Rutə 2 - Bible

Lûfi è tíi kɛ̀ Bôa ŋɔkpâlaŋ ŋá

¹ Neomi ŋɔsurɔ̂ŋ Elîmɛlɛ ŋɔkáayɔ tɔnɔ è kɛ̀ naa. Ǹáa ƃé kɛ̀ a Bôa. Ǹalôŋ ŋí è kɛ̀ a dɔɔ́ kpɔ́ a ŋ̀ánaa.

² Nya ƃe Môa nɛnii Lûfi è mò Neomi ma ǹyɛɛi, “Tɔɔ ŋá lí núu da ŋɔkpâlaŋ ŋá. Ɣele da gbâlaŋ namui a pâi ḿalôŋ kâai é ǹyée sée ḿû a gɛ́ɛ ŋá ŋɔmɔlɔŋ-kpaŋ da su kɔ́ri díi kɛ́-ƃelai pôlu.” Neomi ǹyɛɛ m̀ai, “Ńoŋ-nɛnii, ńyee káa m̀u, lí.”

³ Nya ƃe Lûfi è lì é tɛ́ kpâlaŋ tɔnɔ da ŋá. Gbâlaŋ ŋí è kɛ̀ Elîmɛlɛ ŋɔkáayɔi Bôa pɔ́ɔ. Lufi è pɛ̀lɛ mɔlɔŋ-kpaŋ su kɔ̂rii mɔlɔŋ tée-ƃelai pôlu.

⁴ Ɣele tɔnɔ da Bôa è kùla Bɛpeleɣɛ̃ɛ é pá ŋɔkpâlaŋ ŋá ǹyɛɛ ŋɔtíi kɛ́-ƃelai dîai, “Kúnuu-namui é kɛ́ kákɔlɛ.” Dîyɛɛ m̀ai, “É lûwa láa yâ máŋ.”

⁵ Bôa è díi mɛi-nuui marê kɛ̀ ǹyɛɛ m̀ai, “Gbɛ̂ɛ ŋɔnɛnî ƃe tí?”

⁶ Ǹyɛɛ m̀ai, “Ǹɛnîi ti káa a Môa nuu. Da Neomi ƃé pà.

⁷ È ḿarê kɛ̀ a gɛ́ɛ ŋá ǹɛɛ naa é mɔlɔŋ-kpaŋ da su kɔ́ri díi kɛ́-ƃelai pôlu. A sâa tíi kɛ̂i é síɣe ɣele-wala ma é seri tãi ŋí ma. Vé niî víi tɔɔ ní kpîŋ.”

⁸ Nya ƃe Bôa è mò Lûfi mà ǹyɛɛi, “Ńoŋ-nɛnii, íwoli tɔ́ɔ. Ífe ŋɔ́nɔ mɔlɔŋ têe kpâlaŋ da kpɛ́ni ŋá é kúla ŋákpâlaŋ ŋí pôlu. Ka ŋátii kɛ́-nɛyãai ka kɛ́ tíi kɛ̂i ƃɛ́.

⁹ Ka dia-ni ka ká m̀ɔlɔŋ têei kwaa tɔnɔ ma. Ŋá mò zinâai dîa a gɛ́ɛ dífe lɛ̀ɣɛ yâ. Kpele-wɛ̂li a ísòŋ, lí í íkpéle zɛŋ-folo-ŋai da su ǹyaŋkpa-ŋai dí pà a dîai.”

¹⁰ Nya ƃe Lûfi è ŋ̀uŋ ma pìlaŋ ǹɔii ma é mò mà ǹyɛɛi, “Lé ƃé kɛ̀ ńyãa tɔnɔ nɔ́ ƃé íkpaanɔɔ̂i ḿɛni ma íkɛ ḿalôŋ kàa ǹyaŋ ŋ́gɛ ƃò a ŋɔ̃yai?”

¹¹ Bôa ǹyɛɛ m̀ai, “M̀ɛnii kélee í gɛ̀ íyuara mɛni ma da zaa-ƃelai, dí mò ḿâ. Berei í ínûai lɛ̀ɛ la ípɔ-taai í pá lɔii da kpɛ́ni su nyíi ífe zu-ƃelai kɔ́lɔŋ níi ŋá gélee kɔ́lɔŋ.

¹² M̀ɛnii ƃa gɛ́i Kúnuu-namui é maa fela-fei tɛ́ɛ ípɔ. Fela-fêi kɛ́tɛ é pá ípɔ é kúla Eezuɛ-ŋai Dínuu-namui Ɣâla yêei nyíi í pà bɔ́ a gɛ́ɛ é ímaa kɔ̃ɔi!”

¹³ Nya ƃe Lufi è ŋ̀óo su tòo ǹyɛɛ m̀ai, “Ílii lâai ḿaa mɛni ma, ŋánuu-namui, kpɛni fêi, ƃa ŋ́aa ǹɛnɛ a ílono woo. Yâ íyee sée ḿû, berei máŋ fé la a íyee mu-nɛyãai dai.”

¹⁴ M̀ii-sɛŋ mii tãi seriɛɛi, Bôa è mò Lûfi mà ǹyɛɛi, “Pá í gbóloi da soŋ í ǹɔ́ ǹáoi su.” Nya ƃe Lûfi è sèe díi kɛ́-ƃelai kɔlɛ, Bôa é mii-sɛŋ da tɛ̀ɛ bɔ́. È ǹáa mìi é péla, mii-sɛŋ da é lɛ́ɛ ǹyêei.

¹⁵ Lûfi kɛ́ɛ a m̀u siɣe a gɛ́ɛ é mɔlɔŋ-kpaŋ su kɔ́rii, Bôa è mò ŋɔnyáŋkpa-ŋai dîa ǹyɛɛi, “Ka ǹɛɛ naa é ŋɔmɔlɔŋ-kpaŋ su kɔ́ri máŋ ƃɛ́i mɔlɔŋ kâŋ-ŋai díkaa naai. Káfe gbèra.

¹⁶ Ka mɔlɔŋ-kaŋ da kula máŋ mɔlɔŋ kɔŋ-ŋai su ká ǹáa m̀ɛni ma a gɛ́ɛ é ŋ̀ɛ́ɛ. Káfe gbèra.”

¹⁷ È lɛ̀ɛ mɔlɔŋ-kpaŋ su kɔ̂rii ɣele-wulii é kɛ́. M̀ɔlɔŋ è zɔ̀lɔ ƃôi è zìa gáo é kɛ́ yɛ̂ɛ pãŋ buu feerɛ káo lɔ́ɔlu.

¹⁸ Nya ƃe è lì la daai su ǹyûara pɔ́ naa, mii-sɛŋ kpelii lɛ̀ɛ ǹyêei tɛ́ɛ bɔ́.

¹⁹ Ǹyûara ǹyɛɛ m̀ai, “Mí ƃé í sâa lì naa mɔlɔŋ kɔ̂rii? Mí ƃé í kɛ̀ sâa tíi kɛ̂i naai? Lûwa káa ǹúui ma ímalôŋ kàai.” È ǹúui láa lɛ̀ ǹyûara ma è lì ŋɔkpâlaŋ ŋái. È mò ǹyɛɛi, “Núui ŋá sâa tíi kɛ̀ ŋɔkpâlaŋ ŋái, ǹáa ƃa Bôa.”

²⁰ Neomi è mò ǹóŋ ŋɔnɛnîi ma ǹyɛɛi, “Kúnuu-namui nyíi ŋɔmɛni lɛ́lɛɛ káa vúlu-ƃelai da zaa-ƃelai mɛni mai, é lûwa láa ǹúui kpîŋ ma.” Ǹyɛɛ ma máŋ, “Ǹalôŋ káa a kúkáayɔi da. Gáa a kúmaa tée-ƃelai dɔnɔ.”

²¹ Môa nuui Lûfi è mò ǹyɛɛi, “È kúla nyíti pôlu, è mò ḿâ a gɛ́ɛ ŋá kɛ́ ŋɔtíi kɛ́-ƃelai kɔlɛ é lɛ́ɛ la zu dí kpɛ́ɛ a mɔlɔŋ téeɛ.”

²² Nya ƃe Neomi è mò ǹóŋ ŋɔnɛnîi Lûfi ma ǹyɛɛi, “Ǹɛ̂lɛɛi a gɛ́ɛ ka ŋɔtíi kɛ́-nɛyãai ká tíi kɛ́. À wàla kɛ́ ti, ƃà tíi kɛ̀ kpâlaŋ da kpɛ́ni ŋá, da pâi mɛni ŋánaa kɛ̂i a yá.”

²³ Nya ƃe da Bôa ŋɔtíi kɛ́-nɛyãai dí lɛ̀ɛ tíi kɛ̂i Bôa ŋɔkpâlaŋ ŋá é lɛ́ɛ la zu dí kpɛ́ɛ a ŋɔmɔlɔŋ téeɛ. Da ǹyûara dí kɛ̀ kwaa tɔnɔ ma.