Wɛli 4 - Bible

Zurɔ̂ŋ

¹ Ŋáwɛli kɛ́-maa nuui, ílɛlɛ pêre kɛ̂ɛi léŋ ŋí? Óo, ílɛ̂lɛɛi ƃɔɔlɔ! Íŋɛi káa yɛ̂ɛ tòloŋ. Íŋuŋ lêɣa a kɛ̂i yɛ̀rɛŋ-yɛrɛŋ yɛ̂ɛ ƃoli kpûlu-ŋa ƃé kulâi Gilia yeei su dí kɛ́ yèŋ díleɣa kɛ́ kpɛ̃liŋ.

² Ínyiŋ kolɛɛ̂i yɛ̂ɛ ƃála kole-ŋa ƃé da díleɣa tée nɔ́ a nina, da díwaa. Ínyiŋ ŋáa pɔrîɛi íla. Da fé kula ní zu.

³ Íla-gbɔ kpɔlɔ̂i a ǹɛ̂lɛɛi. Ílono-woo kélee káa a wɛli kɛ́-maa wôo-ŋa. Berei pɔmegurane kpoma kpɔlɔ̂i lai, bere ƃé íkoma kpɔlɔ̂i la íŋɛi mɛi pɛlɛ-sêɣei mu.

⁴ Íkɔŋ kôyaai yɛ̂ɛ Deeƃé ŋɔpɛ́rɛi tôŋ, kwɛyɛ̂ŋ toɔ́ɔ m̀a. Gwɛyɛ̂ŋ-ŋai da fôlo yɛ̂ɛ kɔ-kûluƃa ŋɔkpála ŋá-ɣale kɔli-kalaŋ wála tɔnɔ.

⁵ Íŋini káa yɛ̂ɛ tôa feerɛ. Gáa yɛ̂ɛ tôa feerɛ nyii-ŋai díkaa a nyûa-ŋai nyii-ŋai da dílaa mìi wúru-pôa-ŋa samai.

⁶ Ŋa pâi liî ŋ̀úru-mãlaŋ kúŋ nɛ̃ɛ yèe kɛ́tɛi ma, géreŋ sɛŋ kúŋ nɛ̃ɛ yèe-loŋ ma, é lɛ́ɛ la zu ŋ̀ele ƃɔ̂i fãai é tɛ́ɛ, ɣele é ƃɔ́.

⁷ Ŋáwɛli kɛ́-maa nuui, ílɛ̂lɛɛi kpɔ́. Ímaa kulâi da kélee fé yâ.

⁸ Ŋáwɛli kɛ́-maa nuui, kúkula Lɛƃanɔŋ Yeei ma. Pá kúkula Lɛƃanɔŋ lɔii su. Kula Amana yeei tôŋ su í pîlaŋ. Pîlaŋ í kúla Seni da Ɛmɔŋ Yeei su ƃɛ́i ǹyala-sûlu-ŋai da gɔ́li-ŋai díkaa naai.

⁹ Ŋá wɛli kɛ́-maa nûui, ímaa mɛ̂ni a tɛɛ ńii pôlu. Ŋà íŋɛi kàa, íwɛli liî a tɛ̂ɛ ńii pôlu. Ǹyɔlɔi íkɔŋ mai, m̀aa mɛ̂ni a ńii sóŋ a ŋ̀ánaa.

¹⁰ Ŋáwɛli kɛ́ maa nûui da ŋáwɛli, íwɛli kɛ́ maai nɛ̃ɛ̂i. Ǹɛ̃ɛ̂i é tɛ́ɛ ŋwã̂ai ma. Íwulɔ-kûŋ nɛ̃ɛi, kúŋ nɛ̃ɛ̂i é tɛ́ɛ wúlɔ kúŋ nɛ̃ɛ sii kélee ma.

¹¹ Ŋáwɛli kɛ́-maa nuui, íla-gbɔ káa yɛ̂ɛ kɔ̃́iŋ-kpaŋ. Niŋa ŋîni-ya da kɔ̃́iŋ-kpaŋ káa ínɛŋ mu. Ímaa ɣîri-sãai kúŋ nɛ̃ɛ̂i yɛ̂ɛ Lɛƃanɔŋ wuru.

¹² Ŋáwɛli kɛ́-maa nuui, ŋáwɛlii, íkaa nɔ́ ńyãa tɔnɔ ḿɛni ma. Íkaa yɛ̂ɛ sûa nyii gáa ya-tôŋ mai, nyii maa kónaŋɔ̂ɔi, ya-ɣɛ̂li ŋa kɛ́ ƃò zui.

¹³ Sí-sãa sii támaa da kpɛ̂tɛ naa. Da kpɛ̂tɛ yɛ̂ɛ pɔmegurane wuru-ŋa. Díƃa kélee a kɛ̂ a ǹɛ́lɛɛ. Sí-sã̂a kúŋ nɛ̃ɛ kɛ́ɛ yɛ̂ɛ ína, nâa, da kpɛ̂tɛ naa

¹⁴ safurɔŋ, kalamɔ da sinimɔŋ. Zãâi ŋí da mɛni fé wála ní naa. Wúru kúŋ nɛ̃ɛ sii támaa da kpɛ̂tɛ naa. Wúru mãlaŋ kúŋ nɛ̃ɛ wuru-ŋa, alo, da wúru-ya kúŋ nɛ̃ɛ ŋa díkaa naa máŋ.

¹⁵ Ǹyá tôŋ ma yai a zûai ŋí su yɔɔ, ǹya-ɣɛ̂li-ŋa da bóa-ŋai nyii-ŋai da kûla Lɛƃanɔŋ.

Ǹɛnîi

¹⁶ Yá-ŋûa da séɣai fãa, ká pá ká ŋásûai su fɛ́ɛ. Ka ǹaa fɛ́ɛ a gɛɛ zãâ kúŋ nɛ̃ɛ-ŋai kélee naai, díkuŋ é táa ǹaa gwaa kélee. Tɔɔ ŋáwɛli kɛ́-maa nuui é pá ŋɔsûai su é ŋɔsí-sãai m̀bá ŋa-nɛ̃̂ɛ kula.