Wɛli 8 - Bible

¹ Îi kɛ̀ yɛ̂ɛ ŋálee-kaa saaƃɔlɔ kpîŋ, ƃɛ́i kélee kwa yá kûi kòyaŋ naai, ŋâi kpùlɔŋ yâ, ŋá ńa-gbɔ sèe yâ, ǹyaŋ núu da fêi mò ḿâ a gɛɛ ŋa mɛni nyɔ́mɔɔ kɛ́.

² Ŋ́âi pà liî a yá ńee ŋɔpɛ́rɛi lá, í wɛli kɛ́-maa lɛ́ ḿâ, ŋá ŋwã̂ai sumoɔ́ɔ tɛ́ɛ ípɔ da pɔmegurane-ya líyeŋɔɔ í gbèle.

³ Íkɔɔ-yee lɔ́ ŋuŋ ḿû, í ílaa-mii yêe kpíniŋ a ńyãa.

⁴ Zerusâlɛŋ nɛyaa, ka káfoo ńyêei a gɛɛ káfe pâi kúwôlii karâi tãi kwa kɛ̂ lâa-ni lai, é lɛ́ɛ la zu kú kúmu siɣe.

Ŋ̀ulei ǹɔ́ɔlu mɛi-dai Ǹɛyâai

⁵ Gbɛ̂ɛ ƃé ŋí kulâi vɛ̃ɛ-kpâlaŋ su, gɛ́ pà díɣîŋɔɔ ŋɔwɛ́lii mai? Ŋá íŋɛi lá ƃò âpɔ wurui mu, ƃɛ́i ílee è ímaa sɔlɔ ƃô naai.

Ǹɛnîi

⁶ Tɔɔ ŋá wɛli kɛ́-maa lîi é kɛ́ ílii su, gɛ́ ƃò íyee ma a ŋɛi kɛ́-maa sɛ̂ŋ ḿaa mɛ̂ni ma. Wɛli kɛ́-maa wála-wâlai yɛ̂ɛ saa, dóloɔɔ yɛ̂ɛ ƃolôŋ. A sôŋ, gɛ́ núu kèreŋ yɛ̂ɛ ŋɔŋ.

⁷ Yá fa pɔ̂ri wɛli kɛ́-maa ŋɔŋ líinîi. Ɣilîŋ yà fa tèla pɔ̀ri ŋ̀waâi núu ma. Núu da fa pɔ̂ri wɛli kɛ́-maa yâi a sɛŋ-kao. À gɛ̀ tí, m̀ɛlɛ a kpɛ̂ɛ goi, é ǹyée kúla mù.

Ǹɛnîi záaƃɔlɔ-ni

⁸ Kúlêɣe nɛ̀ni káa naa nyíi ŋ̀íni fé niî kula ní. Surɔ̂ŋ da à kɛ̀ wɛ̂lii é gula a nɛnî, lé ƃé kwa pɔ̂ri gɛ̂i?

⁹ À kɛ̀ a pɛ́rɛ-kâŋ, kwa pâi káne pɛrɛ tôŋ kôyaa tɔɔ̂i mì. À kɛ̀ a kpôŋ, kwa pâi m̀aa tínanîi a sîda wuru.

Ǹɛnîi

¹⁰ Ŋ́gaa a pɛ́rɛ-kâŋ, ŋ́ini kɛ́ ƃò a pɛ́rɛ tôŋ kôyaa-ŋa. Ŋá wɛli kɛ́-maa nûui a ŋ́gàa, ǹíi a lâa.

Zurɔ̂ŋ

¹¹ Kpɔmɔ kpâlaŋ káa Saloma yêei Bee Amɔ. A ǹaa tɛ̀ɛ nûa pɔ́ a gɛɛ dí tíi kɛ́ naa. Kpâlaŋ ŋá tìi kɛ́ nuu tɔnɔ a sɛŋ kao kole kpua-kpua wála tɔnɔ (1,000) kpɛ̀ɛ a gbâlaŋ ŋí zûti.

¹² Ƃía óo Saloma, zɛŋ kao kole kpua-kpua wála tɔnɔi (1,000) é lɛ́ɛ íyêei, ŋuŋ feerɛi é lɛ́ɛ kpâlaŋ mɛi káa-ƃelai yêei. Kɛ́lɛ ŋá kpɔmɔ-kpâlaŋ káa nɔ́ a ńyãa tɔnɔ ḿbɔɔ.

¹³ Ŋáwɛli kɛ́-maa nûui, yái tí zûai sui, lóno ŋa íwoo mɛ́ni. Ḿarâai da ŋ̀wɛ̂lii dí íwoo mɛ́ni máŋ.

Ǹɛnîi

¹⁴ Pá ḿbɔ naa ŋáwɛli kɛ́-maa nûui, yái íkaa yɛ̂ɛ tôai, íkɛ ƃò yɛ̂ɛ lóma nâɣa nyii gáa yée ma ƃɛ́i sãâ kúŋ-nɛ̃ɛ támaa káa naai.