Osia 9 - Bible

Osia è Eezuɛ kula-maa kɛ́ mɛni ƃò

¹ Eezuɛ-ƃelai, káfe lii-nɛ̃ɛ kùla. Káfe lii-nɛ̃ɛ kùla yɛ̂ɛ lɔii da kpɛ́ni su-ƃela. Kpɛ́ni fêi, káfe a tɔ̃yâ-ƃela Káɣâlai mɛni ma. Ka pîlaŋ ŋ̀ulu-wulu kɛ́-nɛ̃yaai pôlu zãâ-taŋ kwaa-ŋai ma.

² Zãâi kélee ka zɔlɔ ƃô zãâ táŋ-kwaa-ŋai ma da ŋwã̂ai kpɛtɛ kwaa-ŋai mai, dífe pâi kɛ̂i a dámaa ká ŋáa kɔŋ mɛni ma.

³ Eezuɛ-ŋai dífe pâi lɛɛ̂i Yâwɛɛ ŋɔlɔii su. Kɛ́lɛ ká tá-ŋa ka pâi liî pôlu Ize lɔii su. Ǹûai kpéli-ŋai da pâi liî Asiria lɔii su ƃɛ́i da pâi zãâi mii naa nyii maa fé waa-ni Ɣâla ŋɛi.

⁴ Dífe pâi pɔrîi lɔɔ tɛɛ̂i Yâwɛɛ pɔ́ a sama-sɛŋ. Dífe pâi ǹíi lâai a dísâla sãai. Dísâla sãai fé pâi kɛ̂i a maa waa yɛ̂ɛ mii-sɛŋ nyii da góraŋ ƃò zàa-ƃelai dîɛi. Diai kélee pâi da miî, dímaa fé pâi kɛ̂i a ŋwaa Ɣâla ŋɛi. M̀ii-sɛŋ ŋí a pâi puru kulâi nɔ́ dîa. Kɛ́lɛ vé pâi lɔ̂i Yâwɛɛ ŋɔpɛ́rɛi mu.

⁵ Gɛ̀ ní lé ƃé ka pâi gɛ̂i a kákuui ŋ̀ele? Ǹyaŋ lé ƃé ka pâi gɛ̂i a Yâwɛɛ ŋɔkúui ŋ̀ele?

⁶ A nɛ̃ɛ ká pú ká kúla Asiria ŋɔmɛni kpɔ̂lui yêei, Ize-ƃelai da pâi ká sonîi dí ká ŋáa tɛ́ ma. Da pâi ká saa loôi Mɛfi taa leei su. Gáne-ŋai da pâi kɛ̂i a kala pɔ́ɔ, ŋalêŋ kpɔlɔ é tɛ́ dípɛrɛ-ŋai dîa.

⁷ Dɔŋ-kpɛ-maa-tãi à sèri, fela-fei-tãi a sèri, Eezuɛ-ŋai da pâi gɔ́lɔnîi. Ka gâai yɛ̂ɛ “Ɣâla ŋɔlóno kɛ́-nuui ƃoɔ̂i, ǹúui m̀ɔlêŋ káa gbonôi táre fé ŋuŋ su.” Kásɔnyɔ̂ŋ da kákpɔara su kɛ̂tɛi nyii ka gɛ́ a Ɣâlai.

⁸ Ɣâla ŋɔlóno kɛ́-nuui ƃé gáa a Eezuɛ-ŋai mɛi káa núu. Ɣâla a ńdɛɛ ŋɔnûai pɔ́. Kɛ́lɛ ƃɛ́i kélee ŋa lî naai, da ƃáre tɛ̀ ḿberêi yɛ̂ɛ ŋɔni. Kpɔara káa nɔ́ Ŋáɣâlai ŋɔpɛ́rɛi mu.

⁹ Díkaa a ŋwana lɔ̂ɔ-ƃela yɛ̂ɛ berei è wɔ́lɔ kɛ̀ la Gibia taa-leei sui. Ɣâla fé pâi niâi dísɔnyɔ̂ŋ ŋai dîa. A pâi díkula maa kɛ̂i.

Eezuɛ ŋɔsɔnyɔ̂ŋ da gula maa kɛ́ɛ

¹⁰ Yâwɛɛ è mò ǹyɛɛi, “Tãi ŋá Eezuɛ-ŋai kàa lai, dí kɛ̀ yɛ̂ɛ kpɔmɔ-ƃa vɛ̃ɛ-kpâlaŋ su. Tãi ŋá dínâŋ-ni kàa lai, dí kɛ̀ yɛ̂ɛ fîi wuru-ƃa maa-ŋuŋ. Kɛ́lɛ tãi da ńdɛɛ la dí tínaŋ Bêe Ɣalai pɔ́-naa-perei, ŋa díkpɔara yɛ̂ɛ berei ŋá Bêe Ɣalai kpîŋ kpɔ̀ara lai.

¹¹ Eezuɛ-ŋai díkɛtɛ-laai a pâi koônii yɛ̂ɛ ŋɔni-ŋa. Núu-kpune maa sɔlɔ ƃó-mɛni fé pâi kɛ̂i naa, koo-mɛni fé pâi kɛ̂i naa, koo-nɛni fé pâi kɛ̂i naa ŋɔ́nɔ. Nɛyâai dífe ŋɔ́nɔ pâi koo siɣêi.

¹² À kɛ̀ kpîŋ da nîa-pɛlɛɛ maa sɔlɔ ƃò, ŋa pâi dípaâi. Dítɔnɔ fa lɛ̂ɛ ɣele ma. Ŋà kùla dípôlu, kpalo ƃêlai dîa!”

¹³ Maa-ŋuŋ su, Eezuɛ è kɛ̀ yɛ̂ɛ tóu síɣɛɛ lɔii lɛ́lɛɛ ma. Kɛ́lɛ gáa yɛ̂ɛ a liî a ǹônii dípaa mɛni ma.

¹⁴ Óo Yâwɛɛ, mɛnii maa-nɛ̃ɛi í gɛ́ a diai, gɛ́ a dia. Gɛ́ dínɛyâai da koo sîɣe, é yéŋ a dia, díŋini-ya é kpála zu.

Yâwɛɛ ŋɔmɛni ŋáa-tɛɛi Eezuɛ mɛni mai

¹⁵ Yâwɛɛ è mò ǹyɛɛi, “Dísɔnyɔ̂ŋ-ŋai kélee kɔ́ɔ è pìlaŋ Geega taa-leei su. Ǹaa ƃé ŋá kpɔara kɔ́ɔ pìlaŋ naa dîa. Díŋwana-lɔ̂ɔ tua-ŋai mɛni ma, ŋa pâi díkpɛ̂i ŋápɛrɛi mu. Fé pâi díwɛ̂lii ŋɔ́nɔ. Díkâloŋ-ŋai kélee da tɔɔ ḿâ.

¹⁶ Eezuɛ-ŋai ƃóloŋɔ̂ɔi sí-sɛŋ wuru ma nyii zame a kpála mu, va ŋɔ́nɔ ƃài. À kɛ̀ kpîŋ da nîa-pɛlɛɛ maa sɔlɔ ƃô, ŋa pâi díwɛli kɛ́-maa ŋ̀ɔɔ-ŋai paâi.”

Ɣâla ŋɔlóno kɛ́-nuui a lônoi é pîlaŋ Eezuɛ-ŋai dîa

¹⁷ Ŋáɣâlai a pâi díkpɛ̂i, kpɛ́ni fêi, dífe niî díwoli tɔɔ ní ŋ̀óo ma. Da pâi kɛ̂i a pilaŋ gɔ́ɔ ma-ƃela ǹɔii-ŋûŋ-ŋai su.