Wɛli 3 - Bible

¹ Ŋà kɛ̀ lâani ŋágbìŋ ŋá a kpíni, ŋa kɛ̂ ŋ́gili ŋá siâi é pîlaŋ ŋáwɛli kɛ́-maa nûui mâ, ŋ́gɛ ŋ̀wɛli a gɛɛ ŋá gáa, kɛ́lɛ fa gàa. Ŋà tela gɔ̀ri, fa gàa.

² Ŋá ḿù sìɣe a maa félaa ŋá lí daa-lêei su, bere-lêe-ŋai ma da bere tâɣaŋ-ŋai lá ŋ́gɛ ŋá wɛli kɛ́-maa nûui kɔ̂ri. Ŋa gɔ̀ri, kɛ́lɛ fa gàa.

³ Daa-lêei maa kpɛ́-ƃelai dí ŋ́gàa, ŋá dí marê kɛ́, “Ká ŋáwɛli kɛ́-maa nûui kâa?”

⁴ Ŋá tɛ̀ɛ kpɔ́ nɔ́ dîa ŋá gáa. Ŋá kpùlɔŋ ma, ḿve fáa ní mà é lí, ŋá pá la ńee ŋɔpɛ́rɛi mu ƃɛ́i, dí wɔ́lɔ ḿaa sɔlɔ ƃô naai.

⁵ Zerusâlɛŋ nɛyaa, ka káfoo ńyêei. Kà káfoo a lóma da tôa láa a gɛɛ káfe pâi kúwôlii karâi tãi kwa kɛ̂ lâa-ni lai, é lɛ́ɛ la zu kú kúmu siɣe.

Ŋ̀ulei zaaƃai Ǹɛnîi

⁶ Gbɛ̂ɛ ƃé kulâi ŋí vɛ̃ɛ-kpâlaŋ su yɛ̂ɛ lurii? Wúru mã̂laŋ kúŋ nɛ̃ɛ kúŋ kulâai ma. Gúŋ káa yɛ̂ɛ bɔni-tɔɔ-ƃelai dí wée pâai kúŋ

⁷ Saloma káa lâani ŋɔkpôŋ su, díkɛ pà la. Ŋɔkɔ́kɔ-ƃelai buu lɔ́ɔlu mɛi da káa gbono ma. Díkelee díkaa a Eezuɛ lɔii ŋɔkɔ-kûluƃa wála-wâlaa-ŋa.

⁸ Díkelee díkaa a ƃóa-sɔ̂kpɔ kɔ kɔ́-ƃela lɛ́lɛɛ-ŋa. Díkaa a kɔ́kɔ-ƃela pɔlɔ-ŋa. Ƃóa sɔkpɔ káa díkelee díyêei, díkɛ gâloŋ maa kpɛ̂ a kpíni a gɛɛ núu da fa lâa kɔ́ pɛlɛ lâ m̀a.

⁹ Gâloŋ Saloma è kâloŋ see-sɛŋ kpɛ̀tɛ gbîŋ mɛni ma. È gbɛ̀tɛ a wúru lɛ́lɛɛ nyii è gùla Lɛƃanɔŋ.

¹⁰ Dôŋ soŋ-wûru-ŋai dí kɛ̀ a dí kpɛtɛɛ a káne, bôlu-pere kpɛtɛɛ a gôo. Seɣe kpɔ̂lu mu-tɛiɛ́ɛ lɛ́lɛɛ pɛlɛɛ ŋ̀á. Zerusâlɛŋ nɛyãai ƃé díkpɔɔi tãi sìɣe dí zee-sɛŋ ŋí su kpɛtɛ a ǹɛ́lɛɛ.

¹¹ Zerusâlɛŋ nɛyaa, ka pá ká Gâloŋ Saloma káa. Ǹíi nɛ̃ɛ̂i sâa. Aâ gâloŋ-ƃɔrɔi sée ŋ̀ûa nyii ǹee è gbɛ̀tɛ m̀i ŋɔnɛnî kula kûui mɛ̂ni mai. Ŋ̀elei tí è kɛ̀ a ǹíi-nɛ̃ɛ ɣêle kɛ́tɛ.