Woolaa 5 - Bible

Maloŋ kâa maa Ɣâla fɛliɛ́ɛ

¹ Óo Yâwɛɛ, m̀ɛni kpɔ̂lui a láa kûai, maa mɛni kíli é lɛ́ɛ íŋa. Kúkaa, í m̀baa kula-maai káa sɛ̀lɛŋ kûai.

² Ŋɔ̃́ya-ŋa da kúkɔ̃liŋ kélee síɣe a dí pɔ́ɔ, lɔii da kpɛ́ni su-ƃela da see kúkɛ̂i.

³ Kúnâŋ-ni dífe ŋɔ́nɔ ma. Kúlee-ni da lɛɛ a pɔɔ-nɛyaa.

⁴ Ǹyái kwa gbèlei, da gɔi kwa gèreŋ, fɛ̂ɛ kú dí yá.

⁵ Kúkpɔara-ƃelai dí káa kúkpɛ̂i a gbanaŋɔɔ. Kɔlɔ a kpɛɛ kûa kɛ́lɛ dífa ǹɛɛ naa kú kúfii tɔ́ɔ.

⁶ Kú kúkpîŋ tɛ̀ɛ Ize-ŋai da Asiria-ŋai pɔ́ mii-sãa mɛni ma.

⁷ Kúnâŋ-ni dí sɔnyɔ̂ŋ kɛ̀, kɛ́lɛ dífe ŋɔ́nɔ ɣele ma. Kúkaa mɔ̃̂lɛi dísɔnyɔ̂ŋ mɛni ma.

⁸ Kú káa nâa luɛ-ŋa yée mu, ǹyaŋ núu da fé naa a gɛɛ é kúŋuŋ ma ƃó.

⁹ Kú kúlɛ̂wo sèe a sɛ́ɣɛ kúkɔnɔ̃ŋ mɛni ma, kpɛ́ni fêi, ƃóa-sɔkpɔ-ŋa dí kɛ̀ nɔ́ gbâlaŋ-ŋai ŋá.

¹⁰ Puru a gɛ́ kúkɔlɔ a fãa kûa, yɛ̂ɛ da ŋɔŋ pû kpólo kpɛtɛ-sɛŋ-folo mu.

¹¹ Dí kúnɛyâai tèe-perei a tɛɛ-ŋa Zãiyɔŋ yeei ma, dí kúlônii-nɛyɛɛi tée perei Zuda taa-ŋai su.

¹² Dí kúlɔii kâloŋ-ŋai sɛ̂lɛŋ a ɣɛli dí sáa. Ƃaa kɛ́-maa fé ŋɔ́nɔ naa kúnuu pɔ̂lɔ-ŋai mɛni ma.

¹³ Kúnyáŋkpa-ŋai dí kɛ̀ mɔ̃̂lɛi m̀ii-sãa táŋ kwaa-ŋai ma yɛ̂ɛ luɛ-ŋa, zinâa-nɛyãai dí kɛ́ mɔ̃̀lɛ kɔi-ɣiri wuyɛɛ-ŋa mu.

¹⁴ Ǹúu pɔ̂lɔ-ŋai dí fa ŋɔ́nɔ sèe zĩɣaŋ ŋɔkóraŋ lá. Ǹyaŋkpa-ŋai dífa ŋɔ́nɔ pɔ̀ri ɣale-sɛŋ da ɣalêi.

¹⁵ Kúlii-nɛ̃ɛi a pene a maloŋ tôo-maa, maloŋ tôo-maa a kúlii-nɛ̃ɛi mãlai pɔ́ɔ ŋá síɣe.

¹⁶ Gâloŋ ƃɔrɔi kɛ̀ kúŋûai, a kula naa a too. Mɔ̃́lɛ-laa a pá kúpɔ kpɛ́ni fêi, kwa sɔnyɔ̂ŋ kɛ́.

¹⁷ Líi kɔlɔ-fela a pɛlɛ kûa, kúŋɛi fé ŋɔ́nɔ kwaa kâai a ǹɛ́lɛɛ.

¹⁸ Zãiyɔŋ yeei ma a lɛɛ fóŋ-kpoŋ. Ǹaa a lɛɛ nɔ́ a lɔɔ-ɣîla-ŋa kɛ̂i.

¹⁹ Yá, óo Yâwɛɛ, íkaa a kâloŋ wɔ́lɔ-wɔlɔ da wɔlɔ-wɔlɔ. Ya pâi kɛ̂i nɔ́ la, í maa fa wɔ́lɔ fàleŋ.

²⁰ Í nìa kûa a tãi su kôyaa lé mɛni ma? Kúmaa mɛ̂ni kíli a pâi ŋɔ́nɔ kɛ̂i íŋa?

²¹ Óo Yâwɛɛ, kúŋuŋ ma ƃó kú pá pôlu ŋɔ́nɔ ípɔ. Kúɣele kûu-ŋai kɛ́ yɛ̂ɛ berei dí kɛ̀ la a bɔlɔi.

²² Ya íyee kúla nɔ́ ƃé ŋí kú mu wɔ́lɔ-wɔlɔ da wɔlɔ-wɔlɔ? Ílii ŋwânai kóyaŋ fé ma kúmɛni ma?