Filemɔn 1 - Bible

Laa-ti-maa

¹ Ńyãa Pɔ̂ɔ, ŋ́gaa a Zîsɛ Kôrai ŋɔluɛ, kwa kúƃarâŋ Temete, Kúƃarâŋ wɛli-kɛ-maa tii-kɛ́-nuui Falemɔŋ

² da kúsaaƃɔlɔ Afia da Asipɔ nyíi gáa a kúƃarâŋ-kɔ-kuluƃai, é pɛ́lɛ Kôrai-toli-kpɔŋ ma gáa yâ Falemɔŋ ípɛrɛi mui.

³ Ƃɛlɛ-sêe da lii-sêe dí kɛ́ káyêei é kúla Kúnâŋ Ɣâla yêei da Kúnuu-namui Zîsɛ Kôrai.

Falemɔŋ ŋɔwɛli-kɛ́-maai da ŋɔlaa-laai

⁴ Tãi ímaa-mɛ̂ni a tôo la ŋ́gili ŋá, Ŋáɣâla fɛliɛ sui, ŋa sɛɣɛ-fêi tɛ̀ɛ Ŋáɣâlai pɔ́ a tãi kélee,

⁵ kpɛ́ni fêi, ŋa íwɛli-kɛ-maai maa-mɛni mɛ̀ni da ílaa-lai nyíi gáa íyeêi Kúnuu-namui Zîsɛ da Ŋ̀âla-ƃelai kélee mɛ̂ni mai.

⁶ Ŋa Ɣâla fɛlîi a gɛɛ ǹaoi-laai kúkaa-zui maa laa-lai é dare su kɛ́tɛ nyíi gáa zɛŋ lɛ́lɛɛi kélee mɛni ma, nyíi-ŋai díkaa a kúpɔɔ Kôrai kponôi.

⁷ Kpɛ́ni fêi, ḿarâŋ, ŋa lii-nɛ̃ɛ da ŋa-nɛnɛ kùla íwɛli-kɛ-maai su, kpɛ́ni fêi, Ŋ̀âla-ƃelai su è kpanaŋ ísârai.

Pɔ̂ɔ è Onisimɔ maa-lia-woo ƃò Falemɔŋ mà

⁸ Yɛ̂ɛ berei gáa lai, berei máŋ ńii kpeleɛɛi la a ŋánaa Kôrai kponôi a gɛɛ ŋa mɛnii ƃo yâ nyíi ǹɛ́lɛɛ̂i,

⁹ é máŋ kɛ́ tí, wɛli-kɛ-maa mɛni ma ŋa ŋ̀wɛ̂lii ŋa ília-woo ƃo ńyãa Pɔ̂ɔ, ŋ́gaa a núu-pɔlɔ, ǹyaŋ ŋ́gaa nâa máŋ a luɛ Zîsɛ Kôrai mɛni mà.

¹⁰ Ŋa ília-woo ƃôi ńoŋ Onisimɔ mɛni ma, nyíi-ŋa kɛ̀ a ǹâŋ tãi ŋa kɛ̀ la kpini-pɛrɛ mui.

¹¹ È kɛ̀ a tãi da ŋɔtíi fé kɛ́ ní mà ímɛni ma. Kɛ́lɛ, tãi ŋí sú, tíi káa nâa mà a dámaa kwa ya kúmɛni ma.

¹² Ŋa dɛɛ̂i pôlu ípɔ naa. Ńii kélee ká tí ŋ́gaa dɛɛ̂i la ípɔ naai.

¹³ Eêi pɔ̂ri kɛ̂i ḿâ a lii-nɛ̃ɛ-mɛni a gɛɛ é kɛ́ ŋ́gɔlɛ a gɛɛ é tíi kɛ́ ḿî ípɔɔ ŋá, tãi ŋa kɛ̀ la kpini-pɛrɛ mù Duŋ Lɛ́lɛɛi mɛni mai.

¹⁴ Kɛ́lɛ, fé kɛ́ ní ŋ̀wɛ̂lii a gɛɛ ŋá mɛni da kélee kɛ́, à kɛ̀ ífe fáa ní mà, a gɛɛ ímɛni lɛ́lɛɛi fé kula wala-wala-laa su, kɛ́lɛ, é kúla íkpîŋ-nia-mɛni su.

¹⁵ Ɣele da nyíŋi mɛni ƃé Onisimɔ è kùla la íkɔlɛ a tãi da a gɛɛ é ŋɔ́nɔ pá ípɔ pôlu wɔ́lɔ-wɔlɔ da wɔ́lɔ-wɔlɔ.

¹⁶ Vé ŋɔ́nɔ a luɛ, kɛ́lɛ, é tée máŋ luɛ-mɛni ma, gáa a kúwɛli-kɛ-maa-ƃarâŋ. Gáa a ŋáwɛli-kɛ-maa-ƃarâŋ kpîŋ, kɛ́lɛ, gáa a íwɛli-kɛ-maa-ƃarâŋ a zu kɛ́tɛ núu-kpune kɛ-pere su da Kúnuu-namui kponôi.

¹⁷ Mɛni ma à kɛ̀ yà ŋ́gàa a íƃarâŋ, íyee see m̀u yɛ̂ɛ berei ya pɔ̂ri íyee seêi la ḿûi.

¹⁸ À kɛ̀ a mɛni nyɔ́mɔɔ kɛ́ a yá, kpaa máŋ à kpà sòŋ yâ, gɛ̀ ní bɔ̃̀yɛ ńaa ma.

¹⁹ Ńyãa Pɔ̂ɔ, ŋa nyíŋi pɔ̃yɛ̂i a ŋ́gbîŋ yée, ŋa pâi bɔɔ-tee tɛɛ̂i. Fé pâi mɛ̀ni da kélee ƃôi é pîlaŋ la gbai ma í zoŋ ḿâi, kpaa máŋ yá kpíŋ.

²⁰ Ooei, ḿarâŋ, ŋa mɛni lɛ́lɛɛ wɛ̂lii íyeêi Kúnuu-namui kponôi. Ŋ́gɛ ńzu é kpanaŋ Kôrai kponôi.

²¹ Ńaâi la a gɛɛ woo-mɛni káa íyeêi. M̀ɛni ma, ŋa kɔlɔ pɔ̃yɛ̂ ípɔ naa. Ŋá gɔ́lɔŋ a gɛɛ ya pâi m̀ɛnii kɛ̂i é tɛ́ɛ nyíi ma ŋa mò yâi.

²² Pɛ́rɛ kɔ̂ri mî máŋ, kpɛ́ni fêi, gáa ŋ́gili ŋá a gɛɛ Kúɣâla-fɛliɛɛi sú, Ɣâla a pâi pâi a ńyãa kápɔ.

Naa-ti-maai gbɛɛ ŋái

²³ Ɛpafɔlɛ, nyíi gáa a ḿarâŋ luɛ Zîsɛ Kôrai kponôi, è fàa yâ.

²⁴ Mâki ǹyaa máŋ, Arisitakɔ, Diima, da Lûu, nyíi-ŋai díkaa a ḿarâŋ-tii-kɛ-ƃelai, dí fàa yâ.

²⁵ Kúnuu-namui Zîsɛ Kôrai ŋɔƃɛlɛ-sêei é kɛ́ kámɔ̂leŋ kɔlɛ.