɔ-sãa díwala-wâla-laai kpaa máŋ íwala-wâla-laai fêi, kɛ́lɛ ŋá-mɔ̂leŋ sârai ƃé ƃa pâi nyee-tɛɛ-maai sɔlɔ ƃôi la.

⁷ Lé ƃa yá, Óo ǹyee kɛ́tɛi? Ya pâi kɛ̂i a tiŋ-tiŋ kwaa ma Zɛrubabɛɛ ŋɛ́i. A pâi pâi a ǹyéei tí tôŋ-su kɔni, laɣi-woo kɛ́ ƃɔ̀ bôlu ǹyɛɛ, ‘Ƃɛlɛ-sêe, ƃɛlɛ-sêe káa ma!’ ”

⁸ Nàa pôlu ma, Yâwɛɛ ŋɔwóoi è pa ḿbɔ ǹyɛɛi,

⁹ Zɛrubabɛɛ yée ƃé bɛ́rɛi ŋí kɔ́ɔ pìlaŋ. Ǹyaŋ ǹyée nɔ́ ƃé pâi gbɛɛ̂i. À kɛ̀ tí ƃa pâi gɔ́lɔnîi a gɛɛ Yâwɛɛ ƃé ńdɛ̀ɛ kápɔ naa.

¹⁰ Ǹúui a ŋ̀ɛi nàŋiŋ sɛŋ-lôŋ mɛi, a pâi máŋ lii-nɛ̃̂ɛ kulâi, ǹyaŋ a pâi sɛŋ-kɔ̂ɔŋ-sɛŋ kâai Zɛrubabɛɛ yêei. “Yâwɛɛ ŋɔŋɛ́i-gao lɔ́ɔlu mɛi feerɛi ŋí ƃé ǹɔii kélee su kâai.”

¹¹ Nya ƃe ŋá m̀arê kɛ̀ ńyɛ̂ɛi, “Ŋ̀úlɔ-wûru feerɛi ŋí dɔnɔ káa laŋpo see-têƃelei laa-mii-yee mɛi da kɔɔ-yee mɛi, díkaa lé mɛni ma?”

¹² Nya ƃe ŋá m̀arê kɛ̀ veerɛ ɣelei ńyɛɛ mai. “Ŋ̀úlɔ-wûru woŋo feerɛi ŋí tɔɔ̂ni gôo kɔli feerɛi kɔlɛ nyii ǹóai kúa zu ƃɛ́i ŋ̀úlɔi a pû naai, díkaa lé mɛni ma?”

¹³ È mò ḿâ ǹyɛɛi, “Ífe m̀ɛnii kɔ́lɔŋ zãâi ŋí díkaa m̀ɛni mai?” Ŋá ŋ̀óo su tòo ńyɛ̂ɛ mai, “Kpao, ŋánuu-namui, fé gɔ́lɔŋ.”

¹⁴ Nya ƃe è mò ḿâ ǹyɛɛ, “Dia ƃa gbakolo feerɛi Kúnuu-namui nyii gáa ǹɔii kélee mɛi a dísiɣe zu é wúlɔ pú díŋûa a gɛɛ dí tíi kɛ́ mì.”