Woolaa 4 - Bible

Ǹûai dí mɔ̃lɛ Zerusâlɛŋ toɔ́ɔ pôlu ma

¹ Ka gáa berei gôoi fé ŋɔ́nɔ fôloi lai. Gôo kpîŋ-kpiŋ maa a fáleŋ. Ŋ̀âla-pɛrɛ Kɛ́tɛi mu koni maa-waa-ŋai táa-taai daa lêei su.

² Zãiyɔŋ ǹyaŋka-ŋai mɛni è kɛ̀ a gbanaŋɔɔ kûa yɛ̂ɛ gôo. Kɛ́lɛ dímaa mɛni a kɛ́ nɔ́ yɛ̂ɛ pɔ̂rɔ leɣi-ŋa.

³ Lɔɔ-ɣîla-ŋa kpîŋ da ŋíni tɛ̀ɛ dílônii pɔ́. Kɛ́lɛ ŋánûai díkaa yɛ̂ɛ dua-too ŋɔ̂ni nyii gáa vɛ̃ɛ-kpâlaŋ sui. Dífe kpáani dílônii mɛni ma.

⁴ Kpele wɛ̂li a gɛ̀ dílônii nɛ́ŋ é kánaŋ, díkɛ́ sàa. Dílônii da mii-sãa fɛ̀li, kɛ́lɛ núu da fa kpɔŋ mâa tɛɛ dípɔ.

⁵ Ǹûai ŋí kɛ̀ a mii-sãa lɛ́lɛɛ mii-ƃelai, da kɛ́ nɔ́ nâa tɔɔ̂-ni pere lêe-ŋa dîa a puru. Ǹûai ŋí kɛ̀ a dílâai lɛ́lɛɛi, da kɛ́ nɔ́ toôi túluŋ ŋá.

⁶ Ŋánûai díwɔ̂ mɛni kula maa kɛ́ɛi tɛɛ̂i Sodɔŋ-ƃelai díwɔ̂i ma, nyii Ɣâla è gɛ̀ a dia a m̀aa félaa, núu da fé kɛ́ ní naa é tɔ́ɔ berei.

⁷ Ŋɔnyáŋkpa-ŋai dí kɛ̀ fôloi é tɛ́ɛ yee fũa ma, dí kɛ́ kòle é tɛ́ɛ niŋa ŋini-ya ma. Dí kɛ̀ a díkɔlɔi ponoɔɔ, díwala-walaa, díkpono kɛ́ fòlo yɛ̂ɛ kɔni sɔ̃ɔ kpanaŋɔɔ.

⁸ Kɛ́lɛ daâ tɛi, dítɛi a tɛɛ luru tɛ̂i su-kpiniɛɛ ma. Núu da fé ŋɔ́nɔ díkɔlɔŋ bere lêe-ŋai ma. Díkɔlɔ a fɔ̃ya dîa yɛ̂ɛ wúru.

⁹ Diai dí dípàa a ƃóa-sɔkpɔ-ŋai, dímaa nɛ̃ɛ̂i é tɛ́ɛ diai dîa puru ŋánaa è dípàai. Dílɛ̂wo é kɛ̀ kpɛɛ̂i díkponôi, mii-sɛŋ da fé naa dí mii.

¹⁰ M̀ɛni kpɔ̂lui pà ŋánûai pɔ́ daa lêei sui, è gɛ̀ wɛli kɛ́-maa lee-ƃela dí kɛ́ dílônii kɛ̀ a mii-sãa, dí kɛ́ dímîi.

¹¹ Yâwɛɛ è ǹíi ŋwàna a ŋánaa, é ŋɔŋ tóo Zãiyɔŋ ma, ǹaa é kéreŋ.

¹² Ŋ̀éniɛi su kaloŋ-ŋai da ǹɔii-ŋuŋ da kpɛ́ni su-ƃelai da fé kɛ́ ní a ǹáa la, a gɛɛ kɔ-kuluƃa da a pɔ̂ri kɛ̀ tɛɛ̂i Zerusâlɛŋ galai lá é tɛ́ Zerusâlɛŋ.

