Woolaa 3 - Bible

Tɔŋ kpɛ́-maa da kili kɛ̀ zú

¹ Ńyãa ƃa ǹúui dɔ̀nɔ nyii berei kɔ́lɔŋ Ɣâla ŋɔmɛni kula maai kɛ́-pere káa lai.

² A ŋ́gbɛ, a gɛ́ ŋ́gɛ sìa kpînii.

³ A ŋ́gula maa kɛ́ a ŋánaa a kpíni da fólo.

⁴ A ŋ́gao ɣále ŋ́gbonôi, a gɛ́ ŋ́gɔlɔ a fɔ̃ya ḿâ, ńuu kɛ́ lula ŋ́gɔlɔ̂i.

⁵ A ǹyée pɛ́lɛ ḿâ, a ḿaa tínaŋ a mɛni kpɔ̂lu da lii ŋwâna.

⁶ A gɛ́ ŋ́gɛ ƃò kpînii yɛ̂ɛ nuu ƃé a saa a tãi su kôyaa.

⁷ A siɣaŋ tínaŋ ḿâ, fa pɔ̂ri pûi. A ńdoo yɔlɛ ŋá, fa pɔ̂ri pûi.

⁸ A nɛ̃ɛ ma ŋá wɔ́lɔ, va ŋ̀óli tɔ̀ɔ mâ.

⁹ A ḿberêi kpáaŋ a kɔni. A ńzia-perei kpínaŋ.

¹⁰ A ḿaa kpɛ́ŋ-nii yɛ̂ɛ dítala ƃé sua maa kpɛ́ŋ-nii, gɛ́ pìli, gɛ́ pà ḿâ yɛ̂ɛ yala-sulu.

¹¹ È ŋ́gâla, é ŋ́gula berei su é ńzu tée-tee é ńɛɛ naa é lí.

¹² È ŋɔkerâŋ ŋáa tɛ̀ a gɛɛ é ḿoŋ a ŋɔtɔ̃ai.

¹³ È ḿòŋ a ŋɔtɔ̃ai ńii-gbɛ̃ ma.

¹⁴ Nûa da kɛ̂ nɔ́ ɣɛ́lɛ maa kulâi ŋ́gbônoi a ɣele kélee. Ŋ̀ulei kélee da dòoi, da ɣɛ́lɛ maa kûla ŋ́gbonôi.

¹⁵ À gɛ́ mɛni sôli a kɛ́ a ŋ́gɔnɔ̃ŋ da ŋ́gbele-sɛŋ.

¹⁶ A ńa kîiŋ muluŋ su a ńyiŋ ɣále a gɔni-kayaŋ.

¹⁷ Lii-see fé ŋɔ́nɔ ńyêei. Lii-nɛ̃ɛ mɛni fé ŋɔ́nɔ ŋ́gili ŋá.

¹⁸ Ŋá kɛ-ɣeniɛi su fé ŋɔ́nɔ kôya-ni. Kili kɛ zu fé ŋɔ́nɔ ńyêei Yâwɛɛ mɛni ma.

¹⁹ Ŋa mɔ̃lɛ̂i, ŋ́gɛi fé ma. M̀ɛnii ŋí kíli a tòo ŋá, ńii a tôo pôlu a ŋánaa.

²⁰ Ŋa ŋ́gili ŋá sìa é pîlaŋ m̀ɛni-ŋai ŋí dîa, ńii a tôo pôlu a ŋánaa ŋámɔ̃leŋ su.

²¹ É máŋ kɛ́ tí, ŋa ŋ́gili ŋá sìa é pîlaŋ yâ, kili kɛ-zu káa ńyêei.

²² Yâwɛɛ ŋɔwɛli kɛ́-maa kɛ́tɛi kúmɛni mai, góyɛŋ fé ma. Ŋɔmaloŋ kâai kóyɛŋ fé ma.

