Osia 6 - Bible

Ǹûai dílɛɛ lii-penei

¹ Ǹûai dí mò dîyɛɛi, “Ka pá kú lene pôlu Yâwɛɛ pɔ́ naa. Kpɛ́ni fêi, a sɛŋ sóli kûa ǹyaŋ a pâi kúƃâloi. A pala tée kûa, a pâi ŋ̀á ɣirîi.

² Fólo feerɛ a tɛ̀ɛ a pâi kúƃâloi, vóloi zaaƃa ɣelei é kúmu siɣe, kú kɛ́ ɣele ma ŋ̀ɛi túɛ.

³ Kwaa kɔ́ kú Yâwɛɛ kɔ́lɔŋ. Ŋɔmɛni kpɛtɛɛi káa a tɔ̃yâ yɛ̂ɛ ɣele ƃɔ́ɔ. A pâi pâi kúpɔ yɛ̂ɛ sama-ya ɣele-tuna nyii a ǹɔii yɔ̂ɔi.”

⁴ Yâwɛɛ è mò ǹyɛɛi, “Óo Eezuɛ da Zuda, lé ƃé ŋa pɔ̂ri gɛ̂i a káa? Káwɛli-kɛ maai káa yɛ̂ɛ ɣele ƃɔ̂i kpini, yɛ̂ɛ lúu nyii a tɛ̂ɛ a maa félaai.

⁵ M̀ɛni ma ŋa ŋálono kɛ́-ƃelai tɛ̂ɛ a gɛɛ dí kália-wôo ƃó a gbanaŋɔɔ a gɛɛ ŋa pâi ká su karâi, ǹyaŋ ŋámɛni ŋá téɛɛi a pâi pâi yɛ̂ɛ ɣele-ƃɔɔ.

⁶ Ŋá wɛli-kɛ-maa su kpanaŋɔɔ wɛ́li ní é tɛ́ɛ sâla kúlaa ma, ŋ́gɛ ŋwɛ̀li a gɛɛ ká Ɣâla ŋɔtárei wɛ́li é tɛ́ɛ kéreŋ-sala kúlaa ma.

⁷ “Kɛ́lɛ tãi nɔ́ dí sèri la Adaŋ taa-leei sui, dí Gbanaŋ-wooi kâra. Dífe kɛ́ ní a teniŋ ƃô-ƃela.

⁸ Gilia taa-leei káa a taa-lêe nyii ǹáa fɛ̂ɛi a sɔŋyɔ̂ŋ-ƃela da núu paa-ƃela.

⁹ Yɛ̂ɛ berei mɛni nyɔ́mɔɔ kɛ́-ƃela da kɛ̂ la díkpulu ma díkɛ núu maa kpɛ̂ŋ la a gɛɛ dí sɛŋ kula yêei kɛ̂i, bere ƃé zâla láa-soŋ-ƃelai díkaa la díkîɛ ma. Da núu pàa Sɛkɛŋ perei ma. Tɔ̃yâ ma, da mɛni nyɔ́mɔɔ kɛ̀ a núu.

¹⁰ Ŋa mɛni nyɔ́mɔɔ káa Eezuɛ lɔii su. Wulu-wulu kɛ́ɛ káa naa. Eezuɛ maa fé waa ní.

¹¹ “Ǹyaŋ à kɛ̀ a yá, óo Zuda, tɔŋ kpɛ-maa a pâi pâi ípɔ.