Wɛli 5 - Bible

Zurɔ̂ŋ

¹ Ŋáwɛli kɛ́-maa nûui, ŋaâ pá ŋásûai su. Ŋaâ ŋáwuru mãlaŋ kúŋ nɛ̃ɛi da ŋásɛŋ kúŋ maai síɣe. Ŋaâ ŋákɔ̃́iŋ-kpaŋ lúwaŋ, ŋa ŋ̀úlɔ kpéle. Ŋaâ ŋáwã̂ai da ŋániŋa ŋini-yai kpéle. Óo ńɛlɛi, ílaa míi, ílii é láa, í íkpele é lɛ́ɛ la zu ŋáwɛli kɛ́-maai é tɛ́ɛ ílii pôlu.

Ǹɛnîi Ŋ̀ulei Ǹáaŋ

² Ŋá kɛ̀ nyiî, kɛ́lɛ ŋ́gili è kɛ̀ banaŋ ma. Tɔɔ tí, ŋáwɛli tíŋ ká tí. Bɛ́rɛi lá ƃó mî ŋá wɛ́lii, ŋátoloŋ, ŋáwɛli kɛ́-maa nuu sɔŋ kpɛɛ mai. Ǹɛŋ aâ ńyɔɔ, kpíni a pɛlɛ mâ.

Zurɔ̂ŋ Ǹɛnîi

³ Ŋaâ ḿaa kpôloŋ, ŋa pɔ̂ri seɣe pûi mâ pôlu ŋɔ́nɔ? Ŋaâ ŋ́gɔɔ ma wáa. Ŋa pɔ̂ri ŋɔ́nɔ m̀aa liƃîi?

⁴ Ŋáwɛli kɛ́-maa nuui è ǹyée lɔ̀ é bili gbôŋ sɔɔŋ su. Gɛ́ɛ tíi, ŋɔwɛli kɛ́-maa é ńii mù sìɣe.

⁵ Ŋá mù sìɣe a gɛɛ ŋá bɛ́rɛi lá ƃó. Wúru mã̂laŋ kúŋ nɛ̃ɛ è kɛ̀ a ziáa ńyee ma, wúru mã̂laŋ ya kúŋ nɛ̃ɛ kɛ́ ƃò ńyee gbua ma, ŋá bɛ́lɛ gbôŋ lá ƃó sɛŋ mâ.

⁶ Ŋá bɛ́rɛi lá ƃò mì, kɛ́lɛ fé gáa ní, a lí. Ńii è ŋɔ́nɔ tòo pôlu kpɔ́ a ŋánaa. Ŋá gɔ̀ri, kɛ́lɛ fé gáa ní. Ŋá dòli, kɛ́lɛ vé fáa ní.

⁷ Daa-lêe maa kpɛ́-ƃelai kɛ́ɛ sia-sîai daai sui, dí ŋ́gâa. Dí ńzòŋ, dí ńokwa, dí ŋ́wána-ŋwâna. Diai kɛ̀ ziɣãŋ lái, dí ŋáseɣei kùla ḿaa nyii kɛ̀ a bilíɛɛ ŋ́goôŋ pôlui.

⁸ Óo Zerusâlɛŋ nɛyaa, ka ŋáwɛli kɛ́-maa nûui kâa, ka pâi kɛ̂i ma lé? Ka mó mî m̀a a gɛɛ ŋ̀wɛ́li a ŋ́gɛ̂i.

Ǹɛyâai

⁹ Yái a ǹɛnî lɛ́lɛɛi nɛyâa sámai, lé ƃé gáa íwɛli kɛ́ maa nûui mâ ǹɛ̂lɛɛi é tɛ́ɛ m̀arâi díwɔ̂i mai? Ǹɛ̂lɛɛi ƃa m̀í nyaa ya worɛ̂ saŋ kɛ́ɛ ŋí tɛɛ̂i a kúa a gɛ́ɛ kú mó m̀ai?

Ǹɛnîi

¹⁰ Ŋáwɛli kɛ́-maa nûui lɛ̂lɛɛi, gɔlɔi ponóɔɔ. Ǹɛ̂lɛɛi é tɛ́ɛ kpakolo wála puu ma.

¹¹ Ŋ̀ɛ́i lâai lɛ̂lɛɛi yɛ̂ɛ gôo lɛ́lɛɛ. Ŋ̀uŋ-lêɣa tâmaai ŋ̀ûa, gɛ́ tɛ̂i yɛ̂ɛ gɔ̃̀ɔ leɣa.

¹² Ŋ̀ɛ́i káa yɛ̂ɛ tòloŋ ƃé da ŋ̀wáa a niŋa ŋîni-ya, gɛ́ ƃò tɔɔ̂ni ya-ɣɛ̂li loŋ kɔlɛ, gɛ́ fòlo yɛ̂ɛ kɔni sɔ̃ɔ kpanaŋɔɔ.

¹³ Góma veerɛ lɛ̂lɛɛi yɛ̂ɛ sûa nyii ǹáa fɛɛ̂i a sále da kúŋ sã̂a. Ǹá-gbɔ káa yɛ̂ɛ wúru pôa lɛ́lɛɛ-ŋa ǹyɔɔ́ a wúru-ya kúŋ nɛ̃ɛ.

¹⁴ Ǹyée kpɛtɛ-pêre lɛ̂lɛɛi, gbono lɛ́lɛɛ ǹyée ma. Gɔlɔ káa ma nɛ̃̀ɛ-nɛɛ yɛ̂ɛ sêle-nyîŋ saá ƃé kɔni sɔ̃ɔ kpanaŋɔɔ seɛɛ̂i zu.

¹⁵ Ŋ̀wɛ́rɛ kɔ̂ŋ káa yɛ̂ɛ kɔni-kéleŋ ƃé da nɔ́ gôo su. Gbono kɛ̂tɛi, ǹɛ́lɛɛ yɛ̂ɛ Lɛƃanɔŋ lɔii su sîda wurui da.

¹⁶ Ǹóno pêre lɛ̂lɛɛi. Gɛ́-pere kélee lɛ́lɛɛ a ńîa. Zerusâlɛŋ nɛyaa, ŋáwɛli kɛ́-maa nûui ká ŋí.