Osia 4 - Bible

Yâwɛɛ è mɛni ƃô a Eezuɛ-ŋai láa

¹ È mò ǹyɛɛi, “Teniŋ ƃô-nuu tɔnɔ kpîŋ fé naa. Dífa ŋ́oo sìɣe a gbanaŋɔɔ. Dífe ŋɔ́nɔ ŋ́gɔlɔŋ a Díɣâla.

² Ǹûai da Ɣâla láa sìɣe kpɛ́ni-kpɛni, dí lɛ́ɛ kɛ́, dí núu páa, dí ŋúma kɛ́, dí kɛ́ wulu-wulu kɛ̀. Da m̀ɛni-ŋai ŋí kɛ̀ a tãi kélee. Da kɛ̂ nɔ́ mɛni nyɔ́mɔɔ kɛ̂i gîe mɛi a tãi kélee, dí kɛ́ núu pàa nɔ́ gîe mɛi kéleŋ.

³ M̀ɛni ma ǹɔii káa wɔ̂lɔi, zu sɛŋ kélee kpalâi, zua-ŋai, ŋɔni-ŋai, da nyɛ̃ɛ-ŋai da pâi saâi.”

Yâwɛɛ è mɛni ƃô a Zâla láa-soŋ-ƃelai láa

⁴ Yâwɛɛ è mò ǹyɛɛ, “Núu da fé mɛni lɛ̂ɛ m̀arâŋ-nuu ma, kpaa máŋ é zɔŋ síɣe, kɛ́lɛ óo zâla láa-soŋ-nuui, yá ƃé ísɔŋ káa ḿâ.

⁵ Ya pâi karênii a ɣele ƃɔ́ɔ, yɛ̂ɛ à kɛ̀ a kpíni. Ɣâla ŋɔlóno kɛ̂-nuui a pâi karênii máŋ bere sîi tɔnɔi ŋí su. Ŋa pâi Eezuɛ su-karâi nyii gáa a íleei.

⁶ Ŋánûai su a kâra, kpɛ́ni fêi, táre fé díyêei. Káai a zâla láa-soŋ-ƃelai, gáa a kásɔŋ kpɛ́ni fêi, ka kápôlu tɔ̀ɔ ḿâ, ka ŋásɛŋ lɛ́ɛi kpɔara. Berei ka ǹia la ŋátɔ̂ŋ mai, ńyãa máŋ ŋa pâi niâi kálônii dîa.

⁷ “Berei nɔ́ káai a zâla láa-soŋ-ƃelai ka tâmai lai, bere nɔ́ ƃé kákaa sɔnyɔ̂ŋ kɛ̂i la a ńyãa. Ŋa pâi káƃaa-kɛ-maai kɛ̂i a ŋumɛ.

⁸ Tãi nɔ́ zâla láa-soŋ-ƃelai díkaa mɛni lɛ́lɛɛ sɔlɔ ƃôi ŋánûai dísɔnyɔ̂ŋ kɛ́ɛ su a sâla sãa támaa sɔlɔ ƃoɔɔi, díkaa ŋ̀wɛ̂lii a gɛɛ ŋánûai díkɛ nɔ́ sɔnyɔ̂ŋ támaa kɛ̂i.

⁹ Berei máŋ ŋánûai dí sɔnyɔ̂ŋ kɛ̀ lai, ŋa pâi da zâla láa-soŋ-ƃelai dí kula maa kɛ̂i a bɔriɛɛ. Da pâi dísɔnyɔ̂ŋ fela fêi kɛ̂i.

¹⁰ Da pâi dílaa mîi, kɛ́lɛ dífa pîla. Da pâi wulu-wulu kɛ̂i, kɛ́lɛ dífe pâi lóŋ kâai, kpɛ́ni fêi da dípôlu fé ḿî, da díkpîŋ kɛ́ a wulu-wulu kɛ́-ƃela.”

Yâwɛɛ fé wɛ́li ní a sɛŋ da kpɛ́ni fɛli mɛni

¹¹ Yâwɛɛ è mò ǹyɛɛ, “Wã̂ai pɔlɔ da ŋwã̂ai-nina da núu ŋɔtárei kùla ǹyêei.

¹² Ŋánûai díkaa wúru-gbua marê kɛ̂i nyii da gbɛ̀tɛ a díɣâlai sɛŋ da mɛni ma, díkɛ ŋɔ́nɔ dímarê kɛ̀ a gɛɛ dí mɛnii lɛ́ dîa nyii pâi kɛ̂i nàa tuɛi. Wulu-wulu kɛ́ɛ a díkula berei ma, da ńɛɛ díkɛ Ɣâla da kpɛ́ni fɛ̀li.

¹³ Da sâla kùla ǹyée-kpaya-kpayai tôŋ su, díkɛ sâla-sãa pù ǹyée pɛlɛɛ-ŋai dîa, ŋ̀úru-ŋai mu, kpɛ́ni fêi, díninîŋ lɛ̂lɛɛi. “Mɛni ma kálônii-nɛyãai díkaa wulu-wulu kɛ̂i, ǹyaŋ kálônii sinaai dínɛyâai díkɛ wulu-wulu kɛ̀.

¹⁴ Fé pâi kálônii-nɛyãai kula-maa kɛ̂i à kɛ̀ da wulu-wulu kɛ̀, kpaa máŋ kálônii sinaaii dínɛyâai, à kɛ̀ da wulu-wulu kɛ̀. Zinâai dia kpîŋ da lî ŋ̀uru-wulu kɛ́ nɛyaa-nɛyãai pɔ́, díkɛ sâla kùla ŋ̀uru-wulu kɛ́ nɛyãai díkpɛ̀tɛ ɣâla-ŋai dîa. Diai táre fé díyêei dísu a pâi karâi.

¹⁵ “Óo Eezuɛ-ƃela, berei máŋ kákaa la a wulu-wulu kɛ́-ƃelai, Zuda-ƃelai dífe kápɔɔ kɔɔŋ. Káfe lì Geega, kpaa máŋ Bɛtâvɛ̃ŋ Ɣâla fɛlîi, káfe kákono tèe Yâwɛɛ láai su.

¹⁶ Yɛ̂ɛ berei niŋa-loŋ wôlii kpɔ̂lɔi lai, bere nɔ́ ƃé Eezuɛ-ƃelai wôlii kpɔ̂lɔi la. Ńyãa Yâwɛɛ ŋa pɔ̂ri díŋaa kɔnîi yɛ̂ɛ dia ƃé kala kpûlu su?

¹⁷ Eezuɛ-ƃelai díkaa a sɛŋ da kpɛ́ni-ŋa fɛli-ƃela. Tɔɔ dí sía a díkpɔɔi pere.

¹⁸ Ǹûai da gbàa kpɛ̀ɛ a nɔɔi kpeleɛɛ, da pɛ̂lɛ wulu-wulu kɛ̂i. Dí wɛ́li-ni a ƃaa-kula-maa é tɛ́ɛ ƃaa-kɛ-maa ma.

¹⁹ Fãa a pâi tɛɛ̂i a dia, ǹyaŋ da pâi ŋumɛi dísâla-ŋai mɛni ma díɣâla teƃele-ŋai dîa.