¹³ Kɛ́lɛ Ɣâla ŋɔlóno kɛ́-ƃelai da zâla láa-soŋ-ƃelai dísɔnyɔ̂ŋ ƃé gɛ̀ nyíŋi é kɛ́. Dí gɛ̀ nûa sɔŋ lɛ́lɛɛ-ŋa dí sáa daa lêei su.

¹⁴ Dí kɛ̀ nɔ́ siâi bere lêe-ŋai ma yɛ̂ɛ ŋɛi-pu-ƃela. Ŋãa è kɛ̀ díyee ma. Núu da fa pɔ̂ri kɛ̀ ǹyée lɛɣɛ̂i da ŋɔseɣei ma.

¹⁵ Ǹûai dí kɛ̀ lâɣii dîa dîyɛɛ dîai, “Ka kula ƃɛ́ ká lí, ká maa fé waa ní. Ka lí, káfe lɛ̀ɣɛ kúta ma.” Díkɛɛ tɛɛ-tɛɛi, ǹɔii su-ƃelai da-ŋa dí mò dîyɛɛi, “Díta fé pâi wɔ́lɔ lɛɛ̂i ǹɔii ma ƃɛ́!”

¹⁶ Yâwɛɛ ǹyaa kpîŋ è dítàa-tàa, vé ŋɔ́nɔ kɛ́ ní a gbaaŋɔɔ dí ta mɛni ma. Ŋumɛ mâa fé kɛ́ ní ŋɔ́nɔ naa zâla láa soŋ-ƃelai mɛni ma, kpaa máŋ dínuu pɔ̂lɔ-ŋai.

¹⁷ Kú lɛ̀ɛ kpɔŋ mâa nuu perêi kâai kúfii é kpɛ́ɛ. Kú tɛ̀ yeŋkêŋ ŋá kú kɛ́ lɔii-ŋuŋ da maa kpɛ̂ŋ nyii va pɔ̂ri kɛ̀ kpɔnîi kûai.

¹⁸ Kúkpɔara-ƃelai dí kɛ̀ tɔɔ̂ni dí kɛ́ kúmaa kpɛ̂ɛ. Pɔri mâa fé kɛ́ ní kûɛ a gɛɛ kú sía bere lêei-ŋai da ma daa lêei su. Kúfulu-laai kpɛɛ-ŋa tãi è nâa sèri.

¹⁹ Kúkpɔara-ƃelai dí kɛ̀ kúkpɛ̂i a kîrɛ. Dí kîrɛ kɔɔ è kɛ̀ a dɛɛ́ kuɛ ma tãi a kɛ̂ kɔɔ̂nii lai. Dí kɛ̀ kúkpɛ̂i ǹyée-ŋai ma, dí gbã tée kúperêi vɛ̃ɛ-kpâlaŋ su.

²⁰ Dí kúkâloŋ sôŋ nyii Yâwɛɛ è nɛ̀i, nyii kúkili è kɛ̀ ma a gɛɛ é kú maa kɔ̃ɔ kú kpɔara-ƃelai yêei.

²¹ Káai a Idɔŋ da Uzi-lɔii su-ƃelai, ka ɣɛ́lɛ, ká lii-nɛ̃ɛ kula. Kɛ́lɛ káwɔ̂ mɛni kpɔlui maa tãi a pâi. Ka pâi kɛ̂i siâi taka-taka yɛ̂ɛ lɔɔ kpele-ƃela, ká kɛ́ kákaŋ lɛ̂.

²² Óo Zãiyɔŋ-ƃela, kâa nâa kásɔnyɔ̂ŋ fela fêi kɛ́. Káfe ŋɔ́nɔ pâi kɛ̂i luɛ lâa su a zu kôyaa. Kɛ́lɛ à kɛ̀ a káa óo Idɔŋ-ƃela, Yâwɛɛ a pâi ká kula maa kɛ̂i. Ká mɛni nyɔ́mɔɔ-ŋai a too pono ŋá.