Woolaa 2 - Bible

Zerusâlɛŋ ŋɔtɔŋ kpɛ́-maai

¹ Ǹuu-namui è ǹíi ŋwàna Zãiyɔŋ ma é m̀ɛi pɛ́lɛ a kpíni. È ŋɔkɛ́tɛ-laai kùla ǹyêei é nàa lɛɛ a pilêŋ ŋá. È ǹyée kùla Ŋɔɣâla-pɛrɛ Kɛ́tɛi mu a lii ŋwâna.

² Ǹuu-namui è ǹíi ŋwàna Zeeka ŋɔnûai dîa é dí kɛ̂i kara. Vé dímalôŋ káa ní. Ziɣãŋ-ŋai kɛ̀ a dínaŋɔɔ ŋɔlɔii mai, è gélee wòlo. È ƃâa kùla ŋɔlɔii ma da m̀ɛi kâloŋ-ŋai.

³ È ǹíi ŋwàna Eezuɛ ma é ŋɔwála-walai kúla ǹyêei. È ǹyée kùla berêi a gɛɛ ŋɔkpɔara-ƃelai yée é pɔri mà. A Eezuɛ kêreni gbonôi yɛ̂ɛ ŋɔŋ sôŋ ƃé gɔlɛ ma sãa kêrenii.

⁴ Kerâŋ káa ǹyêei gɛ́ nɛ̀ kûa yɛ̂ɛ kúkpɔara-ƃela. Diai kú dí wɛ́linii, a kélee páa. È ǹíi ŋwàna Zãiyɔŋ ma é ŋɔnûai kéreŋ yɛ̂ɛ ŋɔŋ.

⁵ Ǹuu-namui è Eezuɛ su-kara yɛ̂ɛ berei núu kpɔara-nuu a gɛ̀ la lai. È ŋɔkili tɔɔ maa kwaa-ŋai ma kélee su kàra, é ŋɔkâloŋ pɛrɛ-ŋai kélee wólo. È Zuda ŋɔmaloŋ toô-maai da ŋɔwɔ́lɔi su kɛ̀tɛ.

⁶ È Ŋɔɣâla-pɛrɛ Kɛ́tɛi su kàra é ǹaa kɛ́ yɛ̂ɛ sûai. È ŋɔɣele kûu maa waa-ŋai kula mɛni kpèra da Vii-tɔɔ-ɣelei. È ǹíi ŋwàna a zu kɛ́tɛ gâloŋ da zâla láa-soŋ-nuui ma.

⁷ Ǹuu-namui ǹyée kùla ŋɔsâla kula kwaai ma mɛni mu da Ŋɔɣâla-pɛrɛ Kɛ́tɛi. È kùla ŋɔkâloŋ-pɛrɛ-ŋai dísiɣãŋ-ŋai perei é naa tɛɛ ŋɔkpɔara-ƃelai pɔ́. Ŋɔkpɔara-ƃelai dí làɣi a zu kɛ́tɛ a lii nɛ̃ɛ Ŋ̀âla-pɛrɛ Kɛ́tɛi mu yɛ̂ɛ nya ƃe da kɛ̀ kúu kɛ́tɛ kɛ̂i yɛ̂ɛ berei kwaa kâa gɛ̀ la tãi kwa kâa kɛ̀ vɛlîi lai.

⁸ Yâwɛɛ è gbɛ̀tɛ a gɛɛ é zĩɣaŋ wólo Zãiyɔŋ ma. È ǹaa kɔ̀ɔŋ é naa su kara. Da ŋɔyeŋkêŋ-ŋai da ŋɔsiɣãŋ-ŋai wólo.

⁹ Zĩɣaŋ lá kpɔŋ da zɔ́ɔŋ-too-sãai kélee wólo-woloi búɔɔ naa. Ŋɔkâloŋ da ŋɔtíi kɛ́-ƃelai da kɛ́ a luɛ-ŋa lɔii da kpɛ́ni-ŋa su. Dífe ŋɔ́nɔ dɔ̂ŋ lɛ̂i dímɛi káa mɛni ma. Zĩ̂a fa ŋɔ́nɔ tɛ̀ɛ a Yâwɛɛ ŋɔlóno kɛ́-ƃelai a gɛɛ dí ǹá-woo ƃó ǹûai dîa.

¹⁰ Zãiyɔŋ nuu-pɔlɔ-ŋai dí maloŋ seɣe tòo dîa dí muluŋ pú díŋûa, dí sée ǹɔii ma dímɛi saá. Ǹɛnî-kpela-ŋai dí díŋuŋ pîlaŋ ǹɔii ma.

¹¹ Ŋ̀wɔ́lɔi a ŋ́ɛi ŋá ŋána. Ŋa sôlii ŋ́gɔlɔi-pere. Ŋánûai su-kara pere a gɛ́ kɔlɔ a kpɛɛ ḿâ. Ǹîa-pɛlɛɛi da gwatâra-ŋai da fôai bere lêe-ŋai ma daa lêei su a puru.

¹² Dí dílee-ni marê kɛ̀ dîyɛ dîai, “Mí ƃé kúkɔnɔ̃ŋ a naai?” Dí fòa dí tóo bere lêei ma yɛ̂ɛ nûa ƃé mɛni ŋánaa a díkɛ. Dí kɛ̀ saâi dílee-ni yêei.

¹³ Óo Zerusâlɛŋ, ŋáwɛli kɛ́-maa taa-leei, yɛ̂ɛ ŋá kɛ́ lé yâ? Ŋa pɔ̂ri íŋanɛnɛ pere kɛ̂i léŋ? Núu da fé tá mɛni-soli káa ní ŋí. Ímɛni kpɔ̂lui su kɛ̂tɛi yɛ̂ɛ yúo. Gbɛ̂ɛ ƃa pɔ̂ri kpɔŋ mâa tɛɛ̂i ípɔi?

¹⁴ Ɣâla ŋɔlóno kɛ́-ƃelai da lɛ́ɛ tée-tee kɛ̂i yâ. Dífe dɔ̃yâ mɛnii ƃôi yâ nyii da gàa zĩ̂a sui. Da íkîrii dí kɛ́ ísɔnyɔ̂ŋ mɛni lòo. Mɛni-ŋai dí mò yâi, gáa a lɛ́ɛ, gɛ́ ƃò a núu piliɛɛ mɛnîi woo-ŋa.

¹⁵ Diai da tɛ̂ɛ yâi, da díyee ŋá lòkwa a laa kpâla maa-pere. Da ɣɛ́lɛ-maa kùla íkponôi, dí kɛ́ díŋuŋ kpɛ̂mɛŋ dîyɛɛi, “Daa lêei ŋí ƃé nûa da kâa kɛ̀ ma daa lêe lɛ́lɛɛi, dí kɛ́ m̀aa yôŋka teei?”

¹⁶ Íkpɔara-ƃelai da díla tɔ̀ɔ yâ. Da ɣɛ́lɛ-maa kûla íkponôi dí dísĩ̂a mii a yá dîyɛɛ yâi, “Kwaâ zu kara. Ŋ̀ele kûui ŋí ƃé kú kɛ̀ maa kpɛ́nîi. Kwaâ lɛɛ ɣele ma kwa gáa.”

¹⁷ M̀ɛnii Yâwɛɛ è gbɛ̀tɛi, aâ gɛ́. Aâ ŋ̀óoi ŋ̀aa-see kɛ́ nyii è m̀aa kôno-tee kɛ̀ kóraŋ támaa tɛɛ pôlu mai. È ísu kàra, vé íŋɛi malôŋ káa ní. È gɛ̀ íkpɔara-ƃelai dí íyee mɛi ɣále, dí sée ímɛi.

¹⁸ Óo Zãiyɔŋ, wɔ́lɔ a zu kɛ́tɛ Ǹuu-namui ma. Wɔ́lɔ ma a kpíni da fólo íŋɛi-ya é pú yɛ̂ɛ ya lêe. Ífe kpèra wɔ̂lɔi ma. Kɛ́ wɔ̂lɔi ma íŋɛi-ya kɛ́ pù.

¹⁹ Ímu-siɣe a kpíni í wɔ́lɔ mà. Wɔ́lɔ mà a ɣele ƃɔ̂i kpini. Íkili kɛ́ mà í gbera fé. Íyee tɛ́ ɣelei í vɛli ínîa-pɛlɛɛi mɛni ma. Ǹîa-pɛlɛɛi díkaa saâi a puru bere lêe-ŋai ma.

²⁰ Óo Yâwɛɛ, kúmalôŋ káa. Gbɛ̂ɛ ƃé ya tá tûa la a bere sîi kɛ́ɛ ŋíi? Gáa, ǹɛyâai da díkpɔɔi lonii miî. Da zâla láa soŋ-ƃelai da Ɣâla ŋɔlóno-ƃelai paâi ŋ̀âla fɛli kwaa-ŋai ma.

²¹ Ǹîa-pɛlɛɛi da ǹúu-pɔlɔ-ŋai da lâani bere-ŋai ma muluŋ su a dí poma. Da ǹyaŋkpa-ŋai da nɛnî-kpela-ŋai paâi a ƃóa-sɔ̂kpɔ. Ílii ŋwânai su, í gɛ̀ dí dípaa. Ífe dímalôŋ káa ní.

²² Í gɛ̀ ŋ́gbɔara-ƃelai dí tínaŋ ḿâ, díkɛ ḿaa yâo. Pere fé kɛ́ ní núu da yêei é pú a tãi í ílii ŋwàna lai. Ŋ́gbɔara-ƃelai dí ŋánûai su kàra nyii-ŋai ŋá dí wɛ́linii.