Rutə 1 - Bible

Lûfi da Neomi

¹ Mɛni-sâa Ƃó-ƃela kɛ́ɛ kɛ̀ ǹûai mɛi, puru è tòo ǹɔii su. Nalôŋ tɔnɔ da, ŋɔnɛnîi da dílônii-sinaai feerɛi dí kùla Bɛpeleɣɛ̃ɛ Zuda, dí lí a gɛ́ɛ dísee Môa lɔii su.

² Ǹalôŋ ŋí láa ƃé kɛ̀ a Elîmɛlɛ, ŋɔnɛnîi láa kɛ́ ƃò a Neomi. Dílônii-sinaai feerɛi láa ƃé kɛ̀ a M̀alɔŋ da Kîliɔŋ. Dí kɛ̀ a Ɛfata-ƃela. Dí kùla Bɛpeleɣɛ̃ɛ, Zuda lɔii su dí lí Môa-ŋai lɔii su dí sée naa.

³ Kɛ́lɛ Neomi ŋɔsurɔ̂ŋ Elîmɛlɛ è sàa, Neomi da ǹónii-sinaa feerɛi dílɛɛ.

⁴ Zinaa feerɛi ŋí dí Môa nɛyaa kùla a dínɛyâa. Dɔnɔ láa ƃé kɛ̀ a Ôpa, gbêlii láa kɛ́ ƃò a Lûfi. Dí kɛ̀ Môa-ŋai lɔii su yɛ̂ɛ kóraŋ puu.

⁵ Naa kɛ́ɛ tíi, M̀alɔŋ da Kîliɔŋ dí sàa máŋ. Naomi nɔ́ ƃé lɛ̀ɛ da ǹônii-sinaai feerɛi dínɛyâai.

Neomi da Lûfi dí lì pôlu Bɛpeleɣɛ̃ɛ

⁶ Nya ƃe è m̀u sìɣe da ǹônii ǹɛyâai ŋí dí kúla Môa lɔii su lí pôlu dípɔ-taai, kpɛni fêi, è m̀ɛni Môa lɔii su berei Kúnuu-namui è ŋɔnûai nàa kâa la é mii-sãa tɛɛ dípɔi.

⁷ Nya ƃe è kùla naa da ǹônii dínɛyâai dí lí pôlu Zuda lɔii su.

⁸ Kɛ́lɛ Neomi è mò ǹɛyâai ŋí dîa ǹyɛɛi, “Ka lí pôlu kálee-ni pɔ́-naa. Kúnuu-namui é kámɛi káa a ǹɛ́lɛɛ yɛ̂ɛ berei ká kúlônii sòŋ la a ǹɛ́lɛɛ.

⁹ Kúnuu-namui é gɛ́ ká sinâa kula ŋɔ́nɔ, lii-see kɛ́ ƃò kápɛrɛ-ŋai mu!” Nya ƃe è ǹá-gbɔ sèe dîa, da dia-ni dí wɔ́lɔ kpɔ́ a malôŋ pere.

¹⁰ Nya ƃe dí mò mà dîyɛɛi, “Kúfe fáa gɛ̂i, kwa káa-ni kwa liî pôlu ínûai pɔ́-naa.”

¹¹ Kɛ́lɛ Neomi è mò dîa ǹyɛɛi, “Ka lene pôlu, ńônii-nɛyãai. Kwa káa-ni kwa liî lé-mɛni ma? Ká lâai la ŋa pɔri ŋɔ́nɔ lonii-sinaa maa sɔlɔ ƃôi díkula a dínɛyâa?

¹² Ka lí pôlu, ńônii-nɛyãai, ka lí kánîa kwaa ma, kpɛni fêi, ŋa pɔlɔ surɔ̂ŋ kula mɛni ma. À kɛ̀ máŋ kili-kɛ-zu káa ńyêei a gɛ́ɛ ŋá surɔ̂ŋ kula gbínii ŋí su, ŋá lonii-sinaa sɔlɔ ƃó

¹³ ka pɔri dímaa kpɛ̂nii a gɛ́ɛ dí naɣa dí kákula a dínɛyâa? M̀ɛnii ŋá ƃa pɔri gɛ̂i káfa surɔ̂ŋ kàai? Kpao, ńônii-nɛyãai. Malôŋ toɔɔ̂i ḿâ a ŋ̀ánaa kámɛni ma, kpɛ́ni fêi, Kúnuu-namui a ŋ̀ɛ́i pôlu fé ḿî.”

¹⁴ Nya ƃe dí wɔ̀lɔ ŋɔ́nɔ kpɔ́ a ɣelêi-pere, Ôpa é ǹá-gbɔ see ǹûara ma é lene pôlu. Kɛ́lɛ Lûfi è kànaŋ ǹyora mà.

¹⁵ Naomi ǹyɛɛ m̀ai, “Gáa, íƃarâŋ a lí pôlu ŋɔnûai pɔ́ da ŋɔɣâla-ŋai. Ye lene pôlu lí ínûai pɔ́-naa.”

¹⁶ Kɛ́lɛ Lûfi è mò mà ǹyɛɛi, “Ífe mò ḿâ a gɛ́ɛ ŋá tée yâ kpaa máŋ fé pìlaŋ ípôlu. Ƃɛ́i ƃa liî naai, ŋa liî naa. Ƃɛ́i ƃa pâi kɛ̂i naai, nàa ƃé ŋa pâi kɛ̂i naa. Ínûai da pâi kɛ̂i a ŋánûa, Íɣâlai kɛ́ ƃò a Ŋáɣâla.

¹⁷ Ƃɛ́i ƃa pâi saâi naai, nàa ƃé ŋa pâi saâi naa. Ǹyaŋ nàa ƃé da pâi ńoôi naa. Tɔɔ Kúnuu-namui é mɛni kélee kɛ́ a ńyãa, kɛ́lɛ ǹyaa nɔ́ ƃé wála káa ǹyêei é kwa yâ kúkulâi kúkîe ma.”

¹⁸ Neomi kɛ́ɛ a gɔ́lɔŋ a gɛ́ɛ Lufi líi kulâi a gɛ́ɛ da ǹyaa dí líi, vé ŋɔ́nɔ mɛni da ƃó ní.

¹⁹ Nya ƃe dífeerɛ dí lì Bɛpeleɣɛ̃ɛ. Dí seriɛɛi naai, daai su-ƃelai kélee díkɛ̀ wúlee dímaa mɛni. Ǹɛyâai dí mò dîyɛɛi, “Neomi nɔ́ ƃe ŋí?”

²⁰ È mò dîa ǹyɛɛi, “Káfe ńdòli a Neomi, ka ńdoli a M̀âla, kpɛni fêi, Ŋ̀wála-wâla kélee Ɣalai a ŋáfulu-laai ŋwána.

²¹ Kú kɛ̀ a kútamaa kú lí. Kɛ́lɛ Kúnuu-namui a ńdɛɛ pôlu ńyãa tɔnɔ. Ka pâi ńdôlii a Neomi, lé mɛni ma à kɛ̀ Ŋ̀wála-wâla kélee ɣalai nyíi gáa a Kúnuu-namui a ńdɛɛ pôlu mɛni kpɔ̂lu sui?”

²² Bere sîi ŋí ƃé Neomi da ǹóŋ ŋɔnɛnîi Lûfi dí kùla la Môa lɔii su dí pá pôlu. Dí sèri Bɛpeleɣɛ̃ɛ a mɔlɔŋ teɛɛ kɔ́ɔ pîlaŋ-tã.