²³ Ŋɔwɛli kɛ́-maai da ŋɔmaloŋ kâai káa nɔ́ a nina a ɣele kélee. Ŋɔteniŋ ƃô-laai kɛ̂tɛi.

²⁴ Nya ƃe ŋá mò ńyɛ̂ɛi, “Yâwɛɛ káa a ŋá mɛnii kélee. Ŋa pâi ŋ́gili kɛ̂i mà.”

²⁵ Yâwɛɛ ŋɔmɛni lɛ́lɛɛi káa naa diai mɛni ma díkili káa mài, da diai da gɔ̀rii.

²⁶ Ǹɛ̂lɛi kú Yâwɛɛ maa kpɛ́ŋ a lii kpêle a gɛɛ é kúŋuŋ maa ƃó.

²⁷ Ǹyaŋ ǹɛ̂lɛi kú ǹíi kpêlei ŋí maa kɔ́ri a tãi kú káa la kúnuu ŋûnu kɔlɔi.

²⁸ Kwa kɛ̀ mɛni-soli kâai, fɛ̂ɛ kú sée a lii kpêle pere kú maa kpɛ̂ŋ kɛ́.

²⁹ Fɛ̂ɛ kú pɛ́lɛ gɔ́ɔ mu a ƃɛlɛ-pere. Tãi da kili kɛ-zu a pâi kɛ̂i naa kúmɛni ma.

³⁰ Núu da a kú lòkwa, é kúƃɛlɛ tóo, kwaa kúyee sée gélee mù.

³¹ Kpɛ́ni fêi, Ǹuu-namui fa ǹyée kùla núu da mu wɔ́lɔ-wɔlɔ da wɔlɔ-wɔlɔ.

³² Berei máŋ a pâ la a lii-too pôlui, maloŋ kâa káa ǹyêei. Ŋɔwɛli kɛ́ maa kɛ́tɛi kóyaŋ fé ma.

³³ Ǹíi-nɛ̃ɛ mɛni fa núu da kɛ́ mɔ̃̀lɛ, kpaa maloŋ too-maa é kɛ́ núu da ma.

³⁴ Da ƃɔ̀rɔŋ diai dîa díkaa kpini pɛ̂rɛ mui,

³⁵ dí núu da kpera a gɛɛ vé lì Ŋ̀âla Kɛ́tɛi, ŋɛ́i túɛ,

³⁶ dí wôya mɛni ŋa tée a núu da, Ǹuu-namui è gélee kɔ́lɔŋ.

³⁷ À kɛ̀ Ǹuu-namui a wàla fáa ma, kwa pɔ̂ri mɛni da ƃôi a gɛɛ é kɛ́, m̀aa mɛ̂nii é kɛ́?

³⁸ Ŋ̀âla Kɛ́tɛi lá ƃé mɛni nyɔ́mɔɔ da ǹɛ́lɛɛ a kûla naa.

³⁹ A núu da kùla maa kɛ̂ ŋɔsɔnyɔ̂ŋ mɛni ma, m̀aa nûui a ŋuŋ su-woo sàa lé mɛni ma?

⁴⁰ Kwa kúkpîŋ maa kpɛ́ɛ kú tínaŋ pôlu Yâwɛɛ pɔ́naa-pere.

⁴¹ Kwa kúlii da kúyee lá ƃó Ɣâla mì kú vɛli, kûɛ mai,

⁴² “Kwa sɔnyɔ̂ŋ kɛ́ a yá, kwa tɔɔ yâ, ǹyaŋ ífe kúsu mɛni lɛɛ̂i.

⁴³ “Ya ílii ŋwána, íkɛ kú kpɛ́, íkɛ kú su kàra. Ífe kúmalôŋ káa ní.

⁴⁴ Ya ímɛi pɛ́lɛ a ɣele-kɔlɔŋ a gɛɛ ífe kúfɛli-wooi mɛ̂ni.

⁴⁵ Ya gɛ́ nûa dífa díyee sèe kúmu ŋ̀éniɛi su.

⁴⁶ “Kúkpɔara-ƃelai da díla tɔɔ̂i kûa.

⁴⁷ Mɛni kpaya-kpaya da kulâi nɔ́ kûa, kúsu kɛ́ kàra. Kwa yaôi, ŋuŋ ma ƃô fé kúyêei.

⁴⁸ Ŋánûai su-kara pere a gɛ̂i ŋ́gɛ wɔ̀lɔ ŋ́ɛi-ya kɛ́ yèŋ yɛ̂ɛ ya lêe.

⁴⁹ “Ŋ́ɛi ya a pâi kɛ̂i nɔ́ pûi, góyaŋ fé mà,

⁵⁰ é lɛ́ɛ la zu Yâwɛɛ é lɛ́ɛ Ɣâla-taa é ḿbɔ naa pêre káa.

⁵¹ Lii too pôlu káa ḿâ m̀ɛni-ŋai mɛni ma kɛ̂i a ǹɛyâai daa lêei sui.

⁵² “Ŋ́gbɔara-ƃelai díkaa ŋ́gɔ̂rii yɛ̂ɛ wɔ̃ni, berei máŋ fé tá mɛni nyɔ́mɔɔ da kɛ́ ní la a diai.

⁵³ Dí ḿbili lôai a ḿvulu, dí kɔni-ŋa pú ḿɛi.

⁵⁴ Ǹyái è ḿɛi pɛ̂lɛ. Ŋá kɛ̀ gâai ŋa pá saâi.

⁵⁵ “Ŋá kɛ̀ ǹóai kpóŋ ma ŋá láɣi a ílaa, óo Yâwɛɛ.

⁵⁶ Ǹyaŋ tãi ŋá wɔ̀lɔ la yâ kpɔŋ mâa mɛni mai, í íwoli tɔ̀ɔ ḿâ.

⁵⁷ Tãi ŋá ítòli lai, í lɛ̀ɣɛ a ńyãa yɛ̂ɛ ḿâi, ‘Ífe yào.’

⁵⁸ “Óo Ǹuu-namui, í pà ŋáwɔlɔ-wooi ma, í ŋ́uŋ ma ƃó.

⁵⁹ Óo Yâwɛɛ, ya m̀ɛni nyɔ́mɔɔ-ŋai káa da gɛ̂i a ńyãai. Ŋá mɛnii ŋáa tée a ǹɛ́lɛɛ.

⁶⁰ Í m̀ɛni nyɔ́mɔɔ-ŋai kɔ́lɔŋ gbɛtɛ̂i dílii su é pîlaŋ ḿâi.

⁶¹ “Óo Yâwɛɛ, í díwòo yɔ̂ŋ-ŋai mɛ̀ni dí bìli ḿâi. Mɛni nyɔ́mɔɔ-ŋai dí gbɛ̀tɛ a gɛɛ dí gɛ́ a ǹyãai, í gɔ́lɔŋ.

⁶² Ŋ́gbɔara-ƃelai díkaa mɛni nyɔ́mɔɔ kpɛ̂tɛi é pîlaŋ ḿâ a ɣele kélee.

⁶³ M̀ɛnii kélee da kɛ̂ gɛ̂i, da kɛ̂ nɔ́ ɣɛ́lɛ maa kulâi ŋ́gbonôi wule-woo su a ɣele kélee.

⁶⁴ “Dísɔnyɔ̂ŋ-ŋai gula maa kɛ́ a dia, óo Yâwɛɛ.

⁶⁵ Gɛ́ díkili-ŋa é tɛi, í dínaɣaŋ láa.

⁶⁶ Óo Yâwɛɛ ílii ŋwânai su, dí kɔ́ri ƃɛ́i kélee da lɔ̂ naai, í dísu kara. Dítɔnɔ da kpîŋ fé lɛ̀ɛ ŋ̀éniɛi su.”