Osia 13 - Bible

Eezuɛ ŋɔtɔŋ kpɛ́-maai gbɛɛ-ŋai

¹ Tãi Ifiɛŋ ŋɔsuui su-ƃelai da a kâa lòno lai, Eezuɛ-ƃelai kpéli-ŋai da kâa kpɛ̃̀liŋ. Dí kɛ̀ ƃaa kɛ́-maa támaa tɛɛ̂i dí pɔ́. Kɛ́lɛ, tãi Ifiɛŋ ŋɔsuui su-ƃelai dí pɛ̀lɛ Bêe fɛliî lai, dí su è kàra.

² Ǹyaŋ díkaa nɔ́ niî sɔnyɔ̂ŋ kɛ̂i, dí kɛ́ díkpîŋ díkpɛtɛ sãai fɛ̂li, nyii dí gbɛ̀tɛ a kánei díkɛ mò dîyɛɛi, “Sâla kùla dîa,” ǹûai díkɛ díla-gbɔ sèe dîa.

³ M̀ɛni ma Eezuɛ a pâi kɛ̂i yɛ̂ɛ ɣele-wala-luu, kpaa máŋ lúu nyii a tâa a sómoɔɔ, kpaa yɛ̂ɛ sɛŋ ƃa vɛ̀ɛi maa kpôlo nyii a kûla lâa sui, kpaa máŋ yɛ̂ɛ luri nyii a kûla wôna lai.

⁴ Ńyãa ƃa Yâwɛɛ, Káɣâlai. Ńyãa ƃé kákùla Ize-lɔii su. Káfe Ɣâla da kpɛ́ni kɔ́lɔŋ é kúla ńyãa ḿbôlu. É kúla ḿƃôlu, káƃalo nuu da kpɛ́ni fé naa.

⁵ Ńyãa ƃé kámɛi kâa vɛ̃ɛ-kpâlaŋ su, ƃɛ́i ǹaa è kɛ̀ a gbálaa, yá fé naai.

⁶ Kɛ́lɛ tãi ká sèri la ǹɔii lɛ́lɛɛi mai, sɛŋ kélee è kɛ̀ káyêei kálii è nɛ̃ɛ. Ká kákpîŋ sìɣe a gɛ́tɛ ká nìa ḿâ.

⁷ M̀ɛni ma ŋa pâi kɛ̂i yɛ̂ɛ yala-sulu dímɛni ma, ŋá ńoo dí perei yɛ̂ɛ kɔ́li.

⁸ Ŋa pâi pɛlɛ̂i dîa yɛ̂ɛ berei ditala a pɛ̂lɛ la sɛŋ da ma nyii a ǹônii siɣei. Ŋa pâi dísu-tee-têei ŋá dímii yɛ̂ɛ yala-sulu.

⁹ “Óo Eezuɛ-ƃelai, ŋa pâi kásu karâi, gɛ̀ ní gbɛ̂ɛ ƃé pâi kpɔŋ maa tɛɛ̂i kápɔi?

¹⁰ Kákâloŋ kɔɔ é káƃalo, kákâloŋ túɛ-ƃelai kɔɔ dí ká-mɛi wôo ƃó, diai ká dí-mare-kɛ̂ɛ kɛ̀ ḿâ kâa, ‘Káloŋ tɛɛ kúpɔ é pɛ́lɛ núu túɛ-ƃela diai?’

¹¹ Ŋá kâloŋ-ŋa tɛ̀ɛ kápɔ lii-ŋwâna-pere su. Ŋá díkula káyêei lii-ŋwâna-pere su.

¹² “Eezuɛ-ŋai dísɔnyɔ̂ŋ kélee ŋáa tɛ̂ɛi ma ǹâai kɛ̂ɛ.

¹³ Eezuɛ ƃóloŋɔ̂ɔi lôloŋ ma nyii ǹee à kɛ̀ pâi m̀aa sɔlɔ ƃôi, ǹaa a kpanaŋ. Kpɛ́ni fêi, môɔɔi, vé ŋ̀wɛ̂lii é kúla.

¹⁴ Fé pâi díkulâi saa-taa, kpaa máŋ ŋá pɔri díkulâi saa ŋɔwála-walai mu? Óo saa-taa, pá a íkɔlɔ-fela nyɔ́mɔɔ-ŋai. Maloŋ-kâa fé ŋɔ́nɔ ńyêei.

¹⁵ Berei máŋ Eezuɛ tɔɔ̂i la dɛɛ ǹɔii-ŋuŋ gbéli-ŋai dîai, ŋa pâi fãa kɛ́tɛ tɛɛ̂i é kúla vóloi kulâi-pere vɛ̃ɛ-kpâlaŋ su, é ǹya-tôŋ-ŋai da ǹyá-loa-ŋai kpála. Vãa kɛ́tɛi a pâi tɛɛ̂i a dítɔɔ-sãai kélee.

¹⁶ Tɔŋ kpɛ́-maai a pâi pâi Sameria-ƃelai pɔ́, kpɛ́ni fêi da sɔnyɔ̂ŋ kɛ́ a ńyãa. Da pâi saâi kɔ́ su. Da pâi dínîa-pɛlɛɛi da díkoo-nɛyãai su tée-têei.”