Timote veelɛ 4 - Bible

Ɣâla ŋɔwooi ƃo

¹ Ŋa m̀ôi yâ Ɣâla ŋɛi da Zîsɛ Kôrai, nyíi pâi vulu-ƃelai da zaa-ƃelai dímɛnii ŋá têei, nyíi da ŋɔkâloŋ-laai da pâi pâi:

² Ɣâla ŋɔwóoi ƃó, í tíi kɛ́ a gbanaŋɔɔ a tãi kélee, í nûa dísɔnyɔ̂ŋ lɛ dîa, í lóno nûa pɔ kpɔ́ a gbanaŋɔɔ, í dília-woo ƃó, ífe fɛ̀ɣɛ ílii-kpelei su da ísɛŋ-lɛɛi.

³ Kpɛ́ni fêi, tãi a pâi pâi núu-kpune fé pâi ŋɔ́nɔ ŋ̀wóli tɔɔ̂i dɔ̃yâ-sɛŋ-lɛɛi ma, kɛ́lɛ, da pâi díwoli tɔɔ̂i sɛŋ-lɛ-sii da kpɛni ma dí díkpîŋ sɛŋ-lɛ-ƃela ŋá tɛ́ gîe ma nyíi-ŋai da díwɛli.

⁴ Da pâi dípôlu tɔɔ̂i dɔ̃yâi ma dífa díwoli tɔ̀ɔ ma, kɛ́lɛ, da pâi díwoli tɔɔ̂i ƃoo-mɛni-ŋa dîa.

⁵ À kɛ̀ a yá, tɔɔ a gbanaŋɔɔ a tãi kélee, í tɔ́ɔ mɛni-kpɔlu su, í tíi kɛ́ yɛ̂ɛ Ɣâla-woo táa-taa-nuu, ítii kélee kɛ́ɛ a ǹɛ́lɛɛ.

⁶ Kpɛ́ni fêi, da nâa kɛ́ pâi ŋ́gulâi a sâla. Ŋá-tãi a nâa seri.

⁷ Ŋa namu lɛ́lɛɛi kɔ́, ŋa kpɛɛ ŋátii ma, ŋa ǹaa-lai mɛi káa.

⁸ Tɔ̃yâ-laa maa-ƃɔrɔi lâai kɛ́ɛ̂i naa ḿaa-mɛni ma, nyíi Kúnuu-namui, nyíi gáa a dɔ̃yâi ŋɔmɛni-ŋa tee-nuui, a pâi ḿaa pui la a maa-Ɣelei ti, ńyãa tɔnɔ nɔ́ fêi, kɛ́lɛ, a pâi máŋ ǹúui kélee maa pui ma nyíi-ŋai da Kúnuu-namui ŋɔpâi wɛ̀li.

Núu kpîŋ maa-mɛni-lɛɛ

⁹ Kɔ kpɔ́ a gbanaŋɔɔ ípa ḿbɔ a maa-félaa.

¹⁰ Kpɛ́ni fêi Dimɛ, nyíi ŋ̀éniɛi ŋí wɛ́li ni, a ńɛɛ a lí Tɛsɛlonaika; Kulɛsɛŋ a lí Galesia, Taitɔ a lí Damesia.

¹¹ Lûu ǹyaa tɔnɔ nɔ́ ƃe kwa ǹyaa kúkaa ƃɛ. Ka Mâki ka pá; kpɛ́ni fêi, gáa a tii-kɛ-nuu lɛ́lɛɛ ḿɛni ma.

¹² Ŋá Tekekɔ tɛ̀ɛ Ɛfesɛ.

¹³ Yà kɛ̀ pâi, pá a gɔ́lɛ-seɣei nyíi ŋá nɛ̀ɛ Kápɔ yêei Toroɛi. Pá máŋ a gɔlɔ-ŋai, é tela kɛ́ kpɔ́ a zua-kɔlɔ-kɔlɔ-ŋai.

¹⁴ Alezaŋda da nyíi gáa a gɔli-ɣale-nuui e mɛni ŋánaa támaa kɛ̀ a ńyãa; Kúnuu-namui a pâi véla fêi ŋɔtûa-perei mɛni ma.

¹⁵ Yá kpîŋ ímɛi káa a ǹyaa, kpɛ́ni fêi, e tɔ̀ɔ kpɔ́ kûworɛ̂-wooi ma a gbanaŋɔɔ.

¹⁶ Tãi ŋá kɛ̀ ḿaa kɔ̃ɔ̂i la a maa-ŋuŋ, núu da fé kpɔŋ ni mâ; díkelee dí tèe mâ. Ǹyaŋ nyíŋi fé kɛ̀ a dísɔŋ!

¹⁷ Kɛ́lɛ, Kúnuu-namui e tɔ̀ɔ ŋ́gɔlɛ e wála-wala tɛɛ ḿbɔ a gɛ́ɛ ŋa ŋɔwóoi ƃó kpɔ́ a ǹáa fɛ́ɛ, a gɛ́ɛ Zɛ̃tai-ŋai kélee dí m̀ɛni. Mɛni ma Kúnuu-namui e ŋ́gùla ǹyala-sului lá.

¹⁸ Kúnuu-namui a pâi ŋ́gulâi mɛni nyɔ́mɔɔ-sii kélee su é ḿalo Ŋɔɣâla-taa kâloŋ-laai mɛni ma. Volo-laai e tɛɛ bɔ wɔlɔ-wɔlɔ da wɔlɔ-wɔlɔ. É kɛ́ ti.

Ǹaa-ti-maai gbɛɛ ŋái

¹⁹ Ŋá fáa Piliselia ma da Akoila, é pɛ́lɛ Onesifɔlɔ ŋɔpɛ́rɛ-mu-ƃelai dìa.

²⁰ Elɛɛtɔ è lɛ̀ɛ Kɔleŋ. Ŋa Tɔlɔfimɔ lɛ̀ɛ kɔ̂lɛi Miletɔ.

²¹ Kɔ́ a gbanaŋɔɔ a gɛ́ɛ í pa sama-ɣele é lɛ́ɛ serîi. Yubulɔ e fàa yâ, é pɛ́lɛ Pudeŋ ma da Linɔɔ da Kulɔdia é pɛ́lɛ íƃarâai kélee dìa.

²² Kúnuu-namui é kɛ́ ímɔ̂leŋ kɔlɛ. Ƃɛlɛ-sêe é kɛ́ kâa.