Wɛli 6 - Bible

Ǹɛyâai

¹ Ƃíai a nɛnî lɛ́lɛɛ ŋánaai nɛyâa sámai, íwɛlii a lí mí? Ǹiî-pere lɛ́ kûa, a gɛɛ kú kpɔ́ŋ yâ kwa kâa-ni kú gɔ́ri.

Ǹɛnîi

² Ŋáwɛli aâ lí ǹyéei kwára ŋɔkúŋ sɛŋ nɛ̃ɛ suai su. Aâ lí a gɛɛ é kala ŋûnu kɔ́ri ŋɔtaa-tûlɛ-ŋai mɛ̂ni ma, é ŋɔ́nɔ wúru-pôa ŋáa tɛ́ gîe ma.

³ Ŋ́gaa a ŋáwɛlii pɔ́ɔ, ǹyaŋ gɛ́ ƃò a ḿbɔɔ. A ŋɔtaa-tûlɛ-ŋai ŋáa kɔ̀ŋ a kala ŋûnu.

Ŋ̀ulei ǹɔ́ɔlui Zurɔ̂ŋ

⁴ Ŋáwɛlii, ílɛ̂lɛɛi a ŋánaa yɛ̂ɛ Tiza taa-leei. Ílɛ̂lɛɛi a ŋ̀ánaa yɛ̂ɛ Zerusâlɛŋ. Í wála-wâlai yɛ̂ɛ kɔ-kûluƃa-ŋa ƃa kula kɔ́ ma ƃenâ kɛ́ ƃò díyêei.

⁵ Íŋɛi tínaŋ ƃɛ́ tí-pere. Íkaa ŋɛ́i-gbàna pilîi ḿâ gɛ́ gɛ̀ ńii mu kɛ́ sìɣe. Íŋuŋ-leɣa a kɛ̂i yɛ̀rɛŋ-yɛrɛŋ yɛ̂ɛ ƃoli kpûlu-ŋa ƃé da kula Gilia yeei su díkɛ yèŋ díleɣa kɛ́ kpɛ̃̀liŋ.

⁶ Ínyiŋ kolɛɛ̂i yɛ̂ɛ ƃála kôle-ŋa ƃé da díwaa. Ínyiŋ ŋáa pɔrîɛi íla. Da fé kula ní zu.

⁷ Berei pɔmegurane kpoma kpɔlɔ̂i lai, bere ƃé íkoma kpɔlɔ̂i la íŋɛi mɛi pɛlɛ-sêɣei mu

⁸ A nɛ̃ɛ ma kpîŋ nɛnî buu lɔ́ɔlu mɛi-da díkɛ gâloŋ yêei, yée mu-nɛyaa buu lɔ́ɔlu mɛi saaƃa da nɛnî-kpela támaa-ŋa,

⁹ ŋ́ɔ̂ɔ tɔnɔ kpéŋ ŋí nɔ́ ƃé ŋá ŋ̀wɛli ní. Ǹɛ̂lɛɛi yɛ̂ɛ tòloŋ. Ǹyaa ƃa ǹee líi ma loŋ. Ǹee è ŋ̀wɛ́li-ni a ŋ̀ánaa. Nɛnî-kpela-ŋa da gàa, da lûwa làa m̀a. Gâloŋ-nɛyãai da díyee mu-ƃelai da laa maa tɛ̂ tɛ̀ɛ bɔ́.

¹⁰ Gbɛ̂ɛ ƃé ŋí, gɛ́-pêre káa nɔ́ yɛ̂ɛ ɣele-wâla folo-nɛnɛŋ? Ǹɛ̂lɛɛi yɛ̂ɛ ŋ̀áloŋ, gɛ́ fòlo yɛ̂ɛ fólo-kao, ŋ̀wála-wâlai yɛ̂ɛ kɔ-kûluƃa.

¹¹ Ŋá yèŋ ǹyéei kwára m̀á-wuru suai su a gɛɛ ŋá gáa berei da kpɛtɛ̂i la diŋ-tiŋ sui, díwoŋo kɛ́ kùla dîai, da berei pɔmegurane wuru-ŋai da poâi lai.

¹² Kɛ́lɛ ŋá lɛ́ɛ pâi gɔ́lɔnîi, ńii è kɛ̀ nɛ̃ɛ̂i yɛ̂ɛ núu à kɛ̀ seêni kâloŋ ǹóŋ kɔlɛ ŋɔsoo sia-kêleŋ su gɛ́ kirɛ̂ sìɣe.

Ǹɛyâai

¹³ Sulaŋ nɛni lɛ́lɛɛi, mãla. Kɛ́ mãlâi kú kɛ́ íkàa. Lé ƃé ka ŋ̀wɛ̂lii la ká kɛ́ ŋ́gàa, ŋ́gɛ mã̀la, mãla-ƃela kpulu feerɛ loai?