Osia 2 - Bible

¹ M̀ɛni ma íƃarâ Eezuɛ-ŋai tóli a “Ɣâla ŋɔnûai nyii a dímalôŋ kaai.”

Gomɛ fé a tɔ̃yâ nɛni, Eezuɛ-ŋai dífe a tɔ̃ya-ƃela Yâwɛɛ mɛni ma

² Yâwɛɛ è mò ǹyɛɛi, “Ka mó kálee ma a gɛɛ é kpéra ŋɔmɛni nyɔ́mɔɔi ma. Vé ŋɔ́nɔ a ŋánɛnî ńyaŋ ḿve ŋɔ́nɔ a ŋɔsurɔ̂ŋ. Ka mó ma a gɛɛ é ǹyée kúla wulu-wulu kɛ́ɛ su, é tée mɛni piliɛɛ zu ma.

³ À wàla kɛ́ tí, ŋa pâi maa kpôlonii é lɛ́ɛ a gáa kàŋ yɛ̂ɛ berei dí m̀aa sɔlɔ ƃô lai. Ŋa pâi gɛ̂i yɛ̂ɛ fɛ̃ɛ-kpâlaŋ ŋá, gɛɛ yɛ̂ɛ lɔii-kpûa ƃɛ́i yá fé naai, ŋá báa a kpele wɛ̂li.

⁴ Fé pâi ǹônii malôŋ kâai, kpɛ́ni fêi, díkaa a wulu-wulu kɛ́ nɛni lônii.

⁵ Dílee è wulu-wulu kɛ̀. È dímaa kôo sìɣe ŋumɛ tûa kɛ́ɛ su. È mò ǹyɛɛ, ‘Ŋa pâi liî ŋáwɛli-ŋai pɔ́ nyii-ŋai da kpólo yà ḿî, seɣe, wúlɔ da kpele-sɛŋ.’

⁶ “M̀ɛni ma ŋa pâi berêi kpáanîi a ŋalêŋ kpɔlɔ, ŋá kónaŋ tɔ́ɔ é tínaŋ ma, a gɛɛ vé pere kâa é kúla.

⁷ A pâi kîrɛ siɣêi ŋɔwɛ́li-ŋai pôlu, kɛ́lɛ vé pâi dísonîi. A pâi díkɔ̂rii, kɛ́lɛ vé pâi díkâai. A pâi m̀ôi ǹyɛɛ, ‘Ŋa pâi liî pôlu ŋásurɔ̂ŋ maa-ŋuŋ pɔ́, kpɛ́ni fêi, ŋá kɛ̀ mɛni lɛ́lɛɛ sɔlɔ ƃôi é tɛ́ɛ tãi ŋí ma.’

⁸ “Vé kɛ́ ní a gɔ́lɔŋɔɔ a gɛɛ ńyãa ƃé mii-sɛŋ tɛ̀ɛ bɔ́, ŋwã̂ai, sɛŋ-kao kole da gôo tɛ̀ɛ bɔ̀ nyii-ŋai è tíi kɛ̀ la Bêe Ɣalai fɛli-pɛrɛi mui.

⁹ M̀ɛni ma ŋa pâi ŋá sí-sɛŋ su karâi a gula tãi. Ŋa pâi ŋáŋwã̂ai su karâi a gbɛ̀tɛ tãi. Ŋa pâi ŋáseɣe pala-sãai siɣêi pôlu nyii-ŋai ŋá dɛ̀ɛ bɔ́ a gɛɛ é seɣe pála la é dóo m̀ai.

¹⁰ Ǹyaŋ ŋa pâi gaŋ ƃôi ŋɔwɛ́li-ŋai ŋɛ́i. Núu da kélee fé pâi pɔrîi gulâi ńyêei.

¹¹ Ŋa pâi ŋɔlii nɛ̃̂ɛi, ŋɔkúu kɛ́ɛi, ŋɔɣáloŋ nina kuu kɛɛi, ŋɔfii-tɔɔ ɣele-ŋai da ŋɔtɔɔ kuu ɣele-ŋai kélee kperâi.

¹² Ŋa pâi ŋɔkpɔmɔ-ƃa wuru-ŋai da ŋɔfîi wurui paâi nyii a mò ǹyɛɛ, ‘Ḿbɔɔ ƃa dia. Ŋáwɛli-ŋai ƃé dí tɛ̀ɛ ḿbɔ a ŋá fela fêi.’ Berei máŋ è m̀ɛni-ŋai ƃò lai, ŋa pâi dí lɛɛ̂i naa lɔɔ-sûa-ŋa dí mìi.

¹³ Ǹyaŋ ŋa pâi tɔ̂ŋ kpɛ̂i m̀a gúui mɛni ma a gɛ̀ Bêe-ŋai dîa gɛ́ m̀aa-ɣiri a m̀aa ɣîri-sãa lɛ́lɛɛ-ŋa, gɛ́ lì ŋɔwɛ́li-ŋai pɔ́ naa, gɛ́ nìa ḿɛni mai.”

Yâwɛɛ ŋɔwɛli kɛ́-maai ŋɔnûai mɛni mai

¹⁴ Yâwɛɛ è mò ǹyɛɛ, “M̀ɛni ma, ŋa pâi ǹíi kula woo ƃôi ŋá pá la vɛ̃ɛ-kpâlaŋ su, ŋá lóno bɔ́ a ǹɛ́lɛɛ.

¹⁵ Ǹyaŋ nàa ƃé ŋa pâi ŋɔkpɔmɔ kpâlaŋ tɛɛ̂i naa bɔ́. Ŋa pâi Ekɔɔ tiŋ-tiŋ kɛ̂i a kili-kɛ-maa pɛrɛ lá kpòŋ. Nàa ƃé a pâi ŋ́oo su toôi naa yɛ̂ɛ tãi è kɛ̀ la a núu-tɔɔ, da tãi è kùla la Ize lɔii sui.”

¹⁶ Maa ɣêlei tí ya pâi ńdôlii a ísurɔ̂ŋ. Ífe pâi ŋɔ́nɔ ńdôlii a íbêei nyii gáa a íɣâlai.

¹⁷ Ŋa pâi Bêe laa-ŋai kulâi ǹá, ǹyaŋ núu da fé pâi ŋɔ́nɔ wɔ́lɔ ǹáa-ŋai ŋí kɔ́lɔnîi.

¹⁸ “M̀aa ɣêlei tí ŋa pâi ŋ́gono-têei ŋánûai yêei a gɛɛ ǹɔ́ɔ sua-ŋai, ŋɔni-ŋai, da dɔara-sãai dífe mɛni ŋánaa kɛ̀ a dia. Ŋá pâi kerâŋ, ƃóa-sɔ̂kpɔ da kɔ́kɔ mɛni kperâi ǹɔii ma. Ŋa pâi gɛ̂i dí kɛ́ lii-sêe su.

¹⁹ “Ŋa pâi íkulâi a nɛnî, Íkɛ a ŋánɛnî wɔ́lɔ-wɔlɔ da wɔlɔ-wɔlɔ. Ŋa pâi kɛ̂i a tɔ̃yâ surɔŋ lɛ́lɛɛ. Ŋa pâi íkɛ̂i a núu sã́a. Ŋa pâi íwɛ̂lii a ŋánaa wɔ́lɔ-wɔlɔ da wɔlɔ-wɔlɔ, ŋá í malôŋ káa.

²⁰ Ya pâi kɛ̂i a ŋánɛnî. Ŋa pâi íwɛ̂lii a tɔ̃yâ-pere, gɛ̀ ní, ya pâi ńyãa Yâwɛɛ ŋ́gɔlɔnîi.”

²¹ Yâwɛɛ è mò ǹyɛɛi, “M̀aa ɣêlei tí ŋa pâi ŋánûai Eezuɛ-ŋai díɣâla fɛli woo-ŋai mɛnîi. Ŋá gɛ́ tuna é pú ǹɔii ma.

²² Ǹɔii a pâi mii-sãa, gbɔmɔ-ƃa kpɔlɔi da ŋ̀úlɔ wuru-ŋai kɛ̂i dí kpɛtɛ dí ƃá, dí Zariɛɛ líi láa.

²³ Ŋa pâi ŋánûai seêi kɛ̂i ma ǹɔii su dí ƃûu ƃó naa. Ŋa pâi Loluama malôŋ kâai, ŋá m̀ó Loaŋmi ma, ká káa a ŋánûa, gɛ̀ ní da pâi m̀ôi dîyɛɛ íkaa a Kúɣâla.”