Osia 5 - Bible

¹ “Óo zâla láa soŋ-ƃelai, ka káwoli tɔ́ɔ! Óo Eezuɛ-ƃelai, ka káwoli tɔ́ɔ! Ka káwoli tɔ́ɔ, káai a gâloŋ ŋɔpɛ́rɛi mu-ƃelai! M̀ɛni ŋáa téeɛi ŋí tɔɔ̂i kâa. Kpɛ́ni fêi, ka nâa kɛ́ a ƃáre Mesipa taa-leei su, ká ƃò nâa a tuma Tabɔ Yeei mɛi kpɛ́ni fêi káa ƃé ka ǹûai kɛ́ díkɛ Ɣâla da kpɛ́ni-ŋa fɛ̀li naa.

² Ka lóa kpóŋ kôya tée Akasia taa-leei su. Ǹyaŋ ŋa pâi tɔ̂ŋ pûi kákelee kâa.

³ Ŋa Eezuɛ kɔ́lɔŋ, va pɔ̂ri ǹoôi ḿâ. Óo Eezuɛ, ƃa wulu-wulu kɛ́, ímaa fé waa ní ḿvɛli mɛni ma.”

Osia ŋɔlia-wooi é pîlaŋ sɛŋ da kpɛ́ni fɛliɛɛ ma

⁴ Dítûa-pere-ŋai da gɛ́ dífa pɔ̂ri pâi pôlu Díɣâlai pɔ́. Kpɛ́ni fêi, wulu-wulu kɛ́-mɛni káa díkponôi dífe ŋ́gɔlɔŋ ńyãa Yâwɛɛ.

⁵ Eezuɛ-ƃelai díyoŋka téɛɛi káa a sêre-faa nyii dɔɔ̂i dîa. Dísɔnyɔ̂ŋ-ŋai da gɛ́ da too. Zuda ǹyaa máŋ a pâi toôi.

⁶ Da pâi díƃala-ŋai da díniŋa-ŋai siɣêi dí lí a dia a gɛɛ dí sâla kula a dia Yâwɛɛ ma, kɛ́lɛ dífe pâi gâai, kpɛ́ni fêi, a dílɛɛ.

⁷ Dífe niî kɛ́ ní a tɔ̃yâ-ƃela Yâwɛɛ ŋɛ́i. Ǹyaŋ vé pâi dílônii kɔ́lɔŋ-nii. Dí lɛ́ɛ ɣala mɛni kɛ́ɛ-ŋai a pâi dísu karâi da dílɔii.

Kɔ́ káa Zuda da Eezuɛ díloai

⁸ Dúrii fɛ́ɛ Gibea taa-leei su. Dúrui fɛ́ɛ Lama taa-leei su. Dúrii wóo kúla Bɛtavɛ̃ŋ taa-leei su. Óo Bɛŋsima ŋɔnûai, ka lí kɔ́ ma.

⁹ Yâwɛɛ a pâi tɔ̂ŋ kpɛ̂i Eezuɛ lɔii ma. Nàa a pâi kɛ̂i a pîleŋ ŋá. Ŋa nyíŋi ƃôi zîi-ŋai kélee dîa díkaa Eezuɛ lɔii sui a gɛɛ mɛnii ŋí a pâi kɛ̂i a tɔ̃yâ.

¹⁰ Yâwɛɛ è mò ǹyɛɛi, “Gâloŋ-ŋai díkaa Zuda lɔii sui, da nâa kɛ́ yɛ̂ɛ diai da lɔii ŋɔkɔyɛŋ pere kula ǹáai. Ŋa ŋálii-ŋwânai pûi dîa yɛ̂ɛ yá.

¹¹ Ŋa pâi Eezuɛ-ƃelai su karâi a ŋá mɛni ŋá téeɛi. Dí mɛ̀ni kpɔ̂lui ŋí sɔlɔ ƃô kpɛ́ni fêi dí gbɛ̀tɛ díkili-ŋa a gɛɛ dí pîlaŋ ɣâla da kpɛ́ni-ŋa fɛliɛ pôlu. Kpɛ́ni fêi, è gbɛ̀tɛ a gɛɛ é pîlaŋ mɛni kpɛ́ni-kpɛni-ŋa pôlu.

¹² Ŋa pâi Eezuɛ su-karâi yɛ̂ɛ berei fili a wúru mìi lai ŋá Zuda su kara yɛ̂ɛ berei kpêle à sua su kara lai.

¹³ “Tãi Eezuɛ è ŋɔkɔlɔ-felai kàa lai, Zuda é ŋɔkpálai-laai káai, è kɛ̀ tí, Eezuɛ è lì Asiria lɔii su, é gâloŋ kɛ́tɛi worɛ̂ tɛ̀ɛ. Kɛ́lɛ vé kɛ̀ pɔri ní díƃâloi.

¹⁴ Ǹyaŋ ŋa pâi kɛ̂i yɛ̂ɛ yala-sulu Eezuɛ mɛni ma, ŋ́gɛ ƃò yɛ̂ɛ yala-sulu loŋ Zuda mɛni ma. Ńyãa kpîŋ ŋa pâi dífala-fâlai ŋá dí ɣála-ɣâla. Ŋa pâi liî a dîa, núu da fé pâi dí kulâi ńyêei.

¹⁵ “Ŋa pâi liî pôlu ḿbɔ naa é lɛ́ɛ la zu dí dísɔnyɔ̂ŋ kɔ́lɔŋ, dí ŋ́gɔri. Ǹyaŋ tãi da dímɛni-kpɔ̂lu-ŋai kɔ̂lɔŋ lai, da pâi ŋ́gɔ̂rii.”