Taitɔ 1 - Bible

La-ti-maa

¹ Ńyãa Pɔ̂ɔ, ŋ́gaa a Ɣâla yée-mu-nuu, ŋ́gɛ ƃò ŋɔ́nɔ a Zîsɛ Kôrai ŋɔsia-nuu. Diai Ɣâla è dílɛ̀i, kwa dîa-ni kúlaa-lai káa zu tɔnɔɔ da dɔ̃yâi maa-tarei gáa díyêei nyíi da Ɣâla-mɛni-kɛɛ díkaa zu tɔnɔɔi.

² Kwa dîa-ni ŋwɔlɔ-wɔlɔ fúlu-laai maa-kili kɛ-zui káa kúyêei nyíi Ɣâla, nyíi va lɛ́ɛ kɛ̀i, è góno tèe la a tãi su kôyai.

³ Ɣâla è nyíŋi lɛ̀ ŋɔwóoi su tãi tí ma Ŋ̀âla-woo ƃóɔɔi sârai, nyíi ǹyaa Ɣâla, nyíi gáa a Kúƃalo-nuui è ǹɛɛ ńyêei a gɛɛ ŋá gɛ́ yɛ̂ɛ berei è m̀o la ḿâi.

⁴ Ŋa gɔlɔi ŋí pɔ̃yɛ̂i Taitɔ pɔ́, nyíi gáa a tɔ̃yâ-loŋ nyíi kwa ǹyaa kúlaa-lai káa tɔnɔɔi. Ƃɛlɛ-sêe da lii-sêe dí kúla Kúnâŋ-Ɣâla yêei da Kúƃalo-nuui Zîsɛ Kôrai dí kɛ́ yâ.

Ǹúu pɔ̂lɔ-ŋai da Kôrai-toli-kpɔŋ ŋɔtíi-mɛi-ƃelai maa-mɛni

⁵ Ŋá ílɛ̀ɛ pôlu Kulîi a gɛɛ í mɛni-ŋai kélee kpɛtɛ nyíi-ŋai dífe niî kpɛtɛ níi, í núu-pɔlɔ-ŋa lɛ́ taa kélee su yɛ̂ɛ berei ŋá m̀o la yâi.

⁶ Dí kɛ́ a ǹûai nyíi dísɔŋ fé diai. Dí nɛnî tɔnɔ-tɔnɔ kúla nɔ. Dí kɛ́ a ǹûai nyii-ŋai dínîa-pɛlɛɛi díkaa a laa-la-ƃela. Dífe kɛ̀ a nîa-pɛlɛɛ nyíi-ŋai nûa da mò a dílaa a tãi kélee a gɛɛ dísɔŋ nyɔ́mɔɔ̂i, woo-mɛni fé díyêei.

⁷ Kpɛ́ni fêi, maa fé nɛ̃ɛ ní a gɛɛ Kôrai-tóli-kpɔŋ ŋɔtíi-mɛi-nuu nyíi gáa a Ɣâla ŋɔtíi-kɛ-nuui zɔŋ é kɛ́ mà. Vé kɛ̀ a yoŋka-nuu, kpaa máŋ lii-fãa-goi-nûu, kpaa máŋ lɔ̂ɔ-kpele-nûu, kpaa máŋ namu-kɔ́-nuu, kpaa máŋ sɛŋ-kao-wɛ̂li-nuu.

⁸ Kɛ́lɛ, fɛ̂ɛ é kɛ́ a ǹúui a nûa sòŋ a ǹɛ́lɛɛi, mɛni lɛ́lɛɛ-kɛɛ wɛ̂li-nuu, ǹúui gíli káa ǹyêei, tɔ̃yâ-nuu, núu maa wâa, da ǹúui a gbîŋ mɛi kâai.

⁹ Fɛ̂ɛ maa-nuui é dɔ̃yâ-wooi sóŋ kpɔ́ a gbanaŋɔɔ yɛ̂ɛ berei dí ǹɛ la mài. Pɔ̂ri é kɛ́ mì é nûa téniŋ tɔ́ɔ tɔ̃yâ-sɛŋ-lɛɛi su, a gɛɛ diai da dɔ̃yâ-sɛŋ-lɛɛi maa-sia tòoi, é díwoo su too máŋ.

¹⁰ Kpɛ́ni fêi, nûa támaa, ŋ̀uŋ kpɔ-kpɔɔi ƃa diai díkaa a Zûu-ɣala-woo ƃó ƃelai díkaa nɔ́ naa woo-mɛni fé díyêei. Díkaa nɔ́ a lóno-folo kɛ-ƃela da nuu-pɛlɛ-ƃela.

¹¹ Ǹyaŋ fɛ̂ɛ dí maa-ƃelai tí kpera, kpɛ́ni fêi, da pɛ́rɛ-mu-ƃela kélee kɛ̀ wúlee a sɛŋ-lɛ́ɛ nyíi maa fé nɛ̃ɛ ní a gɛɛ dí gɛ́, kɛ́lɛ, da gɛ̀ nɔ́ sɛŋ-kao mɛni mai.

¹² Díɣâlai ŋɔlóno-kɛ-ƃelai nyíi-ŋai kùla dísamai, dɔnɔ è mò, ǹyɛɛ, “Kulîi-ŋai díkaa nɔ́ wɔ́lɔ a lɛ́ɛ-ƃela, dí ƃô a lɔɔ-fɛnɛ-sãa sɔŋ nyɔ́mɔɔ-ŋa, dí ƃô a mii-sɛŋ wɛli-ƃela nyɛ̃ŋ-nyɛ̃ŋɔɔ.”

¹³ Zere-faai ŋí káa a tɔ̃yâ. M̀ɛni ma lóno kpɔ́ dípɔ a gbanaŋɔɔ a gɛɛ dí kɛ́ a tɔ̃yâ-laa-la-ƃela.

¹⁴ Dífe díwoli tɔ̀ɔ Zûu-ŋai dílɛɛ-mɛni pɔlɔ-ŋai dîa, kpaa máŋ dífe díwoli tɔ̀ɔ diai da dípôlu tɔ̀ɔ dɔ̃yâi mai dítɔ̂ŋ-ŋai dîa.

¹⁵ Diai dímaa waâi, sɛŋ kélee maa waa díŋɛi, kɛ́lɛ, diai díliƃiɛ̂i laa-la fé díyêei, sɛŋ maa fé waa ní díŋɛi. Díkili-ŋa-siai kpîŋ máŋ líƃiɛ̂i.

¹⁶ Da díkpîŋ lɛ̀ a gɛɛ dí Ɣâla kɔ́lɔŋ, kɛ́lɛ, da m̀aa-sia tòo dítûa-perei su. Nûa dífe díkɛ-naai wɛ̂li ní. Dífe a woo-mɛni-ƃela dífa pɔ̂ri mɛni lɛ́lɛɛ-sii kélee da kɛ̂